Son günlər internet mediası və sosial şəbəkələrdə məmur və deputat övladlarının sürdüyü bahalı avtomobillərin fotoşəkilləri və videogörüntülərinin tirajlanması, onların dəbdəbəli ziyafətlərdə, lüks otellərdəki istirahətini əks etdirən şəkillərinin üzə çıxması oliqarx-valideynləri xofa salıb.
Övladlarının “bahalı həvəsi”nin qurbanlarına cevrilən atalar indi mediaya ard-arda açıqlamlar vermək məcburiyyətində qalıblar. Ortadakı faktları təkzib etməyə çalışırlar ki, ölkə rəhbərliyinin qəzəbinə tuş gəlməsinlər...
Axı ölkə başçısı şəxsən özü dəfələrlə bu məsələlərı münasibət bildirmiiş, hətta belə bir xəbərdarlıq da etmişdi: “Belə olmaz! Harınlayırlar, qudururlar, heç kimi saymırlar! Vəzifəli şəxslərin uşaqları qudurğanlıq edirlər, insanları təhqir edirlər, özlərini apara bilmirlər. Kim onlara bu statusu verib cəmiyyətdə?! Onların, necə deyərlər, güvəndiyi adamları mən təyin etmişəm vəzifəyə, mən də çıxaracağam lazım bildikdə. Əgər bir də bilsəm ki, kiminsə ailə üzvü haradasa xuliqanlıq edir, nadanlıq edir, özünü apara bilmir, o adam həbs ediləcək, atası işdən qovulacaqdır. Bunu hamı bilsin! Şəhər küçələrini yarış meydanına çevirənlər də bilsinlər! Hamısı həbs ediləcək! Vəssalam!”.
Amma vəzifəli şəxslərin şıltaq övladlarının elə özləri sosial şəbəkələrdə bahalı avtomobillər, saatlar, dəbdəbəli əyləncə şəkilləri, videolar paylaşmaqla sanki insanlarda qıcıqlandırmaqdan xoşlanır, buna həvəslə davam edirlər. Baş verənlər isə medianın diqqətindən yayınmır və nəticə ondan ibarətdir ki, məmur və deputatlar övladlarının “zibilinə düşüblər”.
Deyəsən sosial şəbəkələr məmur və deputatların qəniminə çevrilməkdədir.
Bir müddət öncə Bakı Şəhər Prokurorluğunun İstintaqa Nəzarət Şöbəsinin rəisi Ramiz Nəbiyevin oğlu Elvin Nəbizadənin Facebook səhifəsində bahalı avtomobillərinin şəklini paylaşması atasına baha başa gəldi. Oğlunun bu hərəkəti prokurorun karyerasına son qoydu.
Bundan sonra isə daha bir neçə məmur və oliqarxın, o cümlədən nəqliyyat nazirinin qardaşı, deputat Elton Məmmədovun və Diasporla İş üzrə Dövlət Komitəsinin sədri Nazim İbrahimovun oğlanları sosial şəbəkədə bahalı maşınlarını, saatlarını, əyləncə dolu güzəranlarını reklam etdilər.
Yüksək təbəqənin üzvlərinə isə reklam olunmaq heç də ucuz başa gəlmədi. Mətbuatdan tutmuş millət vəkillərinə kimi hamı onlardan danışmağa başladı.
Atalar oğullara görə danışmalı oldular... Danışdılar, təkzib etdilər... Amma yaxın vaxtlarda bu şəxslərə qarşı da ölçü götürülə bilər.
Vəzifə kreslosunun şirinliyindən məhrum olmaq istəməyənlər indiki postu itirəcəklərindən qorxaraq övladlarına müxtəlif qadağalar qoymağa başlayıblar.
Məlumata görə, medianın gündəminə təsir edən son hadisələrdən sonra ən yüksək səviyyədə məmurlara xəbərdarlıq edilib. Vəzifə kreslosunu itirmək istəməyən vəzifəlilərin isə xəbərdarlıqdan sonra övladlarına qarşı ölçü götürdükləri vurğulanır.
Məlumata görə, situasiyanı özləri üçün “qarışıq və həssas zaman” sayan məmurlar bahalı maşınlarını gizlətməyə başlayıblar. Övladlarını isə xəbərdar ediblər ki, “reklam olunmağı” dayandırsınlar.
Bildirilir ki, oliqarx-məmurlar bahalı avtomobilləri yaxın çevrələrində etibar etdikləri şəxslərin adlarına keçirirlər. Qeyd edilir ki, diqqəti öz üzərilərindən çəkməyə və ara sakitləşənə kimi bu cür davranmağa məcburdurlar.
Gültəkin Ələsgər