“Məni loto verilişində işdən çıxaran Maqsud adlı o adam utanmayıb həccə də getdi”

Qorxmaz Əlili Azərbaycanın ilk şoumeni sayılır. Azərbaycan tamaşaçısı bu obrazı ilk dəfə onun simasında görüb. Amma Qorxmaz bəy indi nədənsə şou sahəsindən kənarda qalıb. Onu heç başqa sahələrdə, məsələn, qabaqlar aparıclıq etdiyi loto verilişində də görmürük.

Eşitmişdik ki, 58 yaşına rəğmən hələ də fəxri adı olmayan Qorxmaz Əlili nələrdənsə çox narazıdır. Bəs nələrdən? Onunla müsahibəyə də elə bu suala cavab tapmaq istəyi ilə qərar verdik. Azərbaycanın ilk şoumeni isə virtualaz.org saytına giley dolu müsahibəsində çox şeylərdən danışdı.

- Qorxmaz bəy, ondan başlayaq ki, sizin EstradaTeatrı niyə bağlandı?

- Bağlanmayıb, sadəcə fəaliyyətini özüm dayandırmışam. Çünki ona maneələr yaratdılar.

- Maneə yaradanlar kimlər idi?

- Uzun söhbətdir.

- Deyirlər ki, sizin teatrın fəaliyyətini dayandırmağına səbəb olan şəxs Bakı Şəhər Mədəniyyət və Turizm İdarəsinin müdiri Əlikram Əliyevdir...

- Əlikram Əliyev mənim ən yaxın dostlarımdan biridir. Əksinə, o, hətta şərait yaratdi ki, yeni teatr açım.

- Bakı Estrada Teatrını?

- Bəli.

- Amma o teatrın fəaliyyəti nədənsə qısa oldu...

- Konsertlər təşkil etmək lazım idi. Bunun üçün də peşəkar təşkilatçı lazım idi. Teatrın fəaliyyəti dayanmayıb. Məndən sonra teatra rəhbərlik Vüqar Əbdülova (meyxana ustasına-red.) tapşırılıb. Vüqar bəy təşkilatçılığı öhdəsinə götürdü. O, cavandır, mənimsə artıq o yaşım deyil.

- 1992-ci ildə respublika meyxana müsabiqəsini ilk dəfə olaraq siz keçirmişdiniz. İndi isə...

- (sözümüzü kəsir) Gör bu, indi kiminsə yadındadır?! Efirdə müsabiqələr başlayanda məndən heç halallıq da almadılar. Heç olmasa aparıcı kimi dəvət edəydilər ki, gəl maaş al, ailəni dolandır. Deyəydilər ki, biz qazanırıq, sən də qazan. Bunu da eləmədilər.

- Deyirlər guya sizə pul veriblər ki, müsahibə verəsiniz, bakılıları təhqir etdiyi iddia olunan Rüstəm Behrudiyə cavab verəsiniz. Bu xəbər nə dərəcə doğrudur?

- Bunu deyib sübut eləməyən heç kişi deyil. Deyiblərsə, sözlərinin dalında dayansınlar. Belə danışanlar gəzəyən arvaddan da betərdirlər. Biz bakılılar Rüstəm Behrudinin üzr istəməyini yenə də qəbul etmirik. Çünki onunku minnətli üzrxahlıq idi. Rüstəm deyir, heyf məni başa düşmədilər, eybi yox, başa düşməyənlərdən üzr istəyirəm... Bu, təhqirdir. Şah bir gün Molla Nəsrəddinə deyir elə iş tut ki, üzr istəyəndə ondan da betər olsun. Molla şahın budunu çimdikləyir. Şah çığırır: “Adə, neynirsən?” Molla deyir: “Bıy, bağışla, elə bildim arvadın bududur”. Rüstəm Behrudinin üzrü də belə bir şey oldu.

- Loto oyunlarının aparıcısı olan Əlili nədən uzaqlaşdırıldı efirdən?

- Lotoya Maqsud adlı bir nəfəri rəhbər təyin elədilər. O da mənə dedi ki, danışığın xoşuma gəlmir. Dedim ləhcəmi bəyənmədin, ya nə. Dedi yox, sən lotonu çox süst aparırsan. Dedim nə eləyim, rəqəmləri oxuya-oxuya deyim, yoxsa oynaya-oynaya. Üç saatlıq söhbətin axırında dedi məni yandıran odur ki, sən bu qədər maaş alırsan. Düzü, mən loto verilişindən yaxşı maaş alırdım, çünki üç lotonun aparıcısı idim, deməli, üç adamın maaşını alırdım. Bu maaşı da boş yerdən almırdım ki... Sənətimə, bacarığıma görə alırdım. Kişi kişiyə bu sözü deməz. Kişi kişinin çörəyinə bais olmaz. Həmin o Maqsud utanmadı, məni işdən çıxardan ili Həcc ziyarətinə də getdi. Mənə qarşı elədiyi əmələ görə məndən heç halallıq da almadı. O adamın lotodan xəbəri yoxdur. O gələndən sonra lotonun satışı üç dəfə aşağı düşüb.

- Bildiyimiz qədər ev probleminiz də var. Bununla bağlı haralarasa müraciət etmisinizmi?

- 1961-ci ildə atama 47 kvadratmetrlik bir mənzil veriblər. İndi həmin mənzildə 6 nəfər ailə üzvümlə bir yerdə birtəhər yaşayıram. Mənim alimlik dərəcəm var, sənətşünaslıq üzrə fəlsəfə doktoruyam. Mənə həm alim, həm də yaradıcı insan, aktyor kimi ayrıca mənzil düşür. Prezidentimizə dəfələrlə məktub yazmışam, təbii ki, məktublar gedib ona çatmayıb, mənə “yox” cavabı gəlib. Daha doğrusu, məktub Mədəniyyət və Turizm Nazirliyinə və Bakı Şəhər İcra Hakimiyyətinə göndərilib. Onlar da “otkaz” ediblər. Ya qismət, görək nə olur. Azərbaycanda da elə dövlətli adamlar yoxdur ki, bizə yardım əlini uzatsın.

- Bu qədər narazısınız. Niyə köçüb xaricə getmirsiniz?

- Dolanışıq ucbatından nə ailəmi, nə də vətənimi ata bilmərəm. Həm də burada xalqın mənə olan məhəbbətini başqa ölkələrdə tapa bilmərəm.

Tural Balabəyli