Vüqar Ələkbərovun otel sevdasına görə 30-a
yaxın ailənin yaşadığı yataqxananı söküb

İsmayıllı hadisələrinin ilk günündə rayon icra başçısı Nizami Ələkbərov mediaya bildirmişdi ki, məşhur “Çıraq” otelinin onun qohumları ilə əlaqəsi yoxdur.Yanvarın 28-də Vergilər və Mədəniyyət və Turizm nazirliklərinin saytındakı məlumatlarda otel rəhbərliyinin icra başçısının qardaşı nazir Füzuli Ələkbərovun oğlu ilə əlaqəsi olduğu şübhələrini yaradıb. Çıraq oteli yanvarın 23-də İsmayıllıda icra başçısı Nizami Ələkbərovun qardaşı oğlu və ya bacısı oğlu olduğu deyilən şəxsin “Hammer“ markalı maşını ilə "Çıraq” otelindən çıxarkən taksi sürücüsünün maşınını vurması, sürücülər arasındakı mübahisə zamanı söyüş işlətməsindən sonra narazı yerli sakinlər tərəfindən yandırılıb.
Ismayıllıda iğtişaşlar zamanı yandırılan otel əvvəllər 30-a yaxın ailənin yaşadığı yataqxana olub. Sakinlər BBC Azərbaycancaya 5 il əvvəl otel hazırlanan zaman İcra Hakimiyyəti tərəfindən çıxarıldıqlarını deyir.
“Bizi 2008-ci ilin fevralın 28-də axşamüstü məcburi şəkildə polis gücünə çıxarıblar”, Təranə Ağayeva bildirir. Ağayeva hazırda digər iki qonşu qadınla birgə 2008-ci ildən köçürüldükləri kərpic satışı ilə məşğul olan obyektin döşəməsi beton otaqlarda yaşayır. Ağayeva onlara həm də topraq sahəsi verildiyini deyir, amma onlar həmin sahələr “gərginliyin altında” yerləşdiyindən ərazilərini “sənədləşdirə bilmir”.
Köçürülən ailələr 1993-cü ildən otelin yerləşdiyi binada yaşayıblar. “Sovet dövründə bura “raykoittifaq” deyilirdi, sonra yataqxana kimi istifadəyə verildi. Biz orda ev pulu köçürmüşük, kommunal xərcləri verirdik”, - Ağayeva bildirir. - “Bizə kömək etməli idilər, tullamalı deyildilər. Aclıq aksiyası keçirdik, şikayət etdik, nəticəsi olmadı”.
Ağayevanın qonşusu Lalə Məlikova da köçürülmələri barədə danışıb: “Məni çıxaranda evə girib lomla döşəmələri qaldırdılar, bir də gördüm ki, pəncərələr yoxdur”. Baş verənləri “haqsızlıq” adlandıran qadınlar köçürülən zaman onlara heç bir ödəniş edilmədiyini qeyd edir. Onlar İcra başçısına və digər məmurlara şikayət etdiklərində dəfələrlə “çıxmayaydınız” sözlərini eşitdiklərini deyir. Onlar Çıraq otelinin yandırılmasını köçürülən ailələrin “ahı və göz yaşları” ilə əlaqələndirir.