Sabiq səhiyyə naziri ona işgəncə verildiyini deyir

Bu gün Bakı Apelyasiya Məhkəməsində hakim Sənan Hacıyevin sədrliyi ilə sabiq səhiyyə naziri Əli İnsanovun Ədliyyə Nazirliyinə və Penitensiar Xidmətə qarşı şikayəti üzrə məhkəmə keçirildi.

Virtualaz.org saytının məhkəmə prosesində iştirak edən müxbirinin verdiyi məlumata görə, prosesdə Penitensiar Xidmətin nümayəndəsi iştirak etsə də Ədliyyə Nazirliyinin təmsilçisi prosesə qatılmamışdı.

Əli İnsanov ədliyyə naziri Fikrət Məmmədovun özünün məhkəmədə iştirakı barədə vəsatət qaldırdı: “Mən bu iddiamda əsas şəxs kimi Fikrət Məmmədovu göstərmişəm. O, nəyə arxayındır axı? Niyə gəlməyib? Heç nümayəndəsini də göndərməyib. Mənə verilən işgəncələrin başında şəxsən onun özü durur. Xalası oğlu İlham Əliyevəmi güvənir? Fikrət Məmmədov məhkəməyə dəvət olunsun. Mənim ona suallarım var”.

Penitensiar Xidmətin nümayəndəsi Ziya Dadaşov vəsatətə münasibət bildirərkən dedi ki, Penitensiar Xidmət Ədliyyə Nazirliyinin strukturudur, bu səbəbdən məhkəmədə onun iştirakı ilə kifayətlənmək olar, prosesdə Ədliyyə Nazirliyinin də təmsil olunmasına heç bir ehtiyac yoxdur.

Əli İnsanov bir daha məhkəməyə müraciət edərək Fikrət Məmmədovun özünü prosesdə görmək istədiyini bildirdi: “Bizim işimiz belə getməyəcək. Hardadır bu məmləkətin ədaləti? Ədliyyə naziri heç sizin özünüzü sayıb bura nümayəndə göndərmir. Fikrət Məmmədov nə vaxtdan bəri Əli İnsanovu saymır? Yanındakıları idarə edə bilməyən adam bu boyda nazirliyi idarə edir. Bizə də işgəncə verdirir”.

Məhkəmə qərara aldı ki, proses Ədliyyə Nazirliyinin nümayəndəsi olmadan keçirilə bilməz. Təxirəsalınma barədə qərar Əli İnsanovun etirazına səbəb oldu: “Çünki siyasi göstəriş belədir ki, bu proses uzansın. Məhkəməni uzatmaq üçün bəhanə axtarırılar. Bu işi nə vaxta kimi təxirə salacaqsınız? Təxirə sala-sala 2014-ə gəlib çıxdıq”.

Qeyd edək ki, noyabrın 13-də Ali Məhkəmənin Plenumunda Əli İnsanov barəsindəki hökmün qüvvədə saxlanılması ilə bağlı Apelyasiya Məhkəməsi və Ali Məhkəmənin qərarları ləğv olunub. İş yenidən baxılması üçün Bakı Apelyasiya Məhkəməsinə göndərilib. Günün ikinci yarısında Bakı Apelyasiya Məhkəməsində hakim Qədim Babayevin sədrliyi ilə keçmiş səhiyyə nazirinin şikayəti üzrə məhkəmə prosesi keçirildi.

Prosesdə Əli İnsanovun müdafiəçiləri vəsatət qaldırdılar. Həbs-qətimkan tədbirinin dəyişdirilməsi, işin birinci instansiya məhkəməsinə qaytarılması və sabiq nazirə bəraət verilməsi ilə bağlı qaldıran vəsatətlərin heç biri təmin edilmədi.

Əli İnsanov çıxışında siyasi sifarişlə həbs edildiyini məhkəmənin nəzərinə çatdırdı və hakimiyyətə sərt ittihamlar səsləndirdi: “9 illik işgəncədən başqa tərcümeyi-halımda heç nə yoxdur. Avropa İnsan Haqları Məhkəməsinin mənim haqqımda çıxardığı qərarı Azərbaycan icra etmir.Axı mən hansı cinayəti törətmişəm? Sifariş verilib ki, Əli İnsanov burdan çıxmamalıdır. Sizin haqqı bərpa etməyə gücünüz çatmır. Heç olmasa batili ifşa etməyə gücünüz çatsın. Bunu siz də etiraf edin. Bu prosesi elə-belə aparmayın. Mən bura susmağa gəlməmişəm. Bu 9 ildə hakimiyyətin ən ağır ölüm düşərgələrindən keçib gəlmişəm. Biz beləmi arzulamışdıq? Mənim qolum qırılaydı İlham Əliyevə dəstək olduğum yerdə. Gecə-gündüz məndən əfv yazmaq diləyirlər, amma yazmıram”.

Ə.İnsanov daha sonra Ali Məhkəmənin mövqeyindən narazılığını bildirib: “Ali Məhkəmənin sədri Ramiz Rzayev qanunun tələbi yox, göstəriş əsasında qərar çıxarır. Məni həbsdə saxlamaq üçün birinci instansiya məhkəməsinin hökmünü ləğv etmədilər. Halbuki Avropa Məhkəməsinin aşkarladığı pozuntular orda baş vermişdi. Ramiz Rzayev Avropa Məhkəməsinin qərarının icrasına imkan vermədi. Ramiz Rzayev deyir ki, biz müstəqil dövlətik, heç bir beynəlxalq təşkilat bizə göstəriş verə bilməz. Nə qədər də qüsurlu tezisdir! 30-a yaxın məhkəmə iddiam olub, 100-ə yaxın məhkəmə iclası keçirilib. Necə ola bilər ki, bunların birində də vətəndaşın xeyrinə qərar çıxarılmasın? Üç vəsatətin heç birini təmin etmədiniz. Burada baş verənlər açıq-aşkar qərəzin təzahürüdür. Cidanı çuvalda gizlətmək olmaz. Mən bilirəm ki, siz hakimlər hər ay Heydər Əliyev Fonduna 50 min manat pul köçürürsünüz. Hardan alırsız bu pulları? Sizin halınıza acıyıram”.

Ə.İnsanov NİDA Vətəndaş Hərəkatını dəstəklədiyini bildirib və həbsdə olan gənc fəalların valideynlərinə təşəkkür edib: “Hüqo deyirdi ki, diktatura və inqilab əkiz qardaşdır. Bu ölkədə diktatura var. İnqilabı da NİDA vətəndaş hərəkatı başlayıb və bu proses başa çatacaq. Azərbaycanın gələcəyi və Azərbaycan inqilabı bu gənclərlə bağlı olacaq...”

Məhkəmə yanvarın 31-də saat 14:30 da davam edəcək.