ABU işində Elçin Əfəndiyev tək deyil: Hacıbala Abutalıbov və DİN-in yüksək çinli generalı

gundemxeber.az Fəaliyyəti dayandırılan Azərbaycan Beynəlxalq Universitetinin rektoru Elşad Abdullayevin şikayətləri nəticəsində saxlanılan Baş nazirin müavini Elçin Əfəndiyevin sabiq köməkçisi Vaqif Hüseynov istintaqa şok ifadələr verib. O, ifadəsində Elşad Abdullayevin ABU-nun fəaliyyətinin bərpa edilməsi məqsədiylə irəli sürdüyü bir milyonluq rüşvət ittihamında Elçin Əfəndiyevi günahlandırıb.
Bu barədə xəbər yayan «Təzadlar» qəzetində bildirilib ki, Vaqif Hüseynov istintaqa ifadəsində E.Abdullayevlə E.Əfəndiyevin məlum əlaqələrini və münasibətini etiraf edib: «Həmçinin həmin pulların (yəni alınmış bir milyon dolların) çox hissəsinin də E.Abdullayevə qaytarıldığını bildirib. Amma bildiyimə görə, V.Hüseynova xəbər göndərilib ki, bütün hallarda məsuliyyəti öz boynuna götürsün və hər şey yaxşı olmalıdır...".

Kökü 95-ci ilə gedib çıxan anlaşma

Xəbərdə E.Abdullayevin tapşırığı ilə 2010-cu ildə V.Hüseynovun Patamdardakı villasında onunla görüşən nümayəndə heyətindən və orada gedən söhbətlərdən də bəhs olunub: «Həmin görüşdə ABU rektoru dayandırılmış tələbə qəbulunun bərpası və ABU-nun lisenziyasının müddətinin artırılması üçün verdiyi l milyon dollar pulun bir hissəsini almaq üçün V.Hüseynovla kompromisə gedib. Amma pulun bir hissəsinin əmlakla əvəzlənməsi təklifi ətrafında razılaşma tam əldə olunmayıb. Məsələn, V.Hüseynov E.Abdullayevə Kiprdəki villasını, Xaçmazdakı istirahət mərkəzini, Bakıda tikilən göydələnlərdəki mənzillərdən bir neçəsini təklif edib, müəyyən miqdarda isə pul da verib. Öhdəliyin sona kimi yerinə yetirilmədiyini görən ABU rektoru isə bezib aidiyyəti qurumlara, tanınmış insanlara V.Hüseynovdan şikayət edib, hətta hüquq mühafizə orqanlarının belə bu işə qarışdığı bildirilirdi...».
Daha sonra Elçin Əfəndiyevin ABU ilə əlaqəli 25 sentyabr 1995-ci ildə imzası ilə təsdiqlədiyi mühüm sənəddən də söz açılaraq, tərəflər arasındakı münasibətlərin kökünün illər əvvələ gedib çıxdığına işarə vurulub. Bununla da Vaqif Hüseynovun istintaqa verdiyi məlumatların əsassız olmadığı qənaəti yaradılıb.

Hacıbala Abutalıbov hansı fakültənin təsisçisi olub?

ABU-nun 1995-ci ildə fəaliyyəti Elçin Əfəndiyevin imzaladığı sənədlə qurulduğunu etibarlı mənbə də təsdiqləyib: «Bəli, 25 sentyabr 1995-ci ildə Rusiyanın bir neçə ali məktəbinin buradakı filiallarının birləşdirilərək, ABU-nun çətiri altında fəaliyyət göstərməsində Elçin Əfəndiyevin imzaladığı sənədin mühüm rolu olub. O da doğrudur ki, həmin sənəddən sonra Elşad Abdullayev həmin filial rəhbərləri və təsisçilərinin bir çoxunu «çox maraqlı» şəkildə fırladıb da. Məsələn, həmin illərdə hazırkı Bakı meri Hacıbala Abutalıbovun da adının təsisçi kimi getdiyi Avtonəqliyyat fakültəsi var idi. O da Elşad Abdullayevin qarşısında «əridi». O ki qaldı Vaqif Hüseynovun istintaqa ifadələrinə, bu, istintaq sirridir. Onun necə qəzetə sızması maraqlı olmaqla yanaşı, həm də düşündürücüdür. Amma bu xəbərin doğru olma ehtimalı da var. Hamı bilir ki, köməkçi Elşad Abdullayevin məlum xahişini yerinə yetirmək gücündə deyil. Abdullayev kimi ayıq bir adam da bunu bilməmiş deyil. Şübhə yox ki, köməkçi vasitəsiylə yenidən Elçin Əfəndiyevə “xod” axtarıb, problemi yoluna qoymaq istəyiblər. Lakin bu dəfəki vəziyyət 1995-ci ildəki situasiya ilə fərqləndiyindən problem “dalan”a dirənib”.

Arzu Kazımov Daxili İşlər Nazirliyindən hansı dəstəyi istəyib?

Həmsöhbətimiz Vaqif Hüseynovla eyni gündə, yəni bu ilin noyabr ayının əvvəlində həbs edilmiş iş adamı Arzu Kazımovun son durumundan da danışıb: “Vaqif Hüseynovun istintaqa necə ifadə verdiyini bilmirəm. Amma Arzu Kazımovun israrla Elşad Abdullayevin ittihamlarını və şikayətlərini rədd etdiyi haqda xəbərim var. Düzdür, o, ittihamları əsaslı şəkildə rədd edə bilmir”.
Müsahibimiz Arzu Kazımovun Elşad Abdullayevin “sərrast atəşi”nə boğulan şəxsin “saman çöpü”ndən yapışmış şəkildə cavab verdiyini deyir: “Arzu Kazımov istintaqda Elşad Abdullayevi vəzifəli şəxslərlə görüşdürməsini təkzib edir. Hətta ortadakı 3 milyonluq rüşvət ittihamını rədd etmək üçün ABU rektorunun “pulun bir hissəsini Arzu Kazımovun məsləhəti ilə Daxili İşlər Nazirliyində Zahid Dünyamalıyevə verdim” kəlməsini yalana çıxarmaq üçün vəkili vasitəsiylə Daxili İşlər Nazirliyi qarşısında məsələ qaldırıb. Nazirlikdən ora gəlib-gedənlərlə necə davranılması haqda təlimat istənilib. Arzu Kazımov o qədər pulun nazirlikdə yoxlamadan keçmədən yuxarıya, Zahid Dünyamalıyevə necə çatdırılmasını sual altına almaq istəyir. Yəni nazirlik yoxlama olmadan belə bir pul dolu çantanın içəriyə keçməsini təkzib edərsə, Arzu Kazımov özünü müəyyən qədər təmizə çıxaracağını düşünür. Amma lap nazirlik sorğuya onların istədiyi kimi cavab verərsə də, bu, hələ suçdan yayınmaq və ya Elşad Abdullayevin yalan dediyini isbatlamaq üçün yetərli deyil. Ən əvvəl ona görə ki, ortada onların Mahir Abdullayevin işi ilə bağlı “əməkdaşlıq”larını göstərən xeyli faktlar var. İkinci tərəfdən isə, hamı bilir ki, hər hansı bir nazirliyin qapısı ağzında duran mühafizəçinin nazir müavinin yanında gedən nə şəxsi, nə də onun çantasını yoxlamaq cəsarəti var. Özü də nazir müavinin aşağıya tapşırdığı halda qətiyyən bu mümkün deyil. Bundan əlavə, Arzu Kazımov yoxlama təlimatını tələb etməkdənsə, qeyd edilən vaxt video-kameraların arxivlərini tələb etsə idi, daha məntiqli və əsaslı ola bilərdi. Bunu etmirlərsə, demək ortada faktdan yayınmaq cəhdi var”.
Mövzunu diqqətdə saxlayacağıq. Məsələ ilə bağlı yazıda adları hallanan hər bir tərəfin mövqelərini də dərc edə bilərik.

Elçin Əmirov