Taleh Heydərov barədə yayılan xəbərin əsl təfərrüatları üzə çıxır

Fövqəladə hallar naziri Kəmaləddin Heydərovun oğlu barəsində yayılan son xəbər böyük rezonans doğurub. Nazir oğlu Taleh Heydərovun Belçikada oğurlanması planı ciddi narahatlığa səbəb olub. Hollandiyada yaşayan “Azərbaycanın Dostları Cəmiyyəti”nin sədri Elman Mustafazadə gunxeber.com-a deyib ki, bir neçə il əvvəl T.Heydərovu Avropada oğurlamaq istəyiblər. E.Mustafazadə hadisənin təfərrüatını belə nəql edib:
“2006-2007-ci illərdə Taleh Heydərovun Belçikada oğurlanması üçün böyük əməliyyat qurulmuşdu. Buradakı Alban və İraq mafiyası bəzi “azərbaycanlılar”ın “navodka”sı ilə Taleh Heydərovu oğurlayaraq külli-miqdarda pul tələb etməliydilər. Bu söhbətə qoşuldum və olmaz dedim. Onlara dedim ki, bu mənim millətimin övladıdır, azərbaycanlıdır, mənim də övladım var, eləməyin. Amma alınmadı. Gördüm vəziyyət çox qəlizdir. Bu məlumatı Azərbaycanın Belçikadakı səfirliyində çalışan çox inandığım bir nəfərə sızdırdım. Bundan sonra Taleh Heydərovun təhlükəsizliyi çox yüksək səviyyədə təmin olundu və onun oğurlanması əməliyyatı baş tutmadı”.
E.Mustafayev deyib ki, həmin vaxt T.Heydərov Britaniyadan Belçika forumuna gəlibmiş: “Bundan sonra Azərbaycandan mənə çıxdılar və bizneslə məşğul olduğumu bildikləri üçün dedilər ki, Azərbaycan gömrüyündə sənə heç bir problem olmayacaq. Bu vədi və prezident İlham Əliyevin Avropadakı Azərbaycan diasporunun güclənməsinin ermənilərlə informasiya savaşında ölkəmizin xeyrinə olduğunu və dövlətin buna maraq göstərməsi ilə bağlı dediklərini nəzərə alaraq düşündüm ki, Azərbaycan gömrüyündə problemlə üzləşmərəm. Azərbaycana ilkin olaraq, test üçün 50 min avroluq mal vurdum. İnanın gömrükdə məni elə günə qoydular ki, 23 ildir yaşadığım qürbət ölkəyə 20 avro ilə qayıtdım”.
E.Mustafayev əlavə edib:
“Bu mənim Kəmaləddin Heydərova etdiyim, bu da onun nəzarətində olan gömrüyün mənə etdiyi. Taleh Heydərovun oğurlanması planı haqda daha çox şeyləri bilirəm və açıqlamağa hazıram. Planını pozduğum qüvvələr isə indi də mənimlə düşməndi. Amma bu məni qorxutmur, millətimin bir gənc övladına qarşı olan təhlükənin qarşısını almışam və kim olmasına baxmayaraq, bununla şərəf duyuram”.
Mustafayevin açıqlaması və nazir oğlu barədə iddiaları ilk baxışdan qərəzli görünə bilər. Ehtimal olunur ki, o gömrükdə üzləşdiyi problemin əvəzində qisas almaq üçün Heydərovun əleyhinə şayiə yayıb. Çünki nazir oğlunu oğurlamaq planı olan mafiya qruplaşması hər halda əməliyyat sirrini açıqlamaz. Əgər belə plandan dostluq cəmiyyətinin sədri xəbər tutubsa, deməli qeyri-ciddi məsələ olub.
Nazir oğlunu oğurlamaq istəyən qüvvələr bunu qeyd-şərtsiz dərhal həyata keçirməlidir. O baxımdan E.Mustafayevin açıqlaması şübhə doğurur. Məsələni aydınlaşdırmaq üçün Hollandiyada yaşayan mühacirlərdən biri ilə əlaqə saxladıq. Adının çəkilməsini istəməyən mənbə internet vasitəsi ilə “Gündəm-xəbər”ə bildirdi ki, əslində nazir oğlunun oğurlanması planı olmayıb. Sadəcə, həmin dövrdə nazirlə konflikti olan qüvvələr arasında biznes savaşı başlanıb.
Onlar da Heydərovu oğlunu oğurlamaqla hədələyiblər. Daha doğrusu, onu yola gətirmək üçün şantaj xarakterli mesaj yollayıblar. Hətta nazir o zaman oğlunun müvəqqəti başqa ölkədə gizlədib. Əslində T.Heydərovun oğurlanması nəzərdə tutulmayıb. Atasından tələb olunan şərti qəbul etməsi üçün belə bir addım atılıb. Mənbə qeyd etdi ki, bu faktın 7 il sonra üzə çıxması kimlərinsə maraqlarına xidmət edir.
A.Ağasoy