“Vosmoy bazarı” köçürülür

Metronun “Neftçilər” stansiyasının yaxınlığında yerləşən və “Vosmoy bazarı” kimi tanınan ticarət mərkəzinin köçürülməsi nəhayət reallaşır. Gunxeber.com-un bu barədə əldə etdiyi məlumata görə, bazarın faktiki sahibi olan Əmlak Məsələləri Dövlət Komitəsinin sədri Kərəm Həsənov bu bazar uğrunda neçə illərdi mübarizə aparan başqa oliqarxalara uduzub. Uzun illərin amansız savaşı K.Həsənovu rəqiblərinin istəyi ilə razılaşmaq məcburiyyətində qoyub. Bu bazaraın yeri artıq ondan alınıb və ticarət mərkəzi köçürülərək, onun yerində başqa obyektlər tikiləcək.
Artıq bu bazarın köçürüləcəyi yer də bəllidi. “Vosmoy bazarı” Sabunçu rayonunun Zabrat qəsəbəsi ilə Kürdəxanı arasındakı əraziyə köşürüləcək. Həmin ərazinin bir hissəsində indi mal bazarı fəaliyyət göstərir. Mal bazarı Zabratdan Kürdəxanıya gedən yolun yaxınlığından keçən dəmir yol xəttinin sağ tərəfinə köçürüləcək. Qeyd edək ki, əvvəllər “Binə” və “Sədərək” ticarət mərkəzlərinin də bu əraziyə köçürülməsi planlaşdırılsa da, sonradan plan dəyişdi.
Məlumata görə, artıq “Vosmoy bazarı”nda fəaliyyət göstərən bir çox satıcıların da bu köçürülmə məsələsindən xəbəri var və artıq bazarda narazılıqlar baş qaldırıb. Onlar “Vasmoy bazarı”nda istifadələrində olan piştaxtalar və obyektlər üçün xeyli pul verdiklərini bildirirlər. İndi yeni bazarda yerlər yenidən onlara pulla satılacaq.
Onu da qeyd edək ki, son illərdə “Vasmoy bazarı”nda bir neçə dəfə güclü yanğın baş verib və bu hadisələrin qəsdən törədilməsinə dair çoxsaylı iddialar var. Dəfələrlə bu bazarda ciddi etirazlar baş verib, Prezident Administrasiyasına, Əmlak Məsələləri Dövlət Komitəsinə və Nizami rayon İcra Hakimiyyətinə yürüşlər olub.