Hər il dövlət büdcəsindən milyonlarla manat necə «yeyilir»?

ASC-nin rəhbərliyi əhalini istiliklə təmin etməkdən daha çox dövlətin ayırdığı pulları mənimsəməklə məşğul olur.
Qış mövsümü gələr gəlməz paytaxtın istilik problemi Bakı əhalisinin əsas sosial problemlərindən birinə çevrilir. Uzun illərdir ki, dövlət hər il paytaxtın istilik problemlərinin həlli üçün milyon manatlarla vəsait ayırır. Lakin, ortada böyük vəsaitin olmasına baxmayaraq, Bakının istilik problemləri öz həllini tapa bilmir. Buna görə də əhalinin böyük hissəsi elektrik enejisindən istifadə edərək istiliyə olan təlabatını ödəməyə çalışır. Bu isə həm əhaliyə həddindən artıq baha başa gəlir, həm də elektrik xətlərinin həddindən artıq yüklənməsinə səbəb olur.
Paytaxt Bakının və digər şəhərlərin istilik təminatı 2005-ci ildə ölkə prezidentinin sərəncamı ilə “Azəristiliktəchizat” ASC həyata keçirir. Təşkilatın vəzifəsi paytaxtı və ölkənin böyük şəhərlərini qış aylarında istiliklə təmin etməkdir. Bunun üçünsə qazanxanaların, istilik xətlərinin yay aylarında təmiri, qazanxanaların işləməsi, yeni istilik qurğularının tikilməsi üçün dövlət hər il külli miqdarda vəsait sərf edir. Amma, bu vəsaitin hansı qazanxanada «buxarlanması» haqqında Bakı şəhər İcra Hakimiyyətinin başçısı Hacıbala Abutalıbovun, “Azəristiliktəchizat” ASC-nin rəhbəri Yaşar Həsənovdan başqa ancaq bir neçə nəfər bilir.
Qeyd edək ki, Yaşar Həsənov 8 ildir ki, “Azəristiliktəchizat” ASC-yə rəhbərlik edir və ölkənin böyük şəhərlərinin «isidilməsindən» böyük pullar qazanır. Onu da xatırladaq ki, dövlət başçısının sərəncamına əsasən, “Azəristiliktəchizat” ASC əhalini qış aylarında fasiləsiz olaraq istiliklə təmin etməlidir.
Bildirək ki, sözügedən ASC-nin strukturu olduqca böyükdür və bu “Azəristiliktəchizat” ASC-yə 1 xidmət təsərrüfatı, 2 MMC, Bakı şəhəri üzrə 17 İstilik İstismar Sahəsi, 51 regional İstilik Təsərrüfatı İdarələri, 5 rayonda istilik qazanxanası, 700-ə yaxın məhəllədaxili istilik qazanxanası, 197 istilik məntəqəsi, 1200 km-ə yaxın magistiral və məhəlli istilik xətti, 2 yüksəldici nasos stansiyası, maşın parkı və digər mühəndis istilik komnuikasiyaları daxildir.”Azəristiliktəchizat” ASC-yə ayrılan vəsaitlər əsasən yay aylarında ayrılır ki, qış aylarında bütün qazanxanalar problemsiz fəaliyyət göstərsinlər. Amma PİA.AZ-a daxil olan məlumatda göstərilir, ASC-nin rəhbərliyi əhalini istiliklə təmin etməkdən daha çox dövlətin ayırdığı pulları mənimsəməklə məşğul olur.
Məlumatda bildirilir ki, qurum rəhbəri Bakı Şəhəri İcra başçısı Hacıbala Abutalıbova arxalanaraq artıq 8 ildir “Azəristiliktəchizat” ASC nin hesabına sərvət toplayır. Qurumun adındakı “Azəristiliktəchizat” sözü olmasına baxmayaraq ASC nin əsas işi paytaxt Bakı şəhərindədir. Çünki, qurumun istixanalarının 80 faizi Bakı şəhərini, yerdə qalanı isə Gəncə, Sumqayıt, Mingəçevir şəhərlərini əhatə edir. Bundan başqa rayonlarda İstilik Təsərrüfatı İdarələri formal olaraq fəaliyyət göstərir, onların əsas işləri yerli icra hakimiyyətlərini və başqa dövlət idarələrini istiliklə təmin etməkdir.
Məlumatlı şəxs bildirir ki, qurum sədri Yaşar Həsənov hər il ayrılan milyonlarla manat vəsaiti mal material alınması, qazanxanaların, istilik binalarının və istilik xətlərinin təmiri tikintisi və başqa işlərdə həyata keçirilən əməliyyatlarda çoxlu sayda maliyyə maxinasiyaları həyata keçirilib.
Məlumata əsasən, ASC-nin maliyyə maxinasiyalarında əsas “işgüzarlardan” kadrlar qurumun Tikinti və İnkşaf şöbəsinin rəisi Cəbrayıl Cəfərxanov və qurumun baş mühasibi Gülnarə Kərimova adlı şəxslərdir. Tikinti və İnkşaf şöbəsi ASC-nin həyata keçirdiyi təmir, tikinti, xətlərin bərbası, yenilərinin çəkilməsi və mal materialların alınmasını həyata keçirir. Bildirilir ki, Cəbrayıl Cəfərxanov ASC-nin rəhbəri Yaşar Həsənovun qurumdakı ən etibarlı və lazımlı adamlarından biridir. Çünki, cəmiyyət sədrinin əldə etdiyi yüzminlərlə manat vəsait məhz bu şöbənin əli ilə «yuyulur».
Qeyd edək ki, “Azəristiliktəchizat” ASC yə 2013-cü ildə ayrılan milyonlarla manat vəsaitlər, bu vəsaitlərin xərclənməsi, silinən pullarla bağlı daxil olan məlumatlardakı faktları digər mənbələr vasitəsi ilə araşdırırıq və növbəti sayımızda oxucularımıza daha ətraflı ilginc məlumatlar təqdim edəcəyik.

Qarşı tərəfin də mövqeyini dərc etməyə hazırıq…