Zaqatala rayon İcra Hakimiyyətinin başçısı Mübariz Əhmədzadənin “plyonkalı” avtomobili sakinlərin qəzəbinə səbəb olub.
Redaksiyamıza göndərilən məktubda, adının açıqlanmasını istəməyən Zaqatala şəhər sakini icra başçısı Mübariz Əhmədzadəyə məxsus 62-AA-001 dövlət nömrə nişanlı xidməti avtomobilin arxa şüşələrinə pərdə yerləşdirilməsi ilə bağlı məlumat yazıb.
Fotolardan da göründüyü kimi, sözügedən pərdə qanunla icazə verilən pərdələrdən olsa da, yenə də burada qanunun tələbələrinə əməl edilmədiyini deyə bilərik. Belə ki, qanunla icazə olunan pərdələrin avtomobillərə may ayından etibarən asılmasına icazə verildiyi məlumdur. Ancaq oxucu məhz bu məqama toxunaraq məktubunda sözügedən fotonun 22 mart 2014-cü il tarixində Əliabad qəsəbəsində keçirilən "Novruz Bayramı" tədbirində çəkildiyini bildirib.
Bununla da icra başçısının niyə digər vətəndaşlar kimi may ayını gözləyə bilməməsi bəzi suallar ortaya çıxardır.
Bununla yanaşı, Zaqatala RİH-nin tabeliyində olan 62-AA-002 dövlət nömrə nişanlı “Toyoto” markalı avtomobildə də vaxtından əvvəl pərdə asıldığını müşahidə etmək mümkündür.
Xatırladaq ki, keçən ilin fevral ayında sonuncu dəfə ölkə başçısı İlham Əliyev avtomobillərdə pərdə və plyonkalar məsələsinə bir daha toxunmuşdu. Həmin çıxışdan olan bəzi məqamları yenidən diqqətinizə çatdırırıq:
“Özüm demişəm ki, mən prezidentəm, mənim maşınımda plyonka yoxdur. Hansısa üçüncü, dördüncü dərəcəli məmurun maşınını plyonka ilə bağlayırlar. Kimdən gizlənirlər?! Ya qorxurlar ki, kimsə onları görəcək?! İndi camaat onları görsə nə olar? Əriyərlər onlar?! Nə olacaq?!
Mən demişəm, o vaxt tədbirlər görüldü, söküldü. Mənə, bu gün səhər buraya gəlməzdən əvvəl maraqlanırdım, daxili işlər naziri deyir ki, təkcə keçən il 24 min plyonka sökülüb. Bu 24 min adamın qulağı yoxdur?! Onlar eşitmir ki, mən nə deyirəm?! Yaxud da ki, onların yadından çıxır?! Bu bəlkə də o qədər də böyük məsələ deyil. Amma bir göstəricidir. Bu nə ayrı-seçkilikdir cəmiyyətdə?! Sənin vəzifən var, pulun var, sən özünü fərqləndirirsən?! Sən get özünü öz işinlə, öz əməlinlə, ağlınla, ölkəyə verilən töhfə ilə fərqləndir, plyonka ilə, bahalı əşyalarla yox! Ona görə mən deyirəm, - bu gün də daxili işlər nazirinə dedim, - bir də eşitsəm, bilsəm ki, plyonkalı maşın var, o maşın müsadirə edilməlidir. İndi bilmirəm, burada, qanunvericilikdə hansı düzəlişlər etmək lazımdır, onu edərik. Belə olmaz! Harınlayırlar, qudururlar, heç kimi saymırlar!”, - deyə prezident bildirib.