İstanbuldakı şok cinayət dalğası Bakıya doğru gəlir
Türk polisi Dövlət Gömrük Komitəsinin və bankların çirkli pulların yuyulmasında iştirakını sübut edə bilsə, həbs dalğası Azərbaycanı da bürüyəcək; Qarsda həbs edilən Sədərək gömrüyünün rəisi Mirməhəmməd Seyidov Binəqədinin sabiq prokuroru Mirələkbər Seyidovun qardaşıdır və onun adı Elşad Abdullayevin işində keçir
Dekabrın 17-də Türkiyəni silkələyən şok həbs dalğasının bir ucu da Azərbaycanı vurub. Xəbər verildiyi kimi, Türkiyə polisinin Qaçaqmalçılıq və Mütəşəkkil Cinayətkarlıqla Mübarizə İdarəsinin əməkdaşları Naxçıvanla sərhəddəki Dilucu sərhəd-keçid məntəqəsində irimiqyaslı əməliyyat keçirib. Musavat.com Türkiyə qaynaqlarına istinadən xəbər verir ki, yüzlərlə polisin iştirak etdiyi əməliyyat zamanı 17 gömrük məmuru, o cümlədən Sədərək gömrük xidmətinin rəisi Mirməhəmməd Seyidov həbs edilib.

Türkiyə mətbuatı yazır ki, Dilucu sərhəd-keçid məntəqəsində keçirilən əməliyyat İstanbulda 3 nazir oğlu da daxil olmaqla, 50-dən çox məşhur iş adamının və yüksək vəzifəli məmurun həbs edilməsi əməliyyatının bir hissəsi olub. Dekabrın 17-də səhər saatlarında başlayan əməliyyat Naxçıvan gömrüyünün əsas strukturlarından birinin - Sədərək gömrüyünün rəisinin həbs olunması ilə müşayiət olunub.



Xəbərlərə görə, Mirməhəmməd Seyidov İstanbuldan təyyarə ilə Qarsa uçub və Qars aeroportunda təyyarədən enəndə onu yerli polisin mütəşəkkil cinayətkarlıqla mübarizə idarəsinin əməkdaşları “qarşılayıb”. Əlləri qandallanan gömrük rəisi dindirilmək üçün Qars polis idarəsinə aparılıb. Polisdən gömrük rəisinin həbsi ilə bağlı açıqlama verilməyib, ancaq hüquq-mühafizə orqanlarındakı mənbələrdən bildirilib ki, Seyidov Qars gömrük məmurlarına rüşvət verilməsi, qaçaqmalçılıq və korrupsiya cinayətlərinə görə saxlanılıb.
Türkiyə mənbələri xəbər verir ki, Əmniyyət Qaçaqmalçılıq və Mütəşəkkil Cinayətkarlıqla Mübarizə Şöbə Müdirliyinin əməliyyatçıları 1 ilə yaxındır Mirməhəmməd Seyidov da daxil olmaqla, Naxçıvanla sərhəddəki gömrük məntəqəsində işləyənləri izləyirmiş. Həbs olunanların telefon danışıqları dinlənilib və hərəkətləri izlənilib. Seyidovun İstanbula hansı məqsədlə getdiyi məlum deyil. Ancaq istisna deyil ki, gömrük rəisinin Türkiyəyə hansısa iş üçün dəvət edilməsi onun həbsi üçün qurulmuş əməliyyatın bir hissəsi olub.
M.Seyidovla bağlı veteninfo.az saytında maraqlı informasiya yer alıb.

Sayta daxil olan məlumatda qeyd edilir ki, Mirməhəmməd Seyidov son günlər ölkə mətbuatının əsas xəbərinə çevrilmiş Elşad Abdullayevlə bağlı qalmaqallarda adı hallanan Mirələkbər Seyidovun (Binəqədi rayonunun keçmiş prokuroru) qardaşıdır.
Digər bir məlumatda isə bildirilir ki, Mirməhəmməd Seyidov Türkiyənin İğdır vilayətində həbs olunan zaman yanında ailə üzvləri də olub.

Məlumata görə, Mirməhəmməd Seyidov “İğdır turizm” firmasının sahibi Turqay Arasla kirvə olmaqla bərabər, eyni zamanda onlarla şirkətə sahibdir.

Məhz bu şirkətlər vasitəsilə Rza Zərrabın qızılları, İrandan qara para qeyri-qanuni yolla Türkiyəyə daşınıb.

O da maraqlıdır ki, hazırda Ağır Cinayətlərə Dair İşlər üzrə Məhkəmədə Mirələkbər Seyidovun Elşad Abdullayevin işi ilə bağlı məhkəməsi davam edir.

Uzun illərdir Naxçıvandakı Sədərək gömrüyü qaçaqmalçılığın, rüşvətin, korrupsiyanın və özbaşınalığın tüğyan etdiyi məkan olaraq qalır. Sədərək gömrüyü Azərbaycandan Türkiyəyə benzin və dizel yanacağı qaçaqmalçılığı üçün əsas məntəqə olub. Bu məntəqədə heç bir qanun işləməyib və rüşvət verməkdən imtina edən iş adamları döyülüb, oğurlanıb, malları müsadirə olunub və həbs edilib. Həmçinin Sədərək gömrüyündən İrana qarşı beynəlxalq sanksiyaların “dəlinməsi” üçün istifadə edildiyi barədə WikiLeaks tərəfindən yayılan Amerika diplomatik teleqramlarında geniş bəhs edilirdi. Başqa sözlə, Sədərək gömrüyü beynəlxalq qaçaqmalçılıq məntəqəsi kimi fəaliyyət göstərib.

İşin digər ilginc tərəfi budur ki, Naxçıvan gömrüyünün korrupsioner məmurunu Türkiyədə həbs edirlər. Bu, azərbaycanlı korrupsionerlərin ölkə sərhədlərindən kənarda, başqa ölkədə həbsinə dair ilk nümunədir. İndi Azərbaycan tərəfinin bu həbsə necə reaksiya verəcəyi maraqla gözlənilir.



Türkiyədəki qaynaqlardan “Yeni Müsavat”a verilən məlumata görə, bu məsələdə Azərbaycanda da böyük həbslər ola bilər. Türkiyə mənbələrinin və mətbuatının iddialara görə, Güney Azərbaycan kökənli iş adamı Rza Zərrab İranın 100 milyard avro çirkli parasını yuyub. Məsələnin ən ciddi məqamı odur ki, bu işin müəyyən fraqmentində Azərbaycan bankları da iştirak edib. Bu sırada “Texnikabank”, “Royalbank” və “Xalqbank”ın adı hallanır. Məhz İranın çirkli pullarının yuyulmasında iştirak etdiyinə görə ötən ilin yayında “Royalbank”ın lisenziyası ləğv edilib, “Texnikabank”ın isə rəhbərliyi həbs edilib və dəyişdirilib. Hər iki bank haqda cəza tədbirləri ABŞ xüsusi xidmət orqanlarının səhih məlumatları və təkidi ilə baş tutub. Bəzi iddialara görə, “Xalqbank”ın cəza tədbirlərindən kənarda qalması onun Mərkəzi Bankın İdarə Heyətinin sədri Elman Rüstəmovun çətiri altında olması ilə bağlı olub. Baş bankir öz bankını xilas etmək üçün digər iki bankı qurban verib.



Türkiyədəki qaynağın məlumatına görə, bu dalğada “Xalqbank”ı himayə etmək E.Rüstəmov üçün çox çətin olacaq: “Çünki bu artıq kifayət qədər böyük layihədir. 2008-ci ilin 2-ci yarısından başlayan qlobal maliyyə böhranından Ərdoğan hökuməti ərəb ölkələri və İranın çirkli pullarının yuyulmasına şərait yaratmaqla çıxdı. Yüz milyardlarla avro çirkli pul yuyularaq Türkiyə iqtisadiyyatına yatırıldı və nəinki böhranın təsirləri lokallaşdı, əksinə, ciddi iqtisadi irəliləmələr qeydə alındı. İndi artıq böhran təhlükəsi arxada qalıb və çirkli pulların yuyulmasının davam etdirilməsi Ərdoğan hökumətinin təhlükəsizliyinə ciddi təhdidlər yaradıb. Ona görə də bu işlə məşğul olanların və onların xaricdəki tərəfdaşlarının cəzalandırılmasına qərar verilib. Böyük məbləğli çirkli pulların yuyulmasında Azərbaycanda təkcə M. Seyidov yox, gömrük xidmətinin başqa rəhbər şəxsləri, banklar və iri şirkətlər də iştirak edib. Ona görə də ehtimal etmək olar ki, bu dalğa Azərbaycanda xeyli vəzifəli şəxsi və iş adamını, o cümlədən də Mərkəzi Bankın rəhbəri E. Rüstəmovu vura bilər. Özü də E. Rüstəmov bu məsələdə təkcə ”Xalqbank"ın qeyri-rəsmi sahibi kimi yox, həm də çirkli pulların yuyulmasının qarşısını almağa borclu olan Mərkəzi Bankın başçısı kimi məsuliyyət daşıyır. Türkiyənin istintaq orqanları həmin şəxslərin, bankların və şirkətlərin çirkli pulların yuyulmasında iştirakını sübuta yetirsə, Azərbaycanı da həbs dalğası bürüyə bilər. Türkiyə və Azərbaycan arasında qarşılıqlı hüquqi yardım haqqında imzalanmış müqavilə də buna hüquqi əsas yaradır.