Baş Prokurorluq Anar Məmmədlinin həbsi ilə bağlı məlumat yaydı
Dekabrın 18-də Baş Prokurorluğun mətbuat xidməti “Seçkilərin Monitorinqi və Demokratiyanın Tədrisi Mərkəzi”nin rəhbəri Anar Məmmədlinin həbsi ilə bağlı məlumat yayıb. Prokurorluğun mətbuat xidmətindən verilən məlumata görə açıqlamada deyilir:
“Seçkilərin Monitorinqi və Demokratiyanın Tədrisi Mərkəzi” və “Könüllülərin Beynəlxalq Əməkdaşlığı” ictimai birliyi adlı qurumların vəzifəli şəxslərinin qulluq səlahiyyətlərindən sui-istifadə edərək külli miqdarda gəlir əldə etməklə və vergiləri ödəməkdən yayınmaqla qanunsuz sahibkarlıq fəaliyyəti ilə məşğul olmalarına dair Azərbaycan Respublikasının Vergilər və Maliyyə nazirliklərindən Baş Prokurorluğa daxil olmuş materiallar üzrə 2013-cü il oktyabrın 29-da Azərbaycan Respublikası Cinayət Məcəlləsinin 192.2.2-ci, 192.2.3-cü, 213.2.1-ci, 213.2.2-ci və 308.2-ci maddələri ilə cinayət işi başlanıb. İş üzrə çoxsaylı dindirmə, baxış, axtarış, götürmə və sair istintaq hərəkətləri yerinə yetirilmiş, zəruri ekspertizalar təyin edilməklə məhkəmənin müvafiq qərarı ilə qeyd edilən qurumlarda mühasibat uçotunun mövcud qanunvericiliyin tələblərinə uyğun aparılıb-aparılmamasının, vergi qanunvericiliyinin tələblərinə riayət edilib-edilməməsinin, sair daxil olmaların təyinatının qanuniliyinin müəyyənləşdirilməsi məqsədi ilə həmin nazirliklərin və Qeyri-Hökumət Təşkilatlarına Dövlət Dəstəyi Şurasının mütəxəssisləri cəlb olunmaqla yoxlama təşkil edilib. İbtidai istintaqın ilkin mərhələsində və yoxlamanın aralıq aktına əsasən toplanmış sübutlar şübhələnməyə əsas verir ki, hüquqi qeydiyyatı olmayan “Seçkilərin Monitorinqi və Demokratiyanın Tədrisi Mərkəzi”nin həmtəsisçisi və sədri Məmmədli Anar Asəf oğlu 2013-cü ilin may ayından etibarən rəhbərlik etdiyi qurumun icraçı direktoru Süleymanlı Bəşir Süleyman oğlu ilə birlikdə Amerika Birləşmiş Ştatlarının Milli Demokratiya İnstitutu tərəfindən ayrılmış 276010 ABŞ dolları məbləğində qrant müqaviləsini dövlət qeydiyyatına alınmış “Könüllülərin Beynəlxalq Əməkdaşlığı” İctimai Birliyinin adına rəsmiləşdirilməsi barədə qurumun rəhbəri Məmmədov Elnur Akif oğlu ilə razılıq əldə edib. Bundan sonra, Bəşir Süleymanlının “Könüllülərin Beynəlxalq Əməkdaşlığı” İctimai Birliyinin vitse-prezidenti vəzifəsinə təyin olunmaqla bank hesabına köçürülmüş 163250 ABŞ dolları onun vasitəsilə nağdılaşdırılıb götürülməsində, hüquqi şəxs statusu olmadığı halda “Seçkilərin Monitorinqi və Demokratiyanın Tədrisi Mərkəzi”nə ictimai əlaqələr üzrə menecer, hüquqşünas, ekspert və digər vəzifələrə işçi qəbulu elan edib özlərinə, işçilərə, eləcə də layihəyə cəlb edilmiş digər şəxslərə həmin pul vəsaitindən əmək haqqı, xidmət və ofislərin icarə haqqı ödənilməsində, ümumilikdə 109529 manat məbləğində gəlir əldə olunmaqla Azərbaycan Respublikası Vergi Məcəlləsinin 219.1-ci maddəsinə əsasən dövlət büdcəsinə ödənməli olan 19535 manat məbləğində xeyli miqdarda əlavə dəyər vergisi dövlət büdcəsinə ödənilməməsində, həmçinin Elnur Məmmədovun “Könüllülərin Beynəlxalq Əməkdaşlığı” İctimai Birliyinin rəhbəri kimi idarəetmə orqanlarının formalaşdırılması, hüquqi şəxslərin reyestrinə daxil edilməsi üçün hüquq verən rəsmi sənəd olan təsisçilərin ümumi yığıncağının qərarlarına yalan məlumatlar daxil edərək təsisçilərin imzalarını saxtalaşdırmasında əsaslı şübhələr mövcuddur.
A.Məmmədli və B.Süleymanlının CM-in 192.2.2-ci, 213.1-ci və 308.2-ci, E.Məmmədovun isə həmin məcəllənin 192.2.2-ci, 213.1-ci, 308.2-ci və 313-cü maddələrində nəzərdə tutulan əməlləri törətmələrində əsaslı şübhələr olduğundan təqsirləndirilən şəxs qismində cəlb edilərək B.Süleymanlı və E.Məmmədov barəsində başqa yerə getməmək haqda iltizam, Anar Məmmədli barəsində isə məhkəmənin qərarı ilə həbs qətimkan tədbiri seçilib. Hazırda Baş Prokurorluğun Ağır cinayətlərə dair işlər üzrə İstintaq İdarəsində cinayət işi üzrə istintaq davam etdirilir.

ATƏT-in Demokratik Təsisatlar və İnsan Haqları Bürosunun direktoru, səfir Yanez Lenarçiç Azərbaycanda tanınmış ictimai fəal, seçki müşahidəçisi Anar Məmmədlinin həbsindən narahatlıq ifadə edən bəyanat yayıb. Bəyantda səfir qeyd edir ki, Anar Məmmədlinin həbsi ilə bağlı öz narahatlıqlarını Azərbaycan hakimiyyətinə də çatdırıblar: “Seçkilərin ictimai müşahidəsini də təhlükəyə atması baxımından Anar Məmmədlinin həbsi narahatlıq doğurur. Bu müşahidənin mövcudluğu ATƏT-ə üzv olan bütün ölkələr, o cümlədən də Azərbaycanın özü üçün seçki proseslərinin dürüstülüyünün təminatıdır. Biz onun həbsi ilə bağlı vəziyyəti yaxından izləyəcəyik. Ümid edirik ki, bu məsələ Azərbaycanın insan haqları sahəsində ATƏT qarşısında öhdəliklərinə uyğun şəkildə həll ediləcək”.
Azərbaycan Miqrasiya Mərkəzinin rəhbəri Əlövsət Əliyev isə A.Məmmədlinin həbsi ilə bağlı maraqlı fakt açıqlayıb. Miqrasiya problemi ilə bağlı tədbirdə Ə.Əliyev deyib: “Anar Məmmədlinin həbsindən sonra ölkədən gedişlə bağlı 14-15 nəfər gənc Mərkəzə müraciət edib”.
Hüquq Maarifçiliyi Cəmiyyətinin rəhbəri, hüquqşünas İntiqam Əliyev Anar Məmmədlinin həbsinin siyasi motivli olduğuna heç bir şübhəsi olmadığını söyləyib. “Axırıncı dəfə onunla söhbətimizdə söhbət həbsdən düşəndə yarıciddi, yarızarafatla söylədi ki, "Bəy, mən hansı ölkədə yaşadığımızı və kimlərlə qarşı-qarşıya durduğumuzu yaxşı bilirəm və ona görə də hər şeyə hazıram”.
Hüquqşünas bildirib ki, A.Məmmədlinin rəhbərlik etdiyi təşkilat uzun illərdir ölkədə seçkilərin monitorinqini aparır və seçkiləri saxtalaşdıran hakimiyyəti ifşa edən hesabatlarla çıxış edir, özü isə hakimiyyətin sərt tənqidçilərindən biri sayılır. O, hakimiyyətin hədəfində olduğunu, həbs oluna biləcəyini anlayırdı və buna da hazır idi. A.Məmmədlinin həbsi bu hakimiyyətə baha başa gələcək. Anar bəy təkcə ölkə daxilində yox, beynəlxalq arenada tanınmış çox nüfuzlu QHT liderlərindən sayılır. Son illərdə kütləvi xarakter alan siyasi motivli həbslərlə bağlı artmaqda olan etirazlar seçkilər sahəsində çalışan nüfuzlu bir təşkilatın rəhbərinin həbsi ilə daha güclənəcək. Onun həbsi həm də Azərbaycanda siyasi məhbus problemi, QHT-lərə, mediaya, siyasi partiyalara basqılar, hüquq-mühafizə orqanlarının, məhkəmələrin hakimiyyətdən asılılığı, total seçki saxtakarlıqları və hakimiyyətin eşitmək istəmədiyi çoxsaylı digər mövzuları yenidən yerli və dünya mediasının, beynəlxalq təşkilatların, müxtəlif forumların müzakirə predmetinə çevirəcək. A.Məmmədlinin rəhbərlik etdiyi təşkilatın hesabatlarını oxumayanlar da maraq naminə açıb onları oxuyacaqlar. Hakimiyyət Anar bəyi, Əvəz bəyi, İlqar bəyi, Tofiq bəyi, Qurban bəyi, NİDA-çı gəncləri və onlarla digər ləyaqətli insanları həbs etdirməklə toplumun gözünü qorxutduğunu düşünürsə, yanılır. Bəlkə ilk baxışdan belə görünə bilər. Amma əslində, hakimiyyət Azərbaycanı barıt çəlləyinə çevirib və o bir qığılcıma bənddir."
SMDT-dən aldığımız məlumata görə dünən A.Məmmədlinin müdafiə komitəsi müzakirələri davam etdirib. Müzakirələr zamanı atılacaq addımlar müəyyən olunub. Yaxın günlərdə komitənin tərkibi haqda məlumat veriləcək.