Bakı şəhəri, Nəsimi rayonunun bir qrup sakinləri tərəfindən gundemxeber.az saytına şikayət məktubu daxil olub. Eyni məzmunlu məktub Bakı şəhər icra hakimiyyətinədə göndərilmişdir. Həmin şikayət məktubunu olduğu kimi oxucularımızın diqqətinə çatdırırıq.Vətəndaşlar: Qış mövsümü ilə əlaqədar isidilmə sistemlərinin işə salınmasına baxmayaraq hələ də Bakı şəhərində yaşayış, təşkilat, məktəb-təhsil binalarının əksər hissəsinə istilik verilmir. Havaların soyuması mənzillərinin qızdırılmaması əhalinin kütləvi xəstələnmələrinə səbəb olmaqdadır. Buna baxmayaraq istilik təchizatı sahəsində heç bir qayda yaradılmamışdır. İllərdir ki, elə yaşayış binaları vardır ki, istiliksiz keçinir. Maraqlıdır ki, Azəristilik ilin 6 ayını nə işlə məşğul olur və bu qurumun işinə nəzarəti dövlətin hansı nazirliyi həyata keçirir. Şəhərin ətrafı, kənd və qəsəbələri bir yana, heç şəhərin mərkəz rayonlarının yaşayış binalarına istilik verilmir. İnformasiya vasitələri bu yaxınlarda şəhərin yaşayış binasının zirzəmisinə istilik sisteminin isti suyunun axıdılması və binanın zirzəmisinin isti su ilə dolu olmasını göstərməsinə, sakinlərin narazılığını məmurların nəzərinə çatdırsa da, Azəristilik buna əhəmiyyət vermədi, sadəcə olaraq mənzil-kommunal sahəsinin işi olduğunu qeyd etdi. Azəristilik dəfələrlə bildirmişdir ki, istiliyi binaya veririk, mənzillərə yox, yəni istilik binaların zirzəmilərinədək örtülür. Mənzil məsələsini Mənzil-kommunal İdarəsi həll etməlidir. Mənzil-kommunal İdarəsi də əksinə istilik idarəsini günahlandırır, Azəristiliyə dövlət tərəfindən xeyli vəsaitin ayrılmasını və sakinlərdən pulun yığılmasının onlar tərəfindən aparılmasını bildirir. Bu təşkilatların yarıtmaz işini aşkarlayan dövlət təşkilatı yoxdur. Vətəndaşların şikayəti mətbuat, televiziya vasitəsi ilə ötəri deyilməklə kifayətlənir, günahkarların müəyyən olunub, onların vəzifələrini yerinə yetirmədiklərinə görə məsuliyyətə cəlb etmirlər. Azəristilik və Mənzil-kommunal İdarəsi hər qış mövsümündə əhaliyə məlumat verir ki, bəzi sakinlər binadaxili istilik ötürücü dik dayaqları kəsiblər, biz mənzillərə istilik verə bilmirik. Bəs onda bu şəxslərə qarşı niyə tədbir görmürlər? Adi quş ovu edənləri, yolu keçiddən keçməyənləri, kəmərsiz nəqliyyatı idarə edənləri, avtoxuliqanları və s. yüzlərlə manat cərimə edirlər. Minlərlə sakini soqyudan donduranlara qarşı heç bir tədbir görülmür. İstilik verilən mənzillərə isə istilik hava şəraitinə uyğun verilmir, yəni hava soyuduqca istilik azalır və ya tam kəsilir. Nəzarətedici təşkilatın olmaması Mənzil-kommunal və Azəristilik idarələrinin özbaşınalıqlarına gətirib çıxarmışdır.
Ölkəmiz əcnəbilərə təbii qaz satır, onlar bizim yanacağın hesabına firavan yaşayırlar. Milyonlarla vətəndaşlarımız bəzi dövlət məmurlarının yarıtmaz işinə görə soyuqdan əziyyət çəkirlər. Əhali arasında ən çox soyuqdan zərər çəkənlər qocalar, körpələrdir. Əhali məcbur olub müxtəlif isitmə vasitələrinə əl atır, lakin əksər halda bu faciələrlə nəticələnir.
Əhalinin mənzillərinin isidilməsi sahəsində tədbir görülməsini xahiş edirik.

gundemxeber.az