Dünya ölkələrinin əksəriyyətində iqtisadiyyata və digər sahələrə təsir edəcək kifayət qədər zəngin insanlar, iş adamları. Onlar malik olduqları varidatı, hansısa sahəyə yatırdıqları sərmayələri gizlətməkdən çəkinmirlər.
Lakin Azərbaycanda bunu görmək mümkün deyil. Halbuki, neft ölkəsi olan Azərbaycanda pulunu “balta kəsməyən” kifayət qədər milyonçu və milyarder var.

“Forbes” jurnalının hər il açıqladığı milyarderlər sırasında əslən azərbaycanlı olan və digər ölkələrin vətəndaşlığını qəbul etmiş, xaricdə yaşayan həmyerlilərimizin adlarına rast gəlirik. Amma hələ ki həmin siyahıya Azərbaycanda yaşayan milyonçu, yaxud milyarderin adı salınmayıb.

Yuxarıda qeyd etdiyimiz kimi, Azərbaycanda böyük pullara sahib olan şəxslərin fəaliyyət göstərdiyi heç kimə sirr deyil. Bəs onlar niyə gizlənirlər, öz var-dövlətlərini rəsmən etiraf etməkdən niyə çəkinirlər? Bəlkə o pulları halal yolla qazanmayıblar?

Mövzu ilə bağlı Modern.az-a açıqlama verən iqtisadçı-ekspert Rövşən Ağayev məsələnin köklü səbəbinin Azərbaycan cəmiyyətinin şəffaf olmamağında görür. O, eyni zamanda hesab edir ki, Azərbaycanda leqal biznes sahəsi olmadığından rəsmi milyonçular da üzə çıxmırlar.

”Bizim ölkəmizdə reallıqda milyardlıq dövriyyəsi olan şəxslərin biznes dövriyyəsi rəsmi şəkildə milyonluq göstərilir. Yəni dövriyyə gizlədilir. Belə olan halda həmin biznesin sahibi də leqal deyil. Bundan başqa, Azərbaycanda biznes siyasi postlarla çuğalaşıb. Faktiki olaraq biznesin başında duran şəxslər siyasi postları tutan və ya onlara çox yaxın insanlar, məmurlardır. Halbuki, qanunvericiliyə görə, siyasi post tutan, dövlət vəzifəsində çalışan şəxslərin biznes və kommersiya fəaliyyətilə məşğul olmağı qadağandır. Əgər milyonçular leqallaşsa, təbii ki, onların siyasi postlar tutan şəxslər olmağı da üzə çıxacaq. “Maliyyə məlumatlarının təqdim olunması haqqında” Qanun var. Bu qanun işləməsə də, hüquqi qüvvəsi var ki, vəzifəli şəxs ailə üzvlərinin varidatını bəyan etməlidir. Amma bizdə bu, edilmir”.

Millət vəkili Vahid Əhmədov isə hesab edir ki, Azərbaycanda milyonçuların üzə çıxması üçün ilk növbədə maliyyə amnistiyası verilməlidir.

“Bu barədə məsələ qaldırmışıq. Azərbaycanda maliyyə amnistiyası olmalıdır ki, böyük pulları olanlar da öz mal-mülklərinin siyahısını açıqlaya bilsinlər. Maliyyə amnistiyası olmadığından kimsə özünə milyonçudur deyə bilmir. Maliyyə amnistiyası olsa, həmin insanlar da öz yatırımlarını açıq şəkildə Azərbaycana qoya bilərlər”.