Seçkidən sonrakı mitinqlər kimin xeyrinə işlədi?
9 oktyabr prezident seçkilərindən sonra Demokratik Qüvvələrin Milli Şurası iki dəfə mitinq keçirdi. Həmin mitinqlərin seçkidən sonra Azərbaycan siyasətinə, siyasi prosesə necə təsir etməsi ilə bağlı fərqli mövqelər var. Bəzi siyasətçilər hesab edir ki, keçirilən mitinqlərə Milli Şuranın namizədinə səs verənlərin heç 10 faizinin belə, qatılmaması xalqın siyasi mübarizəyə qoşulmaması faktını ortaya çıxarıb.
Bu vəziyyət Milli Şuranın mitinqlərə bir qədər ara verməsi ilə yanaşı, seçkilərin nəticələrinə münasibət bildirməkdə tərəddüd edən bir sıra dövlətlərin prezident İlham Əliyevə təbrik məktubları göndərməsinə təkan verib. Təsadüfi deyil ki, Avropanın bir neçə böyük dövlətləri bir müddət gözləmə mövqeyi tutmuşdular və məhz sözügedən mitinqdən sonra təbrik ünvanladılar.

Milli Şuranın üzvü, AXCP sədrinin müavini Fuad Qəhrəmanlı da hesab edir ki, seçkidən sonra keçirilən mitinqlər siyasi proseslərə təsirsiz ötüşmədi, artım dinamikası nümayiş etdirdi. Çünki 12 oktyabrda keçirilən mitinq seçki təbliğatı dövründə keçirilən mitinqlərdən daha kütləvi olmuşdu. Bu baxımdan aydın oldu ki, Azərbaycan cəmiyyətində məyusluq yaranmadı: “Əksinə, məlum oldu ki, cəmiyyət ölkədə demokratik dəyişikliklərin yolunu məhz hakimiyyətin saxtalaşdırdığı seçkilərə ümid bəsləməkdə yox, aktiv mübarizədə görür. Seçkidən sonra keçirilən aksiyalar bu əminliyi yaratdı. Eyni zamanda aydın oldu ki, müxalifətin ciddi sosial bazası var.

Rusiyada seçkilərdə müxalifətin namizədi Aleksey Navalnının Moskvada keçirdiyi aksiyalara baxsaq görərik ki, 140 milyon nəfərlik Rusiyada seçkidən sonra keçirilən mitinqə 20 min adam gəlir və bu çox uğurlu sayılır. 140 milyonluq ölkədə 20 minlik mitinq uğurlu sayılırsa, 9 milyonluq əhalisi olan Azərbaycanda 15-20 min arası kəmiyyət göstəriciləri ilə mitinqin keçirilməsi cəmiyyətdə yüksək siyasi fəallığın göstəricisidir. Bu mitinqlərdən aydın oldu ki, Azərbaycan müxalifəti cəmiyyətə təsir etmək, insanları siyasi mübarizəyə cəlb etmək imkanlarına malikdir”.

İlham Əliyevin ünvanına nüfuzlu Avropa dövlətlərindən təbriklərin məhz seçkidən sonra keçirilən ikinci mitinqdən sonra gəlməsi məsələsinə isə F.Qəhrəmanlı belə münasibət bildirdi: “Əvvəla, bu təbriklər gözlənildiyi qədər olmadı. Bunların içərisində dünya siyasətində əsas rol alan uzağı bir-iki dövlətin adını çəkmək olar. Söhbət Qərb dövlətlərindən gedir. Bu məktubların məzmununa fikir versəniz, burada təbrikdən söhbət getmir. Orada söhbət birgə işləməkdən, əməkdaşlığın davam etdirilməsindən gedirdi. Bu təbriklər məzmun etibarilə seçkinin nəticələrinə münasibəti ifadə etmirdi. Sadəcə olaraq, ölkələr arasında əməkdaşlığın davam etdirilməsinin zəruriliyi vurğulanırdı. Bu baxımdan həmin təbriklər faktiki hakimiyyətlə işləmək mövqeyini ifadə edirdi. Bu gün dünya Bəşər Əsədi legitim hakimiyyət kimi tanımır. Ancaq eyni zamanda Suriya ilə bağlı danışıqlarda faktor olar Bəşər Əsəd tərəfdir”.

F.Qəhrəmanlı mitinqlərə ara verilməsinin Milli Şuranın namizədi Cəmil Həsənlinin xarici səfərləri ilə bağlı olduğunu dedi: “Seçkidən sonra keçirilən mitinqlərin əsas məqsədi seçki saxtakarlığına etiraz edilməsidir və demokratik seçkilərin keçirilməsi tələbidir. Bu mitinqlərdə Cəmil Həsənlinin şəxsən iştirakı vacibdir. Ötən seçkidən sonra Cəmil müəllim Türkiyədə səfərdə olub. Bu ayın 14-17-də isə ABŞ-a səfəri gözlənildiyi üçün biz bu səfərin başa çatmasını gözləməliyik. Səfər başa çatdıqdan və Cəmil Həsənlinin aksiyada iştirak imkanı yaranandan sonra növbəti mitinq təyin olunacaq və keçiriləcək. Hazırda isə aksiyalara ara verilməsi Cəmil Həsənlinin xarici səfərləri ilə bağlıdır”.