Azad Mursaliyevin ölkədən çıxmasına
qoyulan məhdudiyyət aradan götürülmür

Fəaliyyəti dayandırılmız ABU-nun rektoru Elşad Abdullayevlə bu və ya digər şəkildə baş verən qanunsuzluqlar getdikcə artır. Video çəkilişlərlə hələ aylar öncə ifşa olunan Gülər Əhmədovanın həbsini böyük bir hadisə kimi təqdim edən hüquq-mühafizə orqanları əslində yenə də öz qərəzini saxlamaqdadır. Bu dəfə E.Abdullayevin şəxsi nümayəndəsi, həm də bacısı oğlu Azad Mursaliyevin vətəndaş hüquqları kobud şəkildə pozulub.
Məlumat üçün bildirək ki, ötən il noyabrın 1-də şəxsi işi ilə əlaqədar olaraq Şimali Kipr Türk Respublikasına getmək üçün “Türk Hava Yolları” şirkətindən Bakı-İstambul-Ərcan marşurutu üzrə 426 manat 69 qəpiyə təyyarə bileti alır. O 02 noyabr 2012-ci ildə saat 02.30 radələrində Bakı şəhər beynəlxalq hava limanına gəlir və limanın qeydiyyat şöbəsinə yaxınlaşıb, qeydiyyatdan keçir. Amma saat 03.00-da hava limanında dövlət sərhəd xidmətinin yoxlanışından keçərkən həmin xidmətin əməkdaşları tərəfindən pasportu alınır və hava limanının inzibati binasında yerləşən sərhəd məntəqəsinə məxsus növbətçi hissəyə aparılaraq orda saxlanılır.Heç bir səbəb göstərilmədən orda 7 saat saxlanıldıqdan sonra saat 10.00-da Azərbaycan Respublikası Baş prokurorluğunun Telman A.Mursaliyev adlı əməkdaşına təhvil verilir və o Azərbaycan Respublikası Baş prokurorluğunun inzibati binasına aparılır.
Bizimlə söhbətində Azad bəy dedi: “Yolda Telmanla söhbət edən zaman mənə məlum oldu ki, dayım Abdullayev Mahir İslam oğlunun oğurlanması (öldürülməsi) faktına görə başlanmış cinayət işinin istintaqı ilə əlaqədar mənim ölkədən getmək hüququm məhdudlaşdırılmışdır.Azərbaycan Respublikası Baş prokurorluğunun inzibati binasında mən Telmanla birlikdə dayım Abdullayev Mahir İslam oğlunun oğurlanması (öldürülməsi) faktı ilə bağlı cinayət işinin istintaqını aparan müstəqil istintaq komissiyasının iş otağında olduq. Komissiyanın sədri Elmar Camalov, Faiq, Yasin adlı müstəntiqlər və digər tanımadığım şəxslər var idi. Mən onlara öz narazılığımı bildirib onlardan hansı cinayət işinə və hansı əsasla mənim ölkədən getmək hüququmu məhdudlaşdırdıqlarını soruşdum. Elmar Camalov bildirdi ki, bu işdə onların günahı yoxdur, cinayət işinin istintaqını aparan əvvəlki müstəntiq tərəfindən sənin ölkədən getmək hüququn məhdudlaşdırılmışdır. Bu söhbətdən sonra mən sərbəst buraxıldım, mənim hər hansı izahatım və ifadəm alınmadı. Bu da onu göstərir ki, Baş prokurorluq hər hansı hüquqi zəruriyyət olmadan mənim ölkədən getmək hüququmu əsassız olaraq məhdudlaşdırmışdır”.
Bu hadisədən sonra A.Mursəliyev ölkədən çıxmasına qoyulan məhdudiyyətin qanunsuz olması və bu məhdudiyyətin ləğv olunması ilə bağlı məhkəməyə üz tutur: “Hesab edirəm ki,Azərbaycan Respublikasının Baş prokurorluğu mənim ölkədən getmək hüququmu əsassız olaraq məhdudlaşdırmaqla Azərbaycan Respublikası Konstitusiyasının 28-ci maddəsində nəzərdə tutulmuş azadlıq hüququmu pozmuşdur. Belə ki, Azərbaycan Respublikası Konstitusiyasının 28-ci maddəsinin 3-cü hissəsinə əsasən, qanuni surətdə Azərbaycan Respublikasının ərazisində olan hər kəs sərbəst hərəkət edə bilər, özünə yaşayış yeri seçə bilər və Azərbaycan Respublikasının ərazisindən kənara gedə bilər.
Eyni zamanda “Ölkədən getmək, ölkəyə gəlmək və pasportlar haqqında” 14 iyun 1994-cü il tarixli Azərbaycan Respublikası Qanununun 1-ci maddəsinə əsasən, Azərbaycan Respublikasının hər bir vətəndaşı (bundan sonra-vətəndaş) Qanunda nəzərdə tutulmuş qaydada xüsusi ayrılmış nəzarət məntəqələrindən keçib sərbəst surətdə ölkədən getmək və ölkəyə gəlmək hüququna malikdir. Vətəndaş ölkədən getmək və ölkəyə gəlmək hüququndan məhrum edilə bilməz. Bu hüquq yalnız aşağıdakı hallarda məhdudlaşdırıla bilər:
1) Vətəndaş cinayət işi üzrə şübhəli və ya təqsirləndirilən şəxs qismində tanındıqda, məhkum edildikdə və ya barəsində tibbi xarakterli məcburi tədbirlər tətbiq edildikdə-müvafiq olaraq barəsində cinayət təqibi üzrə icraat başa çatanadək, cəzasını çəkib qurtaranadək və ya cəzadan azad edilənədək, yaxud tibbi xarakterli məcburi tədbirlərin tətbiqi ləğv edilənədək;
2) Vətəndaş müəyyənləşdirilmiş qaydada müddətli hərbi xidmətə çağırıldıqda-müddətli həqiqi hərbi xidmət keçənədək və ya qanuna uyğun olaraq ondan azad edilənədək;
3) Beynəlxalq tibbi sanitariya qaydalarına və ya Azərbaycan Respublikasının tərəfdar çıxdığı dövlətlərarası müqavilələrə uyğun olaraq profilaktik peyvəndlər tələb olunan ölkələrə gediş-gəliş zamanı profilaktik peyvəndlərin aparılmasınadək;
4) Məhkəmə qərarı əsasında verilmiş icra sənədinin könüllü icra üçün müəyyən olunmuş vaxtda üzrsüz səbəbdən icra edilməməsinə görə vətəndaşın ölkədən getmək hüququnun müvəqqəti məhdudlaşdırılması barədə məhkəmənin qanuni qüvvəyə minmiş qərarı olduqda-məhdudlaşdırmanın götürülməsi barədə qərar qəbul edilənədək.
Dövlət sirri ilə işləməyə buraxılmış şəxslərin tanış olmağa buraxıldığı məlumatın məxfilik müddəti bitənədək, lakin 5 ildən çox olmamaq şərtilə, xarici ölkəyə daimi yaşamağa getmək hüququmüvəqqəti məhdudlaşdırıla bilər.
Hər hansı bir ölkədə fövqəladə vəziyyət və ya insan həyatı, sağlamlığı və azadlığı üçün təhlükə yaranarsa, Azərbaycan Respublikasının Xarici İşlər Nazirliyi Azərbaycan Respublikasının əhalisini dərhal xəbərdar etməklə, vətəndaşlara həmin ölkəyə getməkdən müvəqqəti çəkinməyi tövsiyyə edə bilər.
Mənimlə bağlı ölkədən getməyimin məhdudlaşdırılmasına səbəb olan qanunvericilikdə nəzərdə tutulmuş hər hansı bir hal baş vermədiyindən prokurorluq orqanı qeyd olunan qanunun tələblərini pozmuşdur.
Göründüyü kimi prokurorluq orqanının qanunazidd inzibati aktı nəticəsində mənə 426 manat 69 qəpik məbləğində maddi ziyandan əlavə, qanunsuz olaraq ac-susuz saxlanılmağımla əlaqədar mənə eyni zamanda mənəvi ziyan da dəymişdir ki, həmin ziyanı mən 10 min manat dəyərində qiymətləndirirəm.
Azərbaycan Respublikası İnzibati Prassesual Məcəlləsinin 2.2-ci maddəsinə əsasən, şəxsin hüquq və vəzifələri ilə bağlı inzibati orqan tərəfindən qəbul edilmiş inzibati aktın mübahisələndirilməsinə (ləğv olunmasına və dəyişdirilməsinə) dair iddialara (mübahisələndirmə haqda iddia), eləcə də inzibati mübahisələrin həlli ilə bağlı əmlak tələbinə, habelə inzibati orqanların qanunsuz qərarları (inzibati aktları) və ya hərəkətləri (hərəkətsizliyi) nəticəsində vurulmuş ziyana görə kompensasiyanın ödənilməsi tələbinə dair iddialara inzibati məhkəmə icraatı qaydasında baxılır.”
Onu da bildirək ki, 1 saylı Bakı İnzibati-İqtisad Məhkəməsində işə baxılır və proses zamanı Azərbaycan Respublikası Daxili İşlər Nazirliyinin Baş Əməliyyat və Statistik İnformasiya şöbəsinin A.Mursaliyevin Dövlət Sərhəddini keçməsinə heç bir məhdudiyyət qoyulmaması haqda rəsmi məktubu da ortaya qoyulmasına baxmayaraq bu günə qədər prokurorluğun qərarı ləğv edilməmişdir. Digər bir tərəfdən məhkəmənin uzanması ilə məhkəmə baxışının müddəti haqda prosedur qayda da pozulmuşdur.
Elçin