Əmlak Məsələləri üzrə Dövlət Komitəsində yeni sistemlər tətbiq olunub

Daşınmaz Əmlakın Dövlət Reyestri Xidmətinin rəisi Arif Qaraşov vəzifəsindən uzaqlaşdırılandan və adıçəkilən qurumda struktur dəyişiklikləri aparılandan sonra çoxlarına elə gəlirdi ki, burada rüşvətin kökü tam kəsilməsə də, müəyyən mənada azala bilər. Amma belə olmadı. Əmlak Məsələləri üzrə Dövlət Komitəsi (ƏMDK) qısa müddətdə yaranmasına baxmayaraq əhali bu qurumun fəaliyyətindən olduqca narazıdır.
Qəzetimizə daxil olan məlumatlara görə, son vaxtlar sözü gedən qurumda rüşvətin miqyası pik həddə çatıb. Ən böyük "qara" pullar isə Komitənin yanında Bakı Ərazi İdarəsidir. Kərəm Həsənov bu quruma həmyerlisi və qohumu Fərahim Mirzəyevi təyin edəndən sonra vətəndaşlardan daha çox "haqq" alınması üçün onlar müxtəlif bəhanələrlə get-gələ salınır. Burada yeni iş rejimi yaradılmaqla yanaşı, əhalidən pul yığılmasının yeni mexanizmi formalaşdırılıb.
F.Mirzəyev hələ Əmlakın Texniki İnventarlaşdırılması Bürosunda rəis vəzifəsində olduğu zaman özünü göstərib. Yaxşı pul toplayıb rəisinə çatdırdığına görə onun etibar və etimadını qazana bilib. Əgər belə olmasaydı, BDU-nun coğrafiya fakültəsini bitirmiş F.Mirzəyevin qeyri-ixtisas sahibi olduğunu nəzərə alar, onu ƏTİB-a, oradan isə BƏİ-yə rəis vəzifəsinə təyin etməzdilər. O, yeni vəzifəsinin icrasına başladığı gündən rəhbərlik etdiyi idarəyə bir ab-hava gətirdi. İşçilər arasında "konvert sistemi"ni tətbiq etdi.

"Konvert sistemi" nədir?

Doğrudur, bu sistem bir çox dövlət qurumlarında mövcuddur. Amma oxuculara qaranlıq qalmasın deyə, bir balaca izahat verməli olacağıq.
İdarənin texniki işçilərinə tapşırılıb ki, əhalidən bir qayda olaraq pul almasınlar. Xatırladaq ki, əvvəllər kiminsə sənədlərini qaydaya salan texniki işçilər vətəndaşdan 50-100 manat alırdısa, indi bu, biryolluq aradan qaldırılıb. Bu qadağaya məhəl qoymayan adını çəkmək istəmədiyimiz texnik dərhal işdən uzaqlaşdırılıb. Oxucular bəlkə də sevinəcək ki, yəqin Kərəm Həsənov rəhbərlik etdiyi komitədə rüşvəti yığışdırıb. Heç də belə deyil. Əksinə, Qaraşovun dövründə 100-150 manata alınan "Forma-1" hazırda 1000 manata başa gəlir. Amma həmin pulu vətəndaşlardan F.Mirzəyevin təyin etdiyi xüsusi adamlar yığır. Əgər hansısa tikilidə hər hansı bir uyğunsuzluq meydana çıxırsa, texniki pasportda düzəliş üçün 3-5 min manata yaxın pulunun başından keçməlisən. Uyğunsuzluq daha çoxdursa, miqyasına görə haqqın miqdarı da dəyişir. Alınan pullar ümumi "katyol"a daxil olandan sonra işçilərə hər ay tutduğu vəzifədən asılı olaraq maaşdan əlavə kovertdə pul verilir. Həmin miqdar isə aşağısı 300-400 manatdan başlayır və 1000 manatadək olur.

Çirkli pullar hara gedir?

Onu da qeyd edək ki, bəzi məmurlardan fərqli olaraq F.Mirzəyev topladığı çirkli pulları xarici ölkələrdə investisiya şəklində qoyub. Bunun səbəbi isə onun hakimiyyətə inamsızlığından irəli gəlir. F.Mirzəyevin Ukraynadakı böyük biznes şəbəkəsinə qardaşı rəhbərlik edir. Bayaq qeyd etdiyimiz kimi, adıçəkilən idarədə rüşvətin miqdarı o qədər böyüyüb ki, bu, vətəndaşların ciddi narazılığına səbəb olub. Məsələ komitə sədri K.Həsənova da çatıb. O, komitənin daxili iclaslarının birində tabeliyində olan işçilərə tapşırıb ki, insafınız olsun, heç olmasa texniki pasportlara uyğun gəlməyən 15-20 kv.metrə qədər olan əmlaklara göz yumun. Sənədləşdirmədə vətəndaşları o qədər də incitməyin. Amma F.Mirzəyev sədrin bu göstərişinə də məhəl qoymur. Yalnız bildiyini edir. Onun başı vətəndaşların vəziyyətini düşünməkdən çox, pul yığmağa qarışıb. F.Mirzəyevin idarədə pulyığanları isə müavini İsmayıl Rəhimov və şöbə müdiri Xəyalə Mərdanlıdır. Bağlar idarəsində isə Elsevər müəllimdir. O da öz növbəsində hər bağ evinin mərtəbəsinə 1000 manat rüşvət təyin edib (hətta qanuni sənədlər olduqda). Xəyalə xanım idarədə "Forma-1"in rüşvətinin təyinetmə məsələsinə baxır. Heç kimdən çəkinmədən öz otağında verilmə müddətindən asılı olaraq pulun miqdarını təyin edir. İnanmayanlar yerindəcə bu rüsvayçılığın şahidi ola bilər.
Müavin İ.Rəhimov BƏİ rayon şöbələrinin rəhbərlərini qəbul edir və vətəndaşlara onların vasitəsilə alınacaq pulların miqdarını razılaşdırır. İdarədə qapalılıq sistemi yarandığından rüşvətin çoxluğundan narazı olan vətəndaşları birbaşa İ.Rəhimovun qəbuluna göndərirlər ki, öz işini özü razılaşdırsın. Əmlakla texniki pasportda olan uyğunsuzluğun qiyməti onunla müəyyən olunur. Bir sözlə, idarənin hər iki məsul şəxsi F.Mirzəyevin etibarlı pulyığanları hesab olunur. Adıgedən hər üç şəxs razılaşdırma siyahısını F.Mirzəyevlə razılaşdırandan sonra vətəndaşa axırıncı qiymət deyilir.
F.Mirzəyev K.Həsənovun ona olan etibarından o qədər məmnundur ki, hazırda heç Daşınmaz Əmlakın Dövlət Reyestri Xidmətinin rəisi Məhəmməd İmanovu da saymır.

Əmlak Məsələləri üzrə Dövlət Komitəsi susur

Bəzən elə olur ki, subardinasiya qaydalarını gözləmədən M.İmanovun tapşırıqlarını yerinə yetirməkdən imtina edir. Hətta vətəndaşların qəbul saatında belə heç kimi qəbul etmir. Bu idarəyə ayaq basan heç bir insanın oradan razı getdiyini görən olmayıb. Elə qaranlıq məqam da budur ki, F.Mirzəyevin özbaşınalığı haradan qaynaqlanır. İnsanların şəxsi mülkiyyətinə bilavasitə şərik çıxan bu məmurun müasir dövrün tələblərilə bir araya sığmayan özünəməxsus idarəçiliyindən xəbəri olmayanları xəbərdar edirik. F.Mirzəyev vəzifəsinə hələ "təzə" başlayıb. Əgər onun və tabeliyində olan işçilərin özbaşınalığının qarşısı vaxtında alınmasa yəqin ki, insanlar gələcəkdə F.Mirzəyevin çoxsaylı "sürpriz"i ilə qarşılaşacaq.
Məsələ ilə bağlı qurumun mövqeyini dərc etməyə hazırıq

Fərid