Müavinləri Zaqatala merinin “torbasını tikir”, istefasına zəmin yetişdirir;
Mübariz Əhmədzadə donos yazan axtarışına çıxıb və RİH-də təmizləmələr
gözlənir, Əhməd Əhmədzadə qardaşını xilas edə biləcəkmi?

“Meliorasiya və Su Təsərrüfatı” ASC-nin rəhbəri Əhməd Əhmədzadənin qardaşı istefaya göndərilə bilər. İcra başçısı olan Mübariz Əhmədzadənin fəaliyyətində ciddi nöqsanlar aşkarlanıb. Qardaşının hesabına uzun müddətdir ki, Zaqatalada meydan sulayan M.Əhmədzadənin vəzifəsindən kənarlaşdırılmasının vaxtı yetişib.
Zaqatala sakinlərindən “Gündəm-xəbər”in əməkdaşına göndərilən məktubda qeyd olunur ki, icra başçısı üçün istefaya zəmin hazırlanıb. Onun növbəti dəfə Zaqatala rəhbəri olacağı gözlənilmir. Hətta qardaşı Əhməd Əhmədzadə danışıqlara gedərək onu xilas etmək istəyib. Ancaq ASC sədrinin cəhdi baş tutmayıb.
Sakinlərin sözlərinə görə, Zaqatalanın icra başçısı müavinləri ilə yola getmir.
Müavinləri ilə daxildə çəkişməsi olan başçının istefaya göndərilməsi üçün mərkəzə kompromatlar göndərilir. Müavinlər başçının ayağının altını qazaraq Prezident Administrasiyasına barəsində sensasion məktublar yazıblar.
Məlumatlarda onun korrupsiya və tenderlərlə bağlı maxinasiyaları öz əksini tapıb. Eyni zamanda rayon əhli arasında sosial qəzəb yaratdığı söylənib. Görünən budur ki, müavinləri Zaqatala merinin “torbasını tikir” və istefasına zəmin yetişdirir; Əhməd Əhmədzadə də qardaşını xilas edə bilmir.
Rayon sakinlərinin dediyinə görə, başçı barədə yuxarı dairələrə kompromatlar artıq çatdırılıb və M.Əhmədzadənin vəziyyəti gərgin və kritik olaraq qalır.
Hətta Əhməd Əhmədzadə qardaşını danlayıb və deyib ki, ətrafına diqqətlə nəzər salsın. O, bununla qardaşının diqqətinə çatdırıb ki, müavinləri ona xəyanət edir, kimlərlə işləməyindən xəbərsizdir və qeyri-peşəkarlığına görə müavinləri ona “torba tikməyi” bacarıblar. ASC rəhbəri qardaşına möhkəm qəzəblənib və indi vəziyyətdən çıxış yollarını axtarır.
İddialara görə, M.Əhmədzadə şpion axtarışına çıxıb və müavinlərindən əsasən kimlərin ona qarşı işlədiyini öyrənməyə çalışır. Qeyd olunur ki, bu günlərdə Zaqatala icra hakimiyyətində “yapraq tökümü” başlaya bilər. Hazırda təftiş aparılır və başçıya qarşı kompromat materialları PA-na çatdıran müavinlərin kimliyini müəyyən edib, cəzalandıracaqlar.
Daxil olan başqa bir məlumatda isə bildirilir ki, Zaqatalada bir çox məmurlar da artıq Mübariz Əhmədzadəyə qarşı birlikdə addım atmağa qərar veriblər. Buna səbəb kimi icra başçısının yerli məmurlarla münasibətlərinin korlanmasıdır.
Eyni zamanda sahibkarlar da bu işə əl qoyub. Çünki, yerli-yersiz yığılan xəraclardan cana doyan sahibkarlar yeni təyin olunacaq rəhbərlə sövdələşə biləcəklərini güman edirlər. Sakinlərin “Gündəm-xəbər”ə verdiyi məlumata görə, Əhmədzadə qardaşları təkcə Zaqatalada padşahlıq eləmirlər. Onlar özlərini bu bölgənin ağası kimi aparırlar. Qardaşlar Qax və Zaqatalanı istədikləri kimi idarə edir, bu rayonların malını, sərvətini talan edirlər. Zəlzələdən sonra isə yeyilən milyonlar əhalidə daha böyük narazılıq yaradıb.
Ona görə də Zaqatalada cərəyan edən hadisələr və yaranmış vəziyyət əslində rayonun icra başçısı Mübariz Əhmədzadənin yarıtmaz fəaliyyətinin nəticəsidir.
Zaqatalanın təhsil şöbəsinin, səhiyyə şöbəsinin, maliyyə idarəsinin və digər qurumların fəaliyyəti sakinlərin ciddi etirazlarına səbəb olur. Son vaxtlar bizə müraciət edən mənbələr isə bütün nöqsanların əsasında məhz Mübariz Əhmədzadənin bu qurumlar qarşısında qoyduğu qeyri-qanuni tələblərin, idarəetmədə yol verilən kobud səhvlərin durduğunu iddia edirlər.
Digər tərəfdən isə rayon ərazisində torpaq sahələrinin qanunsuz olaraq satılması və zəbt olunması, sakinlərin məişət problemlərinin həllinə biganəlik, yaşıllıqların məhv edilməsi və bir çox digər ciddi qanun pozuntularına dair ittihamlar da başçının istefasını şərtləndirir.
Qeyd olunur ki, icra başçısı vəzifə səlahiyyətlərindən sui-istifadəyə yol verərək bütün torpaqları, zirzəmiləri və obyektləri ən qısa müddətdə satıb qurtarmağı qarşısına məqsəd qoyub. Müavinləri isə qruplaşma yaradaraq, ona qarşı içəridən müxalifət təşkil ediblər. Qruplaşma öz arasında olan güclərdən birini başçı gətirmək istəyir. Mübariz Əhmədzadə 15 yanvar 1947-ci ildə Qax rayonunun Qaxmuğal kəndində anadan olub. Qax şəhər 1 saylı orta məktəbini, 1970-ci ildə isə Azərbaycan Politexnik İnstitutunun mexanika fakültəsini mühəndis-mexanik ixtisası üzrə bitirib.
Əmək fəaliyyətinə 1970-ci ildə Zaqatala maşın-melorasiya stansiyasında sahə mühəndisi kimi başlayıb. 1976-1979-cu illərdə Qax rayon Yol İstehsalat Dairəsində rəis vəzifəsində çalışıb. 1979-1984-cü illərdə Qax rayon Təsərrüfatlararası Tikinti İdarəsində rəis olub. 1985-1989-cu illərdə Qax rayonundakı 94 №-li Səyyar mexanikləşdirilmiş dəstənin rəisi, 1989-2007-ci illərdə Qax “Avtonəqliyyat” müəssisəsinin rəhbəri vəzifəsində çalışıb. 27 dekabr 2007-ci ildən 1 sentyabr 2009-cu ilədək Qax rayon İcra Hakimiyyətinin başçısı vəzifəsini icra edib. Hazırda Zaqatala rayonu İcra Hakimiyyətinin başçısıdır. İttihamlarla bağlı qarşı tərəfin mövqeyini dərc etməyə də hazırıq...
R.QARA