Gənclər sektorunda nurçuları dəstəkləyən gənclər nazirinə qarşı ağır zərbə

Prezident Administrasiyasının siyasi təhlil şöbəsinin rəhbəri Elnur Aslanovun işindən uzaqlaşdırılmasından sonra bu “təmizləmələr”in ardının gələcəyi gözlənilən idi. Gözlənilirdi ki, Elnur Aslanovla birgə fəaliyyət göstərən gənclər sektorunda da mühim dəyişikliklər baş verəcək. Hətta millət vəkili Ceyhun Osmanlının, “İrəli” İctimai Birliyinin bir sıra üzvlərinin də “vurulacağı”na dair informasiya və ehtimallar var idi. Lakin onların ən böyük himayədarı olan gənclər və idman naziri Azad Rəhimovun da işini itirməsi ilə bağlı olaraq məlumatlar mətbutda çox az halda rast gəlinirdi. Məsələ burasındadır ki, Azad Rəhimovun sıradan çıxarılması prosesi ilə bağlı olaraq ortada olan tendensiyalar da kifayət qədər arqumentlərlə əks olunrdu. Məlumatlara əsasən, xüsusilə idman malları biznesi istiqamətində Azad Rəhimovun sıradan çıxarılması prosesi həyata keçiriləcəkdi. Məsələ burasındadır ki, bununla bağlı olaraq ortada olan əsas faktorlardan biri də məhz bununla bağlı idi ki, Azad Rəhimov konkret olaraq nurçuların gənclər sektorundakı şəbəkəsinin başında dayanır. Və artıq “Gündəm xəbər”ə Azad Rəhimovun “vurulması” prosesinin başlanması ilə bağlı informasiyalar daxil olmaqdadır. Aldığımız bilgilər hələ ki, nazirin biznes imperiyasının sürətlə əlindən alınmasına dairdir. İdman malları sektorunda nazirin sürətlə sıxışdırılıb çıxarıldığına dair çox mötəbər informasiyalar yayılır. Xəbərə əsasən, nazirin biznes imkanları sürətlə məhdudlaşdırılır. Konkret olaraq Azad Rəhimovun biznesinə şərik olan bir neçə nəfər artıq hissələrini sataraq geri çəkilib. Biznesdə tərəfdaşları olmadığından Azəd Rəhimov da çətin duruma düşüb. Daxil olan ən son məlumatlarda bildirilir ki, Azad Rəhimova aid olduğu iddia edilən mağazalar paytaxtın mərkəzindən köçürüləcək. Belə ki, məşhur xarici brendlərin Bakıda satışını həyata keçirən mağazaların icarə müddəti bitdiyindən yeni açılan “28 Mall,”da yerləşəcəyi deyilir. Qeyd edək ki, bahalı butiklərin əksəriyyəti “Nizami” kinoteatrı yaxınlığında cəmlənib. Mağazaların nəqliyyatın sıx olduğu 28 May küçəsində yerləşməsi isə bir başqa problemə səbəb olub. Belə ki, mağazalara alış-verişə gələn müştərilərin avtomobillərini ensiz küçədə saxlaması, ərazidə heç bir dayanacağın olmaması günün bütün saatında şəhərin mərkəzində böyük tıxacların yaranmasına səbəb olub.
Bir başqa məlumatda isə deyilir ki, mağazaların köçürülməsi icarə müddətinin bitməsi ilə yox, prezidentin vaxtilə “Nizami” kinoteatrının təmirdən sonra açılış etdiyi zaman verdiyi göstərişlə bağlıdır. Qeyd edək ki, ölkə başçısı İlham Əliyev kinoteatrın açılışında iştirak edən zaman ərazidəki butiklərin yeni açılan ticarət mərkəzilərində yerləşməsinin daha məqsədəuyğun olması ilə bağlı göstəriş verib. A.Rəhimov nazir postuna gətirilməzdən qabaq biznes fəaliyyəti ilə məşğul olub. Onun biznesinin əsasını mebel ticarəti təşkil edib. A.Rəhimov hələ o vaxtlar Avropanın tanınmış mebel brendlərinin ölkəmizdə satışını həyata keçirib. Ayrı-ayrı məmurların, biznesmenlərin sifarişini yerinə yetirən Azad Rəhimov daha sonra Bakıda “İtaldizayn” şirkətini açıb. Nazirin ilk şirkəti Bakıda 1996-cı ildə İtaliyanın dəbli mətbəx avadanlıqlarını Azərbaycana gətirməklə fəaliyyətə başlayıb. 1998-2006-cı il tarixinədək “İtaldizayn” Qapalı Tipli Səhmdar Cəmiyyətin baş direktoru vəzifəsində işləyən Azad Rəhimov bu müddətdə nazirlərin sifarişi ilə Azərbaycana mebel gətirib. “İtaldizayn” şirkətinə şəhərin mərkəzində yerləşən 22 salon və butik daxildir: “İdea”, “Creative System”, iki “Villeroy & Boch” butik və salonu, “Bang & Olufsen”, “Ambiance”, dörd “Swarovski” butiki, “Royal Collection”, “Royal Collection - Watches & Accessories”, “Yves Delorme”, “Baccarat - Bernardaud”, “Museum”, “Chopard”, “Carpets Boutique”, “Lladro”, “Roberto Coin - de Grisogono”; iki “Eurodesign” və “Transeurocom” telekommunikasiya şirkəti; “İD Catering” keyterinq şirkəti və “Creacon” inşaat şirkəti.
Hazırda nazirə məxsus olduğu deyilən holdinqin prezidenti Elçin Zeynalov olsa da, bütün maliyyə hesabatlarını nazirin köməkçisi Fuad Hadıyev aparır. Azərbaycan Gənclər və İdman Nazirliyinin xətti ilə, dövlət investisiyaları tərəfindən həyata keçirilən layihələr üzərində nəzarət olduqca vacibdir. Buna səbəb isə Azad Rəhimovun əvvəlki illərdə həyata keçirdiyi (dövlət vəsaitləri hesabına) layihələrdə korrupsiya ehtimalının yüksək olması və nəticədə projelərin keyfiyyətsiz reallaşmasıdır. Bunu qəzetimizə adının çəkilməsini istəməyən qaynaq bildirib.
Mənbəmiz çoxsaylı faktlara əsaslanaraq hesab edir ki, ölkədə ən uğursuz layihələr həyata keçirən dövlət qurumlarından biri də Gənclər və İdman Nazirliyidir. “Əvvəla, hər il qurumun tikdirdiyi olimpiya komplekslərinin effektiv olmadığı tənqid mövzusu olsa da, bu istiqamətdə ayrılan xərclər daha da şişir. Bu da Rəhimovun rəhbərlik etdiyi sahədə mənimsəmələrin olduğuna dair KİV-in yazdıqlarının və müstəqil ekspert rəylərinin əsassız olmadığını ortaya qoyur. Eyni zamanda başqa bir çox faktlar da var ki, Gənclər və İdman Nazirliyinin dövlət vəsaiti hesabına il ərzində həyata keçirdiyi və ya həyata keçirməyə davam etdiyi layihələrə ayrılan pulların taleyindən ciddi narahatlıq keçirməyə əsas verir”.
Rüfət ƏLİCANLI