Əhməd Əhmədzadənin qardaşı təşviş içindədir

Zaqatala rayon İcra Hakimiyyətinin başçısı Mübariz Əhmədzadənin adı buna qədər də bir çox qalmaqallı olaylarda hallandırılmışdı. Bildirək ki, hələ avtomobillərə qara plyonkada hərəkət qadağan olunduğu bir vaxtda prezidentin tapşırıqlarını belə qulaqardına vurduğunu nümayişkaranə formada ifadə edən Zaqatala RİH rəhbərinin maşınları qara plyonkada şütüməkdə idi. Doğrudur, deyilənə görə, həmin pərdəli və plyonkalı maşınlar Bakıya gələrkən qiyafəsini dəyişirmiş. Amma Zaqatalada əhaliyə görünməməyi daha məqbul hesab edən başçı Bakıdan fərqli olaraq rəhbəri olunduğu rayonda qanunları pozmaqda idi.
Bu gün isə redaksiyamıza Mübariz Əhmədzadənin kadr islahatı ilə bağlı maraqlı bir informasiya daxil olub. Xatırladaq ki, keçən günlərdə Mübariz Əhmədzadənin yerinə başçının birinci müavini postunu tutan Elman Ramazanovun təyin olunacağı xəbərini vermişdik. Və bildirmişdik ki, əslən Zaqataladan olan Ramazanov rayona bələd birisi kimi rəsmi Bakının regionda mümkün təhlükələrin önlənməsi üçün belə bir etimada layiq görülə bilər. Bu yöndə tədarükün getdiyi də deyilir.
Amma görünəni odur ki, hətta bu xəbərdən belə əndişə keçirən Mübariz Əhmədzadə onun yerinə hazırlanan birinci müavini ilə açıq ədavətə girişib, ona qarşı kompaniyaya başlayıb. Bu barədə “Gündəm xəbər”ə danışan rayondakı mənbə bildirir ki, hətta Mübariz Əhmədzadə Ramazanovu yanına çağıraraq onun yerinə hazırlaşması xəbəri ilə bağlı sorğu-suala da tutub. Mənbənin söylədikləri: “Amma birinci müavinlə bağlı hər hansı qərarın verilməsi Əhmədzadənin səlahiyyətləri xaricində olduğundan o, yalnız Ramazanova kin saxlamaqla yetinməli olub”.
Bu da hamısı deyil. Məlumatlı mənbə bildirir ki, Mübariz Əhmədzadə bir zamanlar onun köməkçisi olmuş, sonradan isə hakimiyyətin “gəncləşdirmə siyasəti”nə uyğun olaraq müavin postuna daşıdığı digər RİH başçısı müavini İlkin Şəfizadəni Elman Ramazanovun üzərində nəzarətçi təyin edib. Bu barədə isə “Gündəm xəbər”ə danışan mənbə bildirir ki, İlkin Şəfizadə köhnə günlərdə - yəni Mübariz Əhmədzadəyə köməkçilik etdiyi dönəmdə olduğu kimi, onun tapşırıqlarına uyğun olaraq bu gün Ramazanovun fəaliyyətini əməlli-başlı nəzarətə alıb. Mənbə onu da bildirir ki, birinci müavinin hara getməsi, hardan gəlməsi, kiminlə oturub-durması bu gün Şəfizadə üçün əsas məlumat əhəmiyyətindədir...
Bütün maraqlı tərəflərin mövqelərini işıqlandırmağa hazırıq…
ELDAR