Küknar ağacları şəhid qəbirlərini görünməz edib,
Şəhidlər Xiyabanının yaxınlığında kafe və
yaxud restoran tikiləcəyi barədə xəbərlər dolaşır

Qarabağ şəhidlərinin ailələri tərəfindən şəhid qəbirlərinin Şəhidlər xiyabanından başqa bir əraziyə köçürmək istəyi səslənir. Buna səbəb xiyabanda Qarabağ şəhidlərinin məzarları qarşısında əkilən şam ağaclarıdır. Belə ki, yeni əkilən ağaclar hasar kimi şəhid məzarlarının qarşısını kəsir. Bununla da şəhidlərin qəbirləri ziyarətə gələnlər üçün bir növ əlçatmaz olur.



2 il öncə sözgedən ünvanda şam ağacları əkiləndə bir qrup şəhid anası buna narazılıqlarını bildirmiş, giley-güzar etmişdi. O zaman körpə olan bu ağaclar indi böyüyərək meşəliyə çevrilib. Xiyabana ayaq basarkən sanki burada uyuyan şəhidlərimizin yalnız 20 yanvar hadisələrində həlak olan insanlardan ibarət olduğunu zənn etmək olar. Qarabağda həlak olan şəhidlərimizin qəbirlərinin küknarlar arasında gizlədilməsini onlara qarşı haqsızlıq və ayrı-seçkilik kimi qiymətləndirmək olar.



Hətta bir sıra şəhid ailələri belə getsə, öz doğmalarının qəbirlərini buradan köçürəcəklərini deyirlər. Deputat Elman Məmmədov da ağacların şəhidlərin məzarları önündə əkilməsinə və həmin ağacların onların məzarlarını gizlətməsinə etirazını bildirdi: “Şəhidlər xiyabanında Qarabağ şəhidlərinin basdırıldığı ərazidə 12 Xocalı şəhidinin məzarı da var. Mənim anamın qəbri də ordadır. Həmin ağacların şəhidlərin qarşısında bir divar kimi əkilən vaxtı bütün şəhid ailələri kimi mən də öz etirazımı bildirmişdim. İndi də şəhid ailələrinin etirazlarına qoşuluram. Bilmirəm kimə lazımdır bu, nə üçündür? Bilmirəm ki, nəyə görə şəhidlərimizi gizlədirik, onların qarşısını örtməliyik? Niyə buranı ziyarət edənlər həmin qəbirləri görməməlidirlər?! Bu mənə də aydın deyil. Şəhidlər xiyabanı bizim qürur yerimizdir. Şəhid qəbirlərimizi təzə ayaq açan körpələrimiz də ziyarət etməlidir. Xarici ölkələrdən gələn qonaqlar da görsün ki, Azərbaycan torpağı uğrunda nə qədər Azərbaycan övladı şəhid olub. Bunun qarşısına ağac əkərək sədd yaratmağın nə mənası var ki? Mən də bu məsələyə etiraz edənlərdən biriyəm. Mən istərdim ki, həmin işə cavabdeh, məsuliyyət daşıyan kimdirsə onlar deyilənlərdən nəticə çıxartsın. Onlar tək bir yerə yox bütün yerə, bütün şəhid qəbirlərinə yaxşı xidmət etsinlər”.



Bu xəbərdən sonra biz Şəhidlər Xiyabanına getdik. 20 yanvar faciəsinin 23-cü il dönümü ilə bağlı burada abadlıq işləri gedir. Demək olar ki, bütün sıralarda daş piltələr ya yenilənir, ya da təmizlənir. Bundan başqa Türk şəhidlərinin xatirəsinə ucaldılan abidənin ətafı da abadlaşdırılır. Belə ki, yer asfaltlanır, əkilən gül kolları budanır.
Ancaq Qarabağ müharibəsində şəhid olan qəhrəmanların qəbirləri isə gözə görünməzdir. Yəni, küknar ağacları bütün qəbirlərin qarşısını kəsib. Kimin harada uyumasını görmək üçün gərək pilləkanlarla yuxarı qalxasan. Əks təqdirdə küknar ağacları buna mane olacaq.
Bir il öncə bu ağaclar balaca olduğu üçün qəbir daşları normal görünürdü. İndi isə vəziyyət lap xarab olub. Belə getsə gələn il şəhidlərin qəbirləri tamam görünməz olacaq.
Hələlik, rəsmilər bu barədə heç bir söz demirlər. Əgər küknar ağacları çıxarılmasa yəqin ki, şəhid ailələri öz doğmalarının məzarlarının yerini dəyişdirməli olacaqlar. Bəzi məlumatlarda Şəhidlər Xiyabanlığının yaxınlığında kafe və yaxud restoran tikiləcəyə barədə xəbərlər dolaşır. Belə ki, xiyabanın bir addımlığında olan gənclər üçün tikilən atıcılıq mərkəzi sökülməli idi. Hazırda həmin ərazidə heç bir söküntü işləri getmir. Yaxın zamanlarda funiklyorun da yenidən təmir olunacağı deyilir.
Ramin DEKO