Sosial partlayış gündəmini belə dəyişdilər

2012-ci ilin Oktyabr ayından etibarən Azərbaycanda siyasi situasiya gərginləşməyə başladı. Ölkədə Azərbaycan Beynəlxalq Universitetinin sabiq rektoru Elşad Abdullayevin videolarının sübut etdiyi rüşvət qalmaqalından sonra ictimaiyyət ciddi narahatlıq keçirməyə başladı. Elşad Abdullayevin olay yaradan videolarında adı hallanan şahidlərdən biri Sevinc Babayeva müəmmalı şəkildə Türkiyədə vəfat etdi. Onun ölümünün səbəbləri haqqında ciddi narahatlıqlar olmasına, hətta Sevinc Babayevanın ölmədiyinə dair ciddi təhlil yazılarının olmasına baxmayaraq DNA testi aparılmadı. Onun cəsədinin həqiqətən ona aid olub olmaması ilə bağlı ictimaiyyətdən bir hüquqşünas, kriminalist, hüquq müdafiəçisi Sevinc Babayevanın cəsədini şəxsən görmədi. Bundan sonra Gülər Əhmədova fonunda müzakirələrin intensivləşməsi, ölkədə ciddi narazılıqların başlamasına təkan verəcək həddə gəldi.

2013-cü ilin birinci ayının birinci həftəsindən etibarən ölkə insanının sosiallaşması prosesi başladı.

Bu sürəcdə:
1) 12 yanvar "əsgər ölümlərinə yox" şüarı ilə, heç bir siyasi partiyanın təşkilatçılığı olmadan son 20 ildə birinci dəfə ölkə insanı özü küçələrə axışdı;
2) Binə ticarət mərkəzində "haqq"ların artırılmasından dolayı, ticarətçilərlə polislər arasında Binə ticarət Mərkəzinin ətrafında ciddi toqquşma baş verdi. Bu vəziyyətdə silahlardan, rezin güllələrdən istifadə edildi;
3) Yanvar ayının 24-dən etibarən, sosial müdafiə nazirinin oğlu iddia edilən şəxsin İsmayıllı rayonunda yerli əhalini təhqir etməsi səbəbi ilə, əhalinin Ələkbərovlar ailəsinə məxsus olan obyekt və daşınmaz əmlakı linc edərək yandırması ilə vəziyyət gərginləşdi.
Bunun ardından həmin bölgəyə digər rayonların yerli güc strukturlarının bölmələri həmçinin, Bakıdan gedən yüksək çinli məmurların müşaiyyətində əməliyyat keçirildi.
Rezin güllələrdən və zor gücündən istifadə edilməsi bahasına etiraz yatırıldı. Çox sayda həbs olunanlar var.

Hökumətin əhalinin etirazına münasibəti nədən eyni məzmunda idi?

Bütün bu proseslərin fonunda hökümətin hər dörd məsələ ilə bağlı münasibəti bir-birindən fərqlənmədi. Gülər Əhmədovanın deputatlıq mandatından məhrum edilməsindən başqa geridə qalan üç olay "xarici qüvvə" təsiri kimi qiymətləndirilərək ölkə insanının etirazlarının səbəbsiz olduğu bütün bu məsələlərdə heç bir məmurun, biznesmenin cəzalanmaması ilə sübut olundu.
Əsgər ölümləri məsələsində, sadəcə Ceyhun Qubadovun birbaşa komandirləri - bölük və tağım komandiri cəzalandırıldı, digər komandanlığa isə cinayət işi açılmadı. Son illərdə 647 nəfər əsgərin müəmmalı ölümünə görə Müdafiə Nazirliyinin rəhbərliyi istefaya göndərilməməklə "haqlı" çıxarıldı."Binə" məsələsində "haqların" yersiz və zamansız olaraq artırılmasında, ticarət mərkəzinin rəhbərliyinin cəzalandırılmaması, və ya əmək müqavilələrinə cavabdeh olan orqan - Əmək və Əhalinin Sosial müdafiəsi Nazirliyinin, Vergilər Nazirliyinin, və Hüquq Mühafizə Orqanlarının bu məsələnin nədən qaynaqlanması və kimlərin təqsirkar olması, hansı motivdən irəli gəlməsinə dair bir araşdırmanı ictimaiyyətə bildirilməyərək, biznes şəbəkəsinin maraqlarının vətəndaş maraqlarından üstün tutulduğunun altı cizildi.
Sonuncu olay - İsmayıllı hadisələrində bir başa təqsirkar olan Ələkbərovlar ailəsindən bir nəfərin belə cəzalandırılmaması, hökumətdə nazir postu tutan bir şəxsin qardaşının, Rayon İcra Hakimiyyəti başçısı olaraq məsuliyyət daşıması ölkədə hökümət tərəfindən göz ardı edildi. Yenə əhali cəzalandırıldı.

Əkrəm Əylislinin "Daş yuxular"ı - əhaliyə yuxu dərmanı, manipulyasiyası rolunda

Əkrəm Əylislinin "daş yuxular" romanını yazaraq Azərbaycan xalqını təhqir etməsi olayı ilə ölkə gündəmini başdan-başa zəbt etməsi, əhalinin süni şəkildə ölkədəki problemlərdən kənar tutularaq, məmurun əhali ilə polis qarşıdurmasında motiv və səbəb yaratmasının hamısı ört basdır edildi. "Daş yuxular"a etiraz edən hökumət yanlı ziyalıların əslində əhaliyə qarşı rezin güllədən istifadə olunmasına qarşı etiraz bildirməməsinin dərinində ideoloji, texniki, taktiki gedişlə gündəmi dəyişmək rolunu oynaması faktından irəli gəlirdi.
Gəlin düşünək. Əkrəm Əylislinin romanına 20 il müddətində heç bir aksiya keçirilməyə imkan verilməyən Naxçıvanda MR-ı belə "ayağa" durdu.Vətənpərlik şousunu arxasında Azərbaycan ictimaiyyətinin psixoloji gərginliyinin, sosial etiraz gücünün yatırılması, yuxuya verilməsi marağının dayandığı əslində tam olaraq meydandadır. Hökumət istəsəydi, Əkrəm Əylislini bu romanının yayımından dərhal sonra yanına çağırıb səssizcə bu olayı ört basdır edərək, tirajlanan romanları gizli şəkildə, internet və çap orqanından qaldıra bilərdi. Axı, o zamana qədər heç erməni mətbuatı, ictimaiyyəti bundan xəbər tutmamışdı. Bunun müzakirəsinin telekanallarda aparılmasının, Əkrəm Əylislinin anti-piarla reklam olunmasının Ermənistanın əlinə ciddi, müzakirə edə biləcəyi və Azərbaycanın qarşısına xarici siyasətdə kart olaraq istifadə edə biləcəyi bir faktı niyə verdi hökumət?
- Çünki, Əkrəm Əylislinin müzakirəsi, linc edilməsi əhalinin gözündə hədəf yayındırdı. Artıq insanların hədəfi, Füzuli Ələkbərovun xalqı təhqi edən oğlu deyil, Kəbirə Məmmədova, Səfər Əbiyev, Gülər Əhmədova, bütövlükdə bu şəxslərin təmsil olunduqları hökumət deyil - Əkrəm Əylislidir!
- Azərbaycan hökuməti bu addımları ilə Azərbaycanın dövlət maraqlarını əslində, birbaşa hökumətin təhlükəsizlik maraqlarına qurban verərək Ermənistanın əlinə müzakirə edəcəyi, Azərbaycana qarşı istifadə edəcəyi bir fakt verdi.
Hamımıza bir şey aydındır: Ceyhun Qubadovun fotalarını onun öz doğma anası mətbuatda yaymışdı. Fotolardan da onun bədənində ciddi xəsarət izləri görünürdü. Anası səs qaldırdı, xalq, əsgər anasının səsinə səs verdi. Ancaq, YAP nümayəndələri, millət vəkilləri onun anasını ziyarətə getdikdən sonra, baş prokuror Zakir Qaralovun əsgər Ceyhun Qubadovun anasını şəxsən qəbul etməsindən sonra nə baş verdi? Ceyhun Qubadovun anası, aksiyalara qarşı olduğunu, oğlunu aksiyaların qaytarmağayacağını bildirdi. Ardındanda özünün yaymış olduğu oğlunun fotolarının mediadan yığışdırılmasını tələb etdi. Aydın Mirzəzadənin o zaman Ceyhun Qubadovun anasının yanına gedəndə mətbuata açıqladığı bir sözü vardı: "Ona telefonumu verəcəm və nə qədər imkanım varsa, həmişə həmin qadına dayaq olacağam"
Görünən odur ki, hökumətin bir nümayəndəsinin yardım əli hər şeyi bağlamağa yetərli oldu. Ancaq, Ceyhun Qubadov anasının tək övladı idi... Sual budur, qüdrətli hökumət niyə Əkrəm Əylisliyə öz nümayəndəsinin nömrəsini vermək istəmədi?
Bununla da beynəlxalq aləmdə bizə indidən sonra uzun müddət istifadə edəcək bir faktı Erməni propogandasının, Erməni dövlətinin əlinə verdi. Öz komandasını qorumaq naminə...
Etatist Analitik Qrupu