Sonuncu seçkilərin PA-da təhlili nazirin yola salınması qərarını qətiləşdirib

Prosses uzun müddətdir ki, başlayıb. Artıq hakimiyyətdə gənclər və idman naziri ilə bağlı siyasi iradə də ortadadır. Nazirin əksər səlahiyyətləri əlindən alınıb. Gənclərlə bağlı bir sıra layihələrə onun müavini İntiqam Babayev nəzarət edir. Aldığımız məlumatlara əsasən Azad Rəhimova qarşı siyasi qərar bir neçə ildir ki, vverilsə də, sonuncu dəfə 2012-ci ildə Bakı dünyaca məşhur musiqi yarışmasına, «Eurovision»a ev sahibliyi etdiyi dönəmlərdə qərarın icrası ertələnib.

Lakin nazirin biznes imkanları sürətlə məhdudlaşdırılır. Konkret olaraq Azad Rəhimovun biznesinə şərik olan bir neçə nəfər artıq hissələrinə sataraq geri çəkilib. Biznesdə tərəfdaşları olmadığından Azəd Rəhimov da çətin duruma düşüb. Daxil olan ən son məluatlarda bildirilir ki, Azad Rəhimova aid olduğu iddia edilən mağazalar paytaxtın mərkəzindən köçürüləcək. Belə ki, məşhur xarici brendlərin Bakıda satışını həyata keçirən mağazaların icarə müddəti bitdiyindən yeni açılan “28 Mall”da yerləşəcəyi deyilir. Qeyd edək ki, bahalı butiklərin əksəriyyəti “Nizami” kinoteatrı yaxınlığında cəmlənib. Mağazaların nəqliyyatın sıx olduğu 28 May küçəsində yerləşməsi isə bir başqa problemə səbəb olub. Belə ki, mağazalara alış-verişə gələn müştərilərin avtomobillərini ensiz küçədə saxlaması, ərazidə heç bir dayanacağın olmaması günün bütün saatında şəhərin mərkəzində böyük tıxacların yaranmasına səbəb olub.

Bir başqa məlumatda isə deyilir ki, mağazaların köçürülməsi icarə müddətinin bitməsi ilə yox, prezidentin vaxtilə “Nizami” kinoteatrının təmirdən sonra açılış etdiyi zaman verdiyi göstərişlə bağlıdır. Qeyd edək ki, ölkə başçısı İlham Əliyev kinoteatrın açılışında iştirak edən zaman ərazidəki butiklərin yeni açılan ticarət mərkəzilərində yerləşməsinin daha məqsədəuyğun olması ilə bağlı göstəriş verib. A.Rəhimov nazir postuna gətirilməzdən qabaq biznes fəaliyyəti ilə məşğul olub. Onun biznesinin əsasını mebel ticarəti təşkil edib. A.Rəhimov hələ o vaxtlar Avropanın tanınmış mebel brendlərinin ölkəmizdə satışını həyata keçirib. Ayrı-ayrı məmurların, biznesmenlərin sifarişini yerinə yetirən Azad Rəhimov daha sonra Bakıda “İtaldizayn” şirkətini açıb.
Nazirin ilk şirkəti Bakıda 1996-cı ildə İtaliyanın dəbli mətbəx avadanlıqlarını Azərbaycana gətirməklə fəaliyyətə başlayıb. 1998-2006-cı il tarixinədək “İtaldizayn” Qapalı Tipli Səhmdar Cəmiyyətin baş direktoru vəzifəsində işləyən Azad Rəhimov bu müddətdə nazirlərin sifarişi ilə Azərbaycana mebel gətirib. “İtaldizayn” şirkətinə şəhərin mərkəzində yerləşən 22 salon və butik daxildir: “İdea”, “Creative System”, iki “Villeroy & Boch” butik və salonu, “Bang & Olufsen”, “Ambiance”, dörd “Swarovski” butiki, “Royal Collection”, “Royal Collection - Watches & Accessories”, “Yves Delorme”, “Baccarat - Bernardaud”, “Museum”, “Chopard”, “Carpets Boutique”, “Lladro”, “Roberto Coin - de Grisogono”; iki “Eurodesign” və “Transeurocom” telekommunikasiya şirkəti; “İD Catering” keyterinq şirkəti və “Creacon” inşaat şirkəti.
Hazırda nazirə məxsus olduğu deyilən holdinqin prezidenti Elçin Zeynalov olsa da, bütün maliyyə hesabatlarını nazirin köməkçisi Fuad Hadıyev aparır.
Azərbaycan Gənclər və İdman Nazirliyinin xətti ilə, dövlət investisiyaları tərəfindən həyata keçirilən layihələr üzərində nəzarət olduqca vacibdir. Buna səbəb isə Azad Rəhimovun əvvəlki illərdə həyata keçirdiyi (dövlət vəsaitləri hesabına!) layihələrdə korrupsiya ehtimalının yüksək olması və nəticədə projelərin keyfiyyətsiz reallaşmasıdır. Bunu qəzetimizə adının çəkilməsini istəməyən qaynaq bildirib.
Mənbəmiz çoxsaylı faktlara əsaslanaraq hesab edir ki, ölkədə ən uğursuz layihələr həyata keçirən dövlət qurumlarından biri də Gənclər və İdman Nazirliyidir. "Əvvəla, hər il qurumun tikdirdiyi olimpiya komplekslərinin effektiv olmadığı tənqid mövzusu olsa da, bu istiqamətdə ayrılan xərclər daha da şişir. Bu da Rəhimovun rəhbərlik etdiyi sahədə mənimsəmələrin olduğuna dair KİV-in yazdıqlarının və müstəqil ekspert rəylərinin əsassız olmadığını ortaya qoyur. Eyni zamanda başqa bir çox faktlar da var ki, Gənclər və İdman Nazirliyinin dövlət vəsaiti hesabına il ərzində həyata keçirdiyi və ya həyata keçirməyə davam etdiyi layihələrə ayrılan pulların taleyindən ciddi narahatlıq keçirməyə əsas verir".
Xatırladaq ki, bu il Rəhimovun nazirliyinə 2014-cü ildə ölkənin idman hazırlığına əsaslı vəsait qoyuluşundan 336 milyon 421 min manat ayrılması proqnozlaşdırılıb. Araşdırmalar nəticəsində bəzi layihələr barədə bilgilər əldə etmişik:

- Bakı şəhərində Su İdman Sarayının layihələndirilməsi və tikintisi üçün 40 milyon manat, Prezidentin Ehtiyat Fondundan isə 5 milyon manat ayrılıb.
- Gimnastika Kompleksinin tikintisinə cari ildə 30 milyon manat yönəldiləcək. 2008-ci ildən 2012-ci ilədək 56,4 milyon manat artıq xərclənib.
- Tofiq Bəhramov adına Respublika Stadionunun əsaslı təmiri və yenidən qurulmasına qoyulan vəsait 80 milyon manata yaxınlaşıb.
Olimpiya Komplekslərinə gəlincə, aşağıdakı rayonlar üzrə vəsait ayrılıb:
- Qax rayonunda Olimpiya İdman Kompleksinin tikintisinə 4 milyon manat, 2008-2012-ci illərdə 7,3 milyon manat;
- Şirvan şəhərində Olimpiya İdman Kompleksinin tikintisinə 6,6 milyon manat. Cari il 7,5 milyon manat xərclənib.
- Göygöl şəhərində kompleks tikintisinə ötən il də daxil olmaqla 13,2 milyon manat;
- Xaçmaz rayonunda İdman Kompleksinin tikintisinə 4,2 milyon manat. Ötən ilə isə 9 milyon manat;
- Abşeron rayonunda Olimpiya İdman Kompleksinin tikintisinə 3,5 milyon manat;
- Ağcabədi rayonunda Olimpiya İdman Kompleksinin tikintisinə 3,5 milyon manat;
- Tərtər, Neftçala, Goranboy rayonlarında Olimpiya İdman Komplekslərinin hər birinin tikintisinə 1 milyon manat;
- Lənkəran Olimpiya İdman Komplekslərinin yenidən qurulmasına 2,5 milyon manat;
- Respublika İdman Tibb Mərkəzinin tikintisinə isə 5 milyon manat ayrılması nəzərdə tutulub.
Bundan əlavə, "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nın həyata keçirilməsi ilə bağlı layihə-smeta sənədlərinin hazırlanması və tikintisi xərcləri üçün GTN-yə 4,7 milyon manat ayrılıb.
"Azərbaycan Gəncliyi 2011-2015-ci illərdə Dövlət Proqramı"nın həyata keçiriliməsi ilə bağlı hələ ki, 8 milyon manat nəzərdə tutulub. Qeyd edək ki, bu vəsaitlə gənclərə evlərin tikintisi planlaşdırılır.
Lakin yuxarıda sadalanan layihələrlə bağlı nə əvvəlki illərə, nə də cari ilə dair hər hansı bir detallı bilgilər əldə etmək mümkün deyil. Məlumatlara əsasən Azad Rəhimovun rəhbərlik etdiyi struktur bütün bunların heç biri barədə Hesablama Palatasına tələb olunan sənədləri təqdim etməyib.
Mənbəmiz yaxın keçmişlə bağlı bir neçə fakta əsaslanaraq, 336 milyon manatdan artıq dövlət vəsaitinin Gənclər və İdman Nazirliyi tərəfindən tamamilə təyinati üzrə xərclənəcəyinə ciddi şübhə edir: "Məsələn, Bakı milyonçusu Murtuza Muxtarovun 1911-12-ci illərdə cəmi iki ilə tikdirdiyi və son illərə qədər Səadət sarayı kimi tanınan paytaxtın ən gözəl binalarından birinin təmir-bərpasını xatırlayaq. Bu işi Azad Rəhimov şəxsi nəzarəti altında saxlayıb, proses 7 ilə yaxın davam edib, külli miqdarda dövlət vəsaiti xərclənib. Bu qədər uzunmüddətli təmir-bərpanın özü korrupsiya barədə şübhələnməyə əsas verirdi. O dövrdə mətbuat yazdı ki, Gənclər və İdman Nazirliyinin əvvəlki tender siyahısından belə məlum olur ki, sarayda bərpa işlərini "Sehrbaz" layihə-tikinti şirkəti aparıb. Bildirilirdi ki, bu şirkət gənclər və idman naziri Azad Rəhimova məxsusdur. Sarayda bərpa işlərini bu şirkətə tendersiz verdilər. Həmin şirkət də nazirliyin binasında yerləşir. Lakin sonradan təmir işlərini Almaniyaya məxsus olduğu deyilən şirkət aparmağa başladı. "Sehrbaz" şirkəti milyonları yedikdən sonra guya sarayda yeni üslub yaratmaq üçün yenidən vəsait ayırdılar. Əslində hər iki şirkət nazirə məxsus idi. Eyni zamanda burada çalışan əcnəbi fəhlələrin maaşı verilmədiyi də bildirilirdi. Bütün bunlar sarayın təmir-bərpasında ciddi maxinasiyalardan danışanların sözlərində həqiqət payının çox olduğunu söyləməyə kifayət edir. Və yaxud, 40 milyon manata təmir edilən Tofiq Bəhramov adına Respublika stadionunda açılışdan üç ay sonra problemlər yaranması, - məsələn, media sektorundakı plitələrin çökməsi! - Rəhimovun nazirliyinin iri pullar hesabına həyata keçirdiyi layihələri necə bitirdiyinin əyani təsdiqidir. Bütün bunlardan sonra gənclər və idman nazirinin bu ilki dövlət investisiyaları ilə necə rəftar etdiyi narahatlıq yaratmaya bilməz. Hesablama Palatası bu nazirliyin həyata keçirdiyi layihələrin auditini gecikmədən və ciddi şəkildə həyata keçirməlidir".
Çox maraqlıdır ki, Azad Rəhimovun rəhbərlik etdiyi qurumun hələ bir neçə il bundan əvvəl siafriş etdiyi qurumların inşa etdiyi Daşkəsən və İmişli Olimpiya Komplekslərində də ciddi şəkildə nöqsanlar aşkarlanıb. Maraqlıdır ki, bütün bunlarla bağlı olaraq dəfələrlə əlaqədar qurumlara məlumatlar vverilsə də, hər halda bu məlumatlar rəsmi qurumlar tərəfindən araşdırılır. Lakin aparılan araşdırmaların yekun olaraq nəticələri açıq saxlandığından hər hansı ətraflı bilgilər əldə etmək mümkün deyil.
Azad Rəhimovun tezliklə işini itirməsini şərtləndirən digər bir amil isə sonuncu prezident seçkiləridir. Sonuncu prezident seçkiləri dövründə hakimiyyətə yaxın olan və illərdir ki, böyük layihələr hesabına formalaşdırılan gənclər təşkilatları lazımi səviyyədə fəaliyyət göstərə bilməyib. Hətta sosial şəbəkələrdə hakimiyyətə yaxın olan gənclər təşkilatlarının zəif fəaliyyəti də nəticə etibarilə Azad Rəhimovun adına çıxılıb. Onun rəqiblərinin ciddi şəkildə Prezident Adminstrasiyasına dosyelər yolladığı söylənilir. Məlumatlara əsasən gələn ildən etibarən PA-da dövlətin həyata keçirdiyi gənclərlə bağlı yeni strateji plan hazırlanacaq və bu dövlət proqramının icrasına başlandıqdan sonra isə Azad Rəhimo işini itirəcək.

AZƏR