İsrail Xarici İşlər Nazirliyində İranın diplomatik təcridinə yönəlmiş məxfi plan hazırlanıb və bu planda əsas rol Azərbaycana ayrılıb.

Virtualaz.org saytı məlumatı İsrail qaynaqlarından əldə edib. Yəhudi mənbələrində yer alan xəbərdə bildirilir ki, plana əsasən ayətullah rejiminin qonşuları - Azərbaycan, Gürcüstan, Qazaxıstan, Türkmənistan və Özbəkistan İrana qarşı işbirliyinin əvəzində İsraildən real iqtisadi, siyasi və kəşfiyyat dəstəyi alacaqlar.

Məlumata görə, bu ölkələrə təklif edilir ki, İranın təcrid olunmasına dəstək versinlər. Əvəzində “öz vədlərini yerinə yetirməyən İrandan fərqli olaraq” İsrail onlara hər cür dəstək göstərəcək.

Virtualaz.org ötən həftə xəbər vermişdi ki, İsrailin Azərbaycan, Özbəkistan, Türkmənistan və Qazaxıstandakı səfirləri yəhudi dövlətinin xarici işlər nazirinin müavini Zeev Elkin tərəfindən təlimatlandırılmaq üçün Tiflisə çağırılıblar. İsrail xarici işlər nazirinin müavini İrana qonşu ölkələrdəki səfirlərlə Tehranın nüvə fəaliyyəti ətrafında yaranmış vəziyyəti, səfirlərin işlədikləri ölkələrin İrandakı son prezident seçkilərinə və Həsən Ruhaninin qələbəsinə münasibəti və digər məsələləri müzakirə edib.



Səfirlərin Tiflisə çağırılaraq İranla bağlı təlimatlandırılması Qərblə Tehran arasındakı münasibətlərin son vaxtlar istiləşməsi ilə bağlıdır. Qərb İranın yeni prezidenti ilə anlaşmaya və sanksiyaları yumşaltmağa hazırdır. Lakin İsrail bu yumşalmadan ciddi narahatdır və bildirir ki, Tehran nüvə silahı əldə etmək səylərini dayandırmayıb və sanksiyaları yumşaltmaq yolverilməzdir.

Belə görünür ki, səfirlərin Tiflisə çağırılması İsrail XİN-də İranın təcrid olunmasına dair hazırlanmış planla bağlı olub. Xəbərdə bildirilir ki, İsrail XİN-də hazırlanmış plana əsasən Azərbaycan və adıçəkilən digər ölkələrlə Tehrandan dəstəklənən “Hizbullah” kimi terrorçu qruplaşmaların fəaliyyətinə dair kəşfiyyat məlumatlarının operativ mübadiləsi nəzərdə tutulur. Həmçinin sözügedən ölkələrə İsrail tərəfindən radikal islamçılarla, o cümlədən həmin ölkələrin Suriyaya döyüşməyə gedən və oradan döyüş əməliyyatları təcrübəsi ilə qayıdan vətəndaşları ilə mübarizədə kömək göstəriləcək.



Bundan əlavə, İsrail İran kəşfiyyatının Azərbaycan və adıçəkilən digər ölkələrdəki fəaliyyətinə dair müntəzəm informasiya mübadiləsinə də təminat verir. Həmin ölkələrə təklif edilən sosial dəstək proqramı isə səhiyyə sisteminin, energetikanın və kənd təsərrüfatının inkişafına köməyi nəzərdə tutur.

Planda Azərbaycana və Gürcüstana xüsusi diqqət ayrılır. Oktyabrın 31-dən etibarən İsraillə Gürcüstan arasında viza rejiminin ləğvi də bunu sübut edir.

İsrail qaynaqları bildirir ki, İranda baş verənləri ABŞ-ın Tehranla yaxınlaşmasından ciddi narazı olan Səudiyyə Ərəbistanı da yaxından izləyir. Noyabrın 3-də Səudiyyə Ərəbistanı Almaniyadan 2,5 milyard dollar dəyərində beş sualtı qayıq almağa dair razılaşma əldə edib. Gələcəkdə sualtı qayıqların sayını 25-ə çatdırmaq nəzərdə tutulur.

Belə görünür ki, İsrailin İrana dair planı artıq Azərbaycana və digər ölkələrə təqdim olunub. Rəsmi Bakının bu plan üzrə İsraillə əməkdaşlığa nə dərəcədə hazır olduğu məlum deyil. Bununla belə Azərbaycanla İsrail arasında təhlükəsizlik, kəşfiyyat və silah satışı məsələsində çoxdan dərin münasibətlər mövcuddur. Azərbaycan İsraildən milyardlarla dollarlıq ən yeni silahlar, o cümlədən Xəzərdə İrana qarşı ciddi çəkindirici təsirə malik olan gəmi əleyhinə “Gabriel” raketləri alıb.



İran kəşfiyyatının və bu ölkədən dəstəklənən terrorçu qrupların Azərbaycan ərazisində həyata keçirməyə çalışdığı terror və təxribat planlarının qarşısı dəfələrlə İsrailin kəşfiyyat dəstəyi ilə alınıb.

Nüfuzlu Qərb mənbələri ötən il xəbər vermişdi ki, İsrail İranın nüvə obyektlərinə hava zərbələri endirmək üçün Azərbaycan ərazisindəki aerodromlardan istifadəyə razılıq alıb. Rəsmi Bakı bu razılaşmanı təkzib edir.

Görünür, İsrail XİN-in hazırladığı son planda Azərbaycana İrana qarşı daha dərin əməkdaşlıq təklif olunur. Hansı ki, bu, kifayət qədər həssas məsələdir. Çünki rəsmi Bakı İranla qarşıdurmada heç vaxt maraqlı olmayıb və hazırda da Qərbin Tehranla münasibətləri normallaşdırmaq səylərini diqqətlə izləyir.