PA rəhbərinin yerinə iki iddialı var; Əli Əsədov və Zeynal Nağdəliyev "boz kardinal"ın postu uğrunda hərəkətə keçib

gundemxeber.az Hələ bir müddət əvvəl Prezident Administrasiyasının (PA) rəhbəri Ramiz Mehdiyevin tutduğu vəzifədən uzaqlaşdırılaraq Heydər Əliyev Mərkəzinə rəhbər təyin ediləcəyi barədə məlumatlar yayılmışdı. Bu məlumatlar təsadüfi deyildi və hakimiyyətdaxili mənbələr iddia edirdi ki, İlham Əliyevin Ramiz Mehdiyevlə vidalaşmaq istəyinin bir sıra ciddi səbəbləri var idi.
Əvvəla, "boz kardinal"la İlham Əliyevə daha yaxın olan Paşayevlərin münasibəti qarşıdurma səviyyəsindədir. Qarşıdurma bəzən açıq müstəviyə də keçir və bu zaman hakimiyyətdə ciddi təlatümlərə yol açır. Hakimiyyət daxilində belə bir konfrantasiya əlbəttə ki, İlham Əliyevin rahatlığını pozmaya bilməz.
İkincisi, Ramiz Mehdiyevin idarəçilikdəki mövcudluğu İlham Əliyevin dövlət başçısı kimi varlığını kölgədə qoyur. İlham Əliyev özü də yaxşı bilir ki, cəmiyyətdə "ölkəni Ramiz Mehdiyev idarə edir" kimi bir rəy hakim kəsilib. Uzun illər ərzində formalaşan və hər kəs tərəfindən qəbul edilən bu rəy dövlət başçısında müəyyən kompleksin formalaşmasına gətirib çıxarıb. Deməli, İlham Əliyev varlığını (idarəçilikdəki) hiss etdirmək üçün "Ramiz Mehdiyev kompleksi"ndən qurtulmaq istəyə bilər.

Dörd müavinlə başlayan proses

Akademikin "vurulacağı" və PA rəhbərinə dörd müavin təyin edilərək onu tam nəzarətə götürmək istiqamətində aparılan islahatlardan sonra hakimiyyətdaxili qruplaşmalar "boz kardinal"ın postu uğrunda mübarizəyə başlayıb. Hakimiyyətdəki mənbə "Gündəm Xəbər"ə belə deyir. Bu isə Ramiz Mehdiyevə dörd müavinin təyin edilməsi heç də əsassız olmadığını göstərir. Yeri gəlmişkən, Ramiz Mediyevin özünün də müxtəlif üsullarla baş verə biləcək olayların qarşısını almaq cəhdlərində bulunması, həmçinin zaman-zaman belə məsələlər gündəmə gələndə Rusiyaya səfər etməsi, mətbuata müxtəlif açıqlamalar verməsi, yaxud əksinə Rusiyada yaranan "Milyarderlər İttifaqının" Bakıya qarşı aqresiv mövqeydə dayanması "boz kardinal"la bağlı məlum planın mövcudluğundan xəbər verir.
Hakimiyyətdaxili mənbənin sözlərinə görə, hazırda Ramiz Mehdiyevin postuna iki iddialı var. Bunlar İlham Əliyevin çevrəsinə daxil olduğu iddia edilən Zeynal Nağdəliyev və Əli Əsədovdur. Mənbə bildirib ki, hər iki şəxs özünü Ramiz Mehdiyevin postuna layiq bilir və "boz kardinal"ın yola salınmasını gözləyir. Mənbənin sözlərinə görə, Əli Əsədov və Zeynal Hağdəliyev hətta bu iddialarını da gizlətmirlər.

Paşayevlərdən Ramiz Mehdiyevə tələ

Prezident Administraasiyasının rəhbəri Ramiz Mehdiyevə Paşayevlərə hələ bir neçə il əvvəl tələ qurublar. Sonda bu tələ PA-da yeni dəyişikliklər oldu.
Hələ YAP-ın siyahısı açıqlanmamışdan əvvəl Ramiz Mehdiyevlə Paşayevlər arasında ciddi qarşıdurma yaranmışdı. Paşayevlər "gəncləşmə siyasəti" ideyasını ortaya ataraq Milli Məclisi Ramiz Mehdiyevin nəzarətində olan YAP-ın öndə gedən simalarından xilas etmək və parlamentə nəzarəti ələ keçirməyə çalışırdılar. Ramiz Mehdiyev bir müddət Paşayevlərə dirəniş göstərə bilsə də, nəhayət, onlara müəyyən güzəştlərə getməyə razı oldu. YAP-ın siyahısına gənclərin də adı daxil edildi. Lakin Ramiz Mehdiyev gənc namizədləri elə dairələrə saldı ki, onlar biabırçı məğlubiyyətə məhkum oldular. Məsələn, "İrəli" Gənclər Hərəkatının rəhbəri Ceyhun Osmanlının namizədliyi 63 saylı Sabirabad birinci seçki dairəsindən irəli sürüldü. Ramiz Mehdiyev güman edirdi ki, Ceyhun Osmanlının bu dairədə qələbə qazanacağını üfüqdə belə görünmür. Çünki bu adam bəlkə ömründə bir dəfə də olsun Sabibaradda olmamışdı. Həmçinin bu rayonda müxalifət kifayət qədər güclü idi. O vaxt təbii fəlakətdən sonra isə Sabirabadda narazıların sayı birə-beş artmışdı. Bu halda Ceyhun Osmanlı kimi cəmiyyətdə o qədər də tanınmayan, Sabibarada bələd olmayan bir şəxsin bu rayonda səs alması mümkünsüz görünürdü. PA rəhbərinin belə cızdığı planları kifayət qədər olub. Mənbə deyir ki, amma buna baxmayaraq Paşayevlər bu gün əzəli rəqibləri Ramiz Mehdiyevi sıxışdıra biliblər. Ancaq bu da kifayət deyil. Çünki Ramiz Mehdiyev hakimiyyət üçün son anda təhlükəli ola bilər. Elə bu təhlükələrdən qorunmaq məqsədilə İlham Əliyev hakim ailəyə yaxın adamlarını Ramiz Mehdiyev ətrafında toplayıb. PA-da son yeniliklərə diqqət etdikdə Paşayevlər əslində Ramiz Mehdiyevin "təhlükəli siyasəti"ni heçə endirib. 2013 prezident seçkisində isə PA rəhbəri bundan Paşayevlərə əks-arqument kimi istifadə edərək hücuma keçəcəyi gözləniləndir. Yəni, Ramiz Mehdiyev PA-dakı yeniliklərin uğursuz addım olduğunu sübut etmək üçün onların uğursuzluqlarını nümunə gətirəcək.

Fuad