Sabiq millət vəkilinə “sussan azad olunacaqsan” deyilib; Gülər Əhmədova azadlığın astanasında
Ölkə gündəminin əsas mövzularından biri də sabiq millət vəkili Gülər Əhmədobavın məhkəmə prosesidir. Xatırladaq ki, artıq məhkəmə istintaqı yekunlaşıb və prokuror ittiham olunan şəxsə şok sayıla biləcək qədər yüngül cəza – 4 il iş verilməsini tələb edib. Halbuki, Gülər Əhmədovanın ittiham olunduğu maddələr üzrə ona ən azından 7 il işin veriləcəyi proqnozlaşdırılırdı. Unutmayaq ki, məhkəmələrdə belə bir yazılmamış qanun da var ki, bir qayda olaraq hakim prokurorun tələb etdiyi müddətdən daha az cəza kəsir. Belə olan halda Gülər Əhmədovaya 3 il və ya daha az işin veriləcəyini proqnozlaşdırmaq mümkündür. Bu isə bəzi şübhələrin yaranmasına yol açır. Bu haqda bir qədər sonra…
İndi isə sonuncu məhkəmə prosesində baş verənlərə qısa bir nəzər yetirək. Qeyd edək ki, hakim Əlisultan Osmanovun sədrliyi ilə keçirilən prosesdə Gülər Əhmədovanın vəkili Əfsər Talıbov vəsatətlə çıxış edərək Elşad Abdullayevin ofisdən qanunsuz istifadə etdiyini, çəkilişləri qanunsuz apardığını deyib: “O, müxtəlif insanları şantaj etmək üçün gizli çəkiliş aparıb.
O daha sonra bildirib ki, videolarla bağlı ekspertiza rəyində də ziddiyyətlər var. Bir yerdə yazıblar ki, sinxronluq pozulub, digər yerdə yazıblar ki, pozulmayıb. Videonun nə zaman çəkildiyi də ekspertiza tərəfindən dəqiqləşdirilməyib. Videonun tam versiyası istintaqa təhvil verilməyib: “Elşad Abdullayev qanunu pozaraq, Gülər Əhmədova haqqında yalan məlumat verdiyi, KİV-də şər-böhtan xarakterli məlumatlar yaydığı üçün onun əməlinə məhkəmə tərəfindən hüquqi qiymət verilməsini xahiş edirəm. Həmçinin qanunsuz görüntü əldə etdiyi üçün həmin məsələyə də hüquqi qiymət verilsin. Xahiş edirəm, ekspert məhkəməyə dəvət olunsun və ziddiyyətli məlumatlar araşdırılsın”.
Dövlət ittihamçısı Eldar Həmzəyev isə bildirib ki, videolarla bağlı vəsatət təmin oluna bilməz, çünki həmin məsələ ilə bağlı cinayət işinin başladılması istintaq orqanı tərəfindən rədd olunub. Prokuror onu da deyib ki, ekspertiza ilə bağlı şübhə olmadığı üçün bu vəsatət də rədd olunmalıdır.
Daha sonra çıxış edən Gülər Əhmədovanın bildirib ki, Elşad Abdullayevin bacısı oğlundan dayısının videoların tam versiyasını göndərməsini xahiş edib: “Lakin o göndərməyib. Bakıda Gülər Əhmədova adında bir çox insan var. Belədirsə, onlardan birini tutun, məni çıxarın burdan. Videolar əsl deyil, ekspertiza da dolaşıq rəy verib. Deyir, montaj olunmayıb amma sinxron pozulub. Bir formatdan başqa formata köçürülüb. Montajın buynuzu olur? Mən əvvəldən demişəm, o videonu qəbul etmirəm. Kimin ixtiyarı var, prezidentin fərmanını, Konstitusiyanı pozmağa? Oyun oynayırlar. Bu adam siyasi akrobatika ilə məşğuldur. Saxta videonu əsas götürüb, məni həbs ediblər, ekspertiza keçiriblər. Dünyanın hansı yerində əsli olmayan video sübut kimi götürülür? Deyir, videoda söyüş var, ona görə yaymıram. Bəli, söyüş var. Burda hamının 18 yaşı tamam olub. Qorxur ki, prokurorluğun tərbiyəsini pozar? Mən buna məəttəl qalmışam. Elşad kimdir axı? O videonun əslini ortaya çıxara bilməz. Əslində nə var, o da bilir, mən də. Ölsəm də, batsam da, o videonu qəbul etməyəcəyəm. Siz qəbul edirsiniz, özünüz bilərsiniz. Elşad bilir, orda kimin dalınca danışıb və nə cavabı alıb. Ona görə əslini göstərmir. Buna görə qadın xeylağını həbsdə saxlayarlar? Mənim günahım nədir axı? Bu adam yeddi il kimi gözləyib? Zakir Qaralov da açıqlamasında deyib ki, əvvəlcə Elşad Abdullayev gəlməlidir. Mən Milli Məclisdə oturan adam idim, gələrdin evimə, iş yerimə ki, sənə bir milyon pul vermişəm. Çünki sən də, Sevinc də yaxşı bilirdiniz ki, pulun haradadır. Biri ölüb, o biri də Fransada oturub. Bunu Allah götürməz. Mən onsuz da hər kəsi Allaha tapşırmışam. Ekspertiza artimulyasiya məsələsini də araşdırmayıb, halbuki bu, çox vacib məsələdir”.
Bunun ardınca məhkəmə istintaqının yekunlaşdığı elan olunub və prosesdə çıxış edən dövlət ittihamçısı Eldar Həmzəyev G. Əhmədovanın 4 il müddətinə azadlıqdan məhrum edilməsini istəyib. Prokuror bildirib ki, ittihama əsasən, Gülər Əhmədova Cinayət Məcəlləsinin 178.3.2 (etibardan sui-istifadə etməklə özgənin külli miqdarda əmlakını ələ keçirmə) və 307.2-ci (qabaqcadan vəd etmədən ağır cinayəti gizlətmə) maddələri ilə təqsirləndirilməlidir.
Əlavə olunub ki, onun himayəsində azyaşlı uşaq olması, ictimai fəaliyyəti, parlamentin 3 çağırış deputatı olması yüngülləşdirici hal kimi nəzərə alınmalı, həmçinin vurulan maddi ziyanın məbləği məhkəmə tərəfindən müəyyən olunmalıdır.
Baş verənlərlə bağlı Savash.org-u məlumatlandıran mənbənin sözlərinə görə, artıq Gülər Əhmədovanın azadlığa buraxılması məsələsi tam olaraq dəqiqləşib: “Hadisələrin hələ ilkin vaxtlarında belə, hakimiyyətin Gülər Əhmədovanı həbs etmək niyyəti olmayıb. Sadəcə olaraq, medianın məsələni ictimailəşdirməsindən sonra onun həbsi qaçılmaza çevrildi. Bu zaman isə Gülər Əhmədovanın hakimiyyətdəki himayədarları ikinci planı işə saldılar. O həbsə salındı, obyektiv istintaq görüntüsü yaradıldı və bununla da məsələnin ictimai maraqlıllığı bir qədər azaldıldı. İndi isə prokurorun 4 il iş istəməsi də belə düşünməyə əsas verir ki, Gülər Əhmədova hüquqi prosedurun imkan verdiyi variantların biri ilə azadlığa buraxılacaq”.
Mənbənin sözlərinə görə, həbsxanada olan Gülər Əhmədovaya təklif olunub ki, bəzi məqamlarla bağlı sussun və bunun müqabilində azadlığına qovuşacaq. Tərəflərin məxfi anlaşma şərtləri içərisində olduğunu iddia edən mənbəmiz bildirir ki, artıq bütün proses Gülər Əhmədovanın azadlığa buraxılmasına aparır.
Maraqlıır, bəs bu variantlar hansılar ola bilər? Gülər Əhmədovanın azadlığa çıxması üçün hansı oyun səhnələşdiriləcək? Təbii ki, bununla bağlı müxtəlif versiyalar irəli sürmək mümkündür. Birinci variant ondan ibarət ola bilər ki, prokurorun 4 il iş istəməsi və məhkəmənin bundan az iş verməsi ilə o şərti işlə azadlığa buraxıla bilər. Digər bir versiya isə belədir: Həmçinin o artıq bir ildir ki, həbsdədir və hətta üçdə birlə də azad olunar.
Xatırladaq ki, fəaliyyəti dayandırılmış Azərbaycan Beynəlxalq Universitetinin sabiq rektoru Elşad Abdullayevin ötən ilin sentyabrında yaydığı qalmaqallı videodan sonra Gülər Əhmədova mandatından imtina edib. Fevralın 13-də isə G. Əhmədova barəsində həbs-qətimkan tədbiri seçilib. Bundan sonra həmin müddət iki dəfə artırılıb.
G. Əhmədova Cinayət Məcəlləsinin 178.3.2-ci (etibardan sui-istifadə etməklə özgənin külli miqdarda əmlakını ələ keçirmə) və 307.2-ci (qabaqcadan vəd etmədən ağır cinayəti gizlətmə) maddələri ilə təqsirləndirilir.