Rüstəm İbrahimbəyov: “İstefa verməyi özümə borc bilirəm”
Eldəniz Quliyev:“Milli Şura üçün ürəyində kəlmeyi-şəhadət oxuyanlar rahat olsunlar”; Arif Hacılı: “R.İbrahimbəyovun Rusiya qarşısında müəyyən öhdəlikləri var”
Dekabrın 26-da Milli Şuranın fəxri sədri kinodramaturq Rüstəm İbrahimbəyov postundan istefa verib. Turan agentliyinə göndərdiyi müraciətində R.İbrahimbəyov belə bir addımı Demokratik Qüvvələrin Milli Şurasına daxil olan siyasi qüvvələr arasındakı fikir ayrılığını aradan qaldırmaq, 2013-cü il mayın 28-də onun təşəbbüsü ilə yaradılan bu ictimai institutun fəaliyyətinin davamlılığını təmin etmək üçün atdığını bildirib: “Prezident seçkilərindən dərhal sonra demokratik müxalifətin sıralarında kəskinləşən partiyalararası fikir ayrılıqları ictimaiyyətin diqqətini ölkənin əsas problemlərindən yayındırır. Milli Şuranın fəaliyyətinin nəticələrini şübhə altına alanların məqsədlərini analiz etmək fikrində deyiləm, lakin şübhəsiz ki, onların fəaliyyəti demokratik qüvvələrin birliyini pozmağa yönəlib və Milli Şuranın mövcudluğu faktının beynəlxalq ictimaiyyət tərəfindən təqdir edilməsindən narahatlıq keçirən hakimiyyətin maraqları ilə üst-üstə düşür.



Qeyd etmək istəyirəm ki, Milli Şuranı tənqid edənlər öz destruktiv hərəkətlərini bizim təşkilatın “sıralarının təmizliyindən” narahatlıqları ilə ört-basdır edirlər, lakin ardıcıl olaraq MŞ-nin yaradılmasına, prezident seçkilərində ikinci namizəd kimi Cəmil Həsənlinin namizədliyinin irəli sürülməsinə necə mane olduqlarını unudurlar.

Və bu gün yalnız özlərinə aydın olan hansısa məqsədlərinə nail olmaqla MŞ-nin tənqidçiləri iyirmi il ərzində qarşılıqlı irad və ittihamlar səbəbindən pərən-pərən düşmüş demokratik qüvvələrin bu geniş koalisiyasının tarixi əhəmiyyətini kiçildirlər. Dünya demokratik birliyi MŞ-ni Azərbaycanda demokratik müxalifətin yeni inkişaf pilləsi kimi qəbul edir, MŞ-ni faydalı qarşılıqlı əməkdaşlığı mümkün olan nüfuzlu təşkilat kimi görür. Bu, hakimiyyəti və öz hərəkətləri ilə Milli Şuranı iki-üç partiyanın ittifaqına çevirmək istəyənləri narahat edir.

Bütün bunları başa düşərək və Müsavat Partiyası rəhbərliyinin mənim Milli Şuranın fəxri sədri seçilməyim ətrafında apardığı diskussiyaların Milli Şuraya qarşı ümumi kampaniyanın tərkib hissəsi olduğunu nəzərə alaraq qurumun fəxri sədri postundan imtina etməyi öz borcum hesab edirəm.

Ümidvaram ki, mənim qərarım heç olmasa bir müddət partiyalararası gərginliyi aradan qaldıracaq və Milli Şuranın saxlanmasına yardım edəcək.

Demokratik birliyin yaradılması uğrunda səylərimə haqq qazandıranlara və dəstəkləyənlərə bir daha öz təşəkkürümü bildirirəm və bu məktubun istefam barədə rəsmi bəyanat hecab olunmasını xahiş edirəm”.

****


Rüstəm İbrahimbəyovun bəyanatından bir neçə saat sonra isə EL hərəkatının və Milli Şuranın rəhbərlərindən olan Eldəniz Quliyev Milli Şuradan istefa verib. “Yeni Müsavat”a açıqlamasında o, baş verənlər üçün Müsavat Partiyasının məsuliyyət daşıdığını deyib: “Rüstəm müəllim çox həssas insandı. Müsavat Partiyasının son sessiyadakı adekvat olmayan, şəxsən mənim əsaslı saymadığım bir məntiqlə “Rüstəm İbrahimbəyov fəxri sədr olsa Müsavat Milli Şuradan gedəcək” deməsi bu addımın əsas səbəblərindəndir. Bu cür çağırışlar konkret nəticəyə hesablanmışdı. Bilirdilər ki, Rüstəm bəy belə münasibəti çox həssaslıqla qəbul edəcək və gedəcək. Rüstəm İbrahimbəyovun getməyi ilə Milli Şura nə qazandı? Demokratik düşərgə bundan sonra düz yoldan çıxıb yenidən bataqlığa doğru irəliləyəcək. İndiyə qədər Milli Şuranın kəlmeyi-şəhadətini ürəklərində oxuyanlar artıq arxayın olub onu yüksək səslə oxuya bilərlər”.



Müsavat Partiyası Mərkəzi İcra Aparatının rəhbəri Arif Hacılı Rüstəm İbrahimbəyovun Milli Şuranın fəxri sədri statusundan istefa verməsinə münasibət bildirib.

Arif Hacılı “Qafqazinfo”ya açıqlamasında deyib ki, Rüstəm İbrahimbəyovun Mili Şuranın həmsədri, ya da fəxri sədri olması indiki durumda Azərbaycan müxalifətinin xeyrinə deyil: “Rüstəm İbrahimbəyov Rusiya vətəndaşıdır. Onun Rusiya qarşısında müəyyən öhdəlikləri var. Orada öz peşə fəaliyyəti ilə məşğuldur. Buna görə də Rusiyadan xeyli dərəcədə asılıdır".

Arif Hacılı bildirib ki, Rüstəm İbrahiməbəyovun Müsavat Partiyası rəhbərliyinin onun Milli Şuranın fəxri sədri seçilməyi ətrafında apardığı diskussiyaların Milli Şuraya qarşı ümumi kampaniyanın tərkib hissəsi olduğunu barədə olan fikirlərini də qəbul etmir: "Çünki Müsavat Partiyası Milli Şuranın yaranmasında aparıcı qüvvə olub. Seçki prosesinin aparılmasında, Mill Şuranın təşkil etdiyi aksiyalarda aktivliyi ilə seçilib. Milli Şuranın qərarlarını yerinə yetirməyə çalışıb. Ona görə də Rüstəm İbrahimbəyovun problemin mahiyyətini dərk edərək fəxri sədrlikdən istefa etdiyini düşünürəm".

“Yeni Müsavat”a isə məlum olub ki, bu şəxslərin Milli Şuradan getmələrinin əsas səbəbi Müsavat Partiyası ilə bağlı deyil: “EL Hərəkatı prinsipial qərar verib və bu qurumun üzvləri yaxın günlərdə tamamilə Milli Şuranı tərk edəcəklər. Bunun səbəbi Milli Şura formatının onların nəzərində tamamilə iflas etməsidir. EL hərəkatı üzvləri öz aralarında tamamilə başqa bir təşkilatı – AXCP-ni suçlayırlar. Onlar hesab edirlər ki, MŞ sədri Cəmil Həsənli artıq AXCP rəhbərliyinin tam təsiri altındadır və Milli Şura da adekvat olaraq, monopoliyaya götürülüb. EL-çilər bundan belə yeni format arayışında olacaqlar”.

Yekunda müxbirimiz soruşub: “Milli Şura layihəsinin qurucusu olan “Milyarderlər İttifaqı”nın “boz kardinalı” Ramazan Abdullatipovun Bakıya səfəri və burada isti qarşılanması ilə ölkəmizin siyasi həyatında baş verən bu qəfil hadisə arasında bağlılıq varmı? ”

Həmsöhbətimiz deyib: “Heç bir bağlılıq yoxdur. EL hərəkatı artıq çoxdan getməyə qərar verib. “Milyarderlər ittifaqı” isə Putinin Bakıya səfərindən sonra “Milli Şura”nı taleyin ümidinə buraxmışdı...”