Rusiya Azərbaycan iqtidarını seçki ilində dalana
dirəyib və Moskva qətiyyən barışmaq istəmir

Rusiyanın Azərbaycan hakimiyyətini seçki ilində dalana dirəyib. Moskva bütün qüvvələrini səfərbər edərək iqtidarı sıxışdırır və diz çökdürməyə çalışır. “Milyarderlər İttifaqı” əli ilə Əliyevlər klanına qarşı davamlı təzyiqlər var və artan gərginlik səngimək bilmir. Azərbaycan Dövlət İqtisad Universitetinin (ADİU) Dərbənd filialının üzləşdiyi problem buna bariz nümunədir. Bəs, Putin Əliyevdən nə istəyir? Nə verib ala bilmir? Seçki ilində qoparmaq istədiyi yağlı tikə nədir ki, bu qüvvələr baş-başa gəliblər?
“Gündəm xəbər”ə verilən məlumata görə, Rusiya ilə Azərbaycan iqtidarı arasında münasibətlərin korlanması Azərbaycan hakimiyyətinə sərf edir.
Bununla İ.Əliyev Qərbə yaxınlaşmağa çalışır. Rusiyadan son vaxtlar azərbaycanlıların deportasiyası halları da artıb, hətta intensiv xarakter alıb. Federal Miqrasiya Xidməti və Federal Təhlükəsizlik Xidmətinin əməkdaşları Rusiyanı iri şəhərlərində, o cümlədən regionlarda müntəzəm “oblava”lar həyata keçirir. Bu zaman sənədlərində hansısa problemlər olan Azərbaycan vətəndaşlarının deportasiyasına qərar verilir. Rusiya KİV-lərində vaxtaşırı olaraq sənədləri qaydasında olmayan Azərbaycan vətəndaşlarının deportasiyası haqda informasiyalara rast gəlmək mümkündür. Kreml Qərbə sığınan keçmiş sovet respublikalarını sıxışdırmaq üçün miqrantların deportasiyasından sui-istifadə edir.
Eyni zamanda Rusiya bu ilin yayından başlayaraq Dağıstanın Azərbaycanla sərhəd ərazilərinə böyük həcmdə hərbi qüvvə, o cümlədən minlərlə hərbi texnika cəmləşdirib. Federal rəsmilərdən heç biri Dağıstana bu qədər hərbi qüvvənin niyə cəmləşdirildiyi barədə tutarlı izahat verməyiblər. Rusiyanın Azərbaycandan istəklərindən biri Putinin irəli sürdüyü Avrasiya İttifaqının əsasını təşkil edəcək MDB Gömrük Birliyinə daxil olmaqdır. Əliyev “Rossiya-24” kanalına müsahibəsində bu mövzuya toxunub və deyib ki, Azərbaycan hələlik Gömrük İttifaqına daxil olmağın faydasını görmür. Qəzetimizə daxil olan məlumatlara görə, Kremlin tək istədiyi Avrasiya İttifaqı deyil.
O cümlədən TANAP layihəsinə qoşulması rəsmi Bakının zibilə salıb. Bu Moskvanı möhkəm qəzəbləndirib və onun əleyhinə olan iqtisadi layihədə Azərbaycanın iştirakı Putinlə Əliyevin münasibətlərini kəskinləşdirib. Hətta Qəbələ RLS-ni bağlanması da Kremlin vecinə olmayıb. Bu faktor Putin üçün əhəmiyyətli sayılmaz. Ancaq TANAP və Avrasiya İttifaqı məsələsi tərəflərin arasından “pişik keçməsinə” səbəb olub. Yada salaq ki, 2008-ci ildən bəri Putinlə Əliyev arasında görüş olmayıb. Sonuncu dəfə ötən ilin dekabrında Rusiya prezidenti Azərbaycan rəhbərini doğum günü münasibəti ilə telefon açaraq təbrik edib.
Hakimiyyət düşərgəsindən gələn məlumatlar göstərir ki, iqtidar daxilində Rusiya ilə bağlı ciddi narahatlıqlar hökm sürür. Hakimiyyətdə narahatdırlar ki, Putinin Azərbaycana qarşı doğrudan da hansısa təhlükəli planları var. Narahatlıqları artıran səbəblərdən biri də odur ki, bütün qeyri-rəsmi və rəsmi kanalların işə salınmasına baxmayaraq Moskva Bakıyla anlaşma əldə etməyə meyl göstərmir, ümumiyyətlə müzakirələrdən yayınır.

Aslan