“Milyarderlər İttifaqı” Muxtar Respublikada dayaqlarını
möhkəmləndirməyə çalışsa da, plan de-şifrə olunub

Şərti adı “Milyarderlər İttifaqı” olan Ümumrusiya Azərbaycanlılarının Təşkilatı İttifaqı (ÜATİ) yeni bir proses başladıb. İttifaqın Naxçıvana təsir imkanları nəzərdən keçirilib və bu məqsədlə Abbas Abbasova təlimatlar verilib. A.Abbasovun missiyası yaxın əlaqələrə malik olduğu Naxçıvan Muxtar Respublikası baş nazirinin sabiq müavini, keçmiş kənd təsərrüfatı naziri Məmməd Abbasovla dialoq yaratması olub. A.Abbasov naziri vasitəsilə gizli əlaqələr yaradaraq qurumun Naxçıvandakı dayaqlarını yaratmağa cəhd göstərib.
Bu barədə özəl qaynaqdan aldığımız məlumata görə, xarici ölkələrdən birində keçirilən gizli görüş sonra de-şifrə olunub. Buna görə də M.Abbasov vəzifəsini itirib. Məlumata əsasən o, vəzifəsindən məhz «Milyarderlər İttifaqı» ilə qurduğu gizli əlaqəyə görə azad edilib. Tərəflər arasında razılığa əsasən sabiq nazir Naxçıvanda təşkilatın özəyini yaratmalı, gizli təbliğat işinə başlanmalıydı.
Ona RATİ-dən böyük maliyyə dəstəyi veriləcəyi vəd olunmuşdu. Amma görüşdən xəbər tutan Naxçıvan rəhbərliyi dərhal onu vəzifəsindən kənarlaşdırıb. Bu faktın üzərinə çox gedilməsə də, qaynağımız iddia edir ki, M.Abbasovun postundan uzaqlaşdırılmasının gerçək səbəbi “Milyarderlər İttifaqı” ilə danışıqlara getməsi olub. Naxçıvan rəhbərliyi onu vəzifədən azad etmək üçün əvvəlcə rəsmi Bakı ilə razılaşdırıb. Mərkəzi hakimiyyət A.Abbasovla nazirin əlaqələrini dəqiqləşdirəndən sonra onun istefasına “hə cavabını verib.
Ümumiyyətlə, RATİ-nin Naxçıvandan hərəkətə keçməsi iqtidarı bərk qəzəbləndirib. Hakimiyyət hər “daş altından” Abbas Abbasovun çıxdığını görür və artıq sxemlər qurulmalı olduğunu aydınlaşdırır. Reallıq budur ki, A.Abbasov Əliyev iqtidarına ciddi maneədir və “Milyarderlər İttifaqı” Azərbaycanla bağlı planlarını məhz bu şəxsin əli ilə həyata keçirir.
Diaspora işləri üzrə Dövlət Komitəsinin rəhbəri Nazim İbrahimovun “Yeni Müsavat”a müsahibəsindəki tezislər, prezidentlə görüşdən sonra qaranlıq qalan müzakirələr göstərir ki, hökumət A.Abbasovla barışa bilməyib, problemlər qalıb, Rusiya rəsmi Bakını divara dirəyib.
Mənbənin sözlərinə görə, yaz aylarında RATİ-nin fəaliyyəti açıq fazaya keçəcək və Əliyev-Putin münasibətlərinin hansı səviyyədə olduğu görünəcək. Qaynağımız iddia edir ki, “Milyarderlər İttifaqı” Naxçıvan əməliyyatını uğursuz başa vursa da, hakimiyyətə “əzələ nümayiş” etdirə bilib.
Hakimiyyət daxilə nəzarət edə bilir. Müxalifət, mətbuat, QHT-lər nəzarət altında. Xalq spekuliyasiyalar və qorxu hesabına sakitləşdirilib. Ermənistanda seçkilər formal keçirilib və Qərb Sərkisyanın legitimliyini tanıyıb. Deməli, Qərb Azərbaycandakı seçkilərə münasibəti də birmənalı olacaq. Yerdə qalır Rusiya amili.
O da iqtidar üçün qaranlıq bir nöqtədir və hələlik düyünlər açılmır. Hökumət gözləyir ki, Rusiya planlarını açıq şəkildə “Milyarderlər İttifaqı”nın timsalında nümayiş etdirsin, ondan sonra əks-hücuma keçsin. Rusiya da bunu etmir və məxfi şəkildə işləyir. Hazırda əsas narahatlıq şimal-qərb zonasıdır və Rusiya ilə sərhəd bölgələrdə etirazların qızışmasından çəkinirlər. Güman olunur ki, Rusiya etnik separatçılıq “kartı”nı işə salıb ölkəni qarışdıra bilər. Bu da seçki ilində Əliyevə sərf etmir. Hətta Dağıstana gətirilən rəhbər Ramazan Abdulatipovun RATİ nümayəndəsi olması da rəsmi Bakıya bir işarədir.
Aslan