Türkiyədə son günlər aparılan “Rüşvət əməliyyatı” və bunun ardınca hüquqi çatışmaların həm də qəbulolunmaz üsulla (kaset qalmaqalları) siyasi müstəvidə davam etdirilməsinin qardaş ölkədə yaratdığı narahatlıq Azərbaycanda da yaşanır.

Təkcə ona görə yox ki, güclü Türkiyə Azərbaycanın güvənliyi deməkdir və orada baş verənlərin Türkiyəni zəiflətmək istiqamətində çabalar olması danılmazdır; həm də ona görə ki, Türkiyədə həbs edilənlər sırasında Azərbaycandan olan 3 iş adamı və bir rəsmi vəzifəli şəxs var.

Naxşıvandakı Sədərək gömrük keçid məntəqəsinin rəhbəri Mirməhəmməd Seyidovun Qarsda saxlanması və İqdıra gətirilməsi sıradan bir hadisə deyil. Naxçıvanın gömrük məmurunun xidməti işi ilə bağlı vəzifəsindəki nöqsanlara görə (lap olsun, cinayət) qardaş ölkədə həbs olunması çox ciddi hadisədir – Türkiyənin 3 nazir oğlunun bu əməliyyatlarda saxlanılmasından daha ciddi.

Rza Zərraba Azərbaycandan kimlər əmr verib?

Türkiyədəki “Rüşvət əməliyyatı”nda həbs olunan iş adamları içərisində ən hay-küylülərindən biri də azərbaycanlı Rza Zərrabdır. Xatırladaq ki, Türkiyə mediası Rza Zərrabın (Sərraf) 1984-cü ildə Bakıda zəngin bir ailədə doğulduğunu və kiçik yaşlarından ticarətlə məşğul olduğunu yazır. İran azərbaycanlısı olan R.Zərrabın birbaşa Bakıya bağlanması yönündə aparılan bu təbliğat təsadüf, yoxsa düşünülmüş planın tərkib hissəsidir?

Həmçinin Rza Zərrabın “Əmrləri Azərbaycandan almışam” kimi açıqlama verməsi və bunun manşetlərə daşınmasının arxasında nə dayanır?

Azərbaycandan R.Zərraba kimlər tapşırıqlar verə bilərdi və istintaq nəticə etibarilə kimin şəxsi üstündə fokuslaşır?

Gözlər Naxçıvana dikilir

İrana istisadi sanksiyalar tətbiq edilir, bu arada qeyri-qanuni pul köçürmələrinə R.Zərrab cəlb olunur. Əlində yüksək çinli məmurlara verdiyi rüşvətin siyahısı olan R.Zərrab İrana sanksiyalar tətbiq ediləndən sonra bu ölkədən 87 milyard avronun “yuyulmasında” əsas sima olaraq qabardılır.

87 milyard – həddən artıq böyük məbləğdir. Bu vəsaitlər Türkiyəyə necə girib? Hansı qapıdan?

Həbs edilən gömrükçülər – Türkiyə-Naxçıvan gömrük keçid məntəqələrinin üzvləridir. Birmənalı olaraq nəticə aydındır ki, “bakılı” R.Zərrabın 87 milyardlıq çirkli pulyuma əməliyyatı Naxçıvan vasitəsilə həyata keçirilib.

Sədərək gömrüyünün uzun müddət rəhbəri işləmiş məşhur “Laba”nın – Mübariz Pənahovun timsalında bilirik ki, Sədərək gömrük-keçid məntəqəsinin Vasif Talıbovun nəzarətindən kənarda işləməsi qeyri-mümkündür. Hətta “Laba” kimi dövlətin yuxarı eşalonuna bağlı olan şəxs də Naxçıvan Ali Məclisinin sədri Vasif Talıbovun iradəsindən kənarda işləyə bilmədi və vəzifəsindən azad olundu.

Təbii ki, Mirməhəmməd Seyidovun - ABU-nun keçmiş rektoru Elşad Abdullayev qalmaqalına görə prokurorluq orqanlarından uzaqlaşdırılan Mirələkbər Seyidovun qardaşı Mirməhəmməd Seyidovun hakimiyyətdə zəifləyən dayaqları fonunda - bu iradəyə tabe olduğunu birmənalı qəbul etmək lazım gəlir. Həm də “dövriyyə” o qədər böyükdür ki, bu əməliyyatın balaca Naxçıvanda gömrük məntəqəsi sədrinin boyu səviyyəsində həll edildiyinə haqlı şübhə yaradır.

Vidadi Bədəlov kimdir?

M.Seyidovla bərabər həbs olunanlar arasında daha 3 azərbaycanlı var: iş adamları - A.Nizami, H.Surxay və V.Bədəlov.

Azərbaycanlı iş adamı Vidadi Bədəlov haqqında hələlik bu məlumatları oxuyuruq: Bədəlov Vidadi Türkiyədə “Cihan Kiymetli Madenler”, “Deniz Kiymetli Madenler” və “Kapital Kiymetli Madenler” adlı “xəyali şirkət” (ofşor) qurub - 2009-2012-ci illərdə. Pul transferləri də bu şirkətlərlə aparılıb.

Vidadi Bədəlovun qurduğu “xəyali şirkətlərdən” birinə “Cihan” adı verməsi diqqətçəkəndir.

Xatırladaq ki, “Cahan” Holdinq Naxçıvanda fəaliyyət göstərən böyük şirkətdir və bu brendin Talıbovlar ailəsinin nəzarətində olduğu bəllidir.

Vasif Talıbov “rüşvət əməliyyatından” zərər çəkə bilərmi?

Faktiki olaraq R.Zərrabın açıqlaması və V.Bədəlov adı, həmçinin digər iki azərbaycanlının həbsi bu əməliyyatda Naxçıvanın adını gündəmə gətirir. Hədəfin Vasif Talıbova yönələcəyi qətiyyən istisna edilmir. Bu “əməliyyat” Vasif Talıbovun siyasi karyerasına necə təsir edəcək?

Hər şeyi Türkiyə demokratiyası və Rəcəb Tayyib Ərdoğanın mövqeyinin həll edəcəyi şübhəsizdir...