«Düşmənimin yerinə dostum gəlir» deyə, Administrasiyadakı dəyişikliklərə sevinən nazir Çexiyada otel tikdirir!

gundemxeber.az Prezident Administrasiyasındakı dəyişikliklər - Administrasiya rəhbərinə müavinlər təyin olunması, vəzifəsi yüksəldilənlər arasında xeyli vaxtdır mətbuatda və hakimiyyət çevrələrində adı Ramiz Mehdiyevi əvəzləməyə ən şanslı namizədlərdən biri kimi keçən Zeynal Nağdəliyevin də olması Əmək və Əhalinin Sosial Müdafiəsi Nazirliyində (ƏƏSMN) sevinclə qarşılanıb. Bu barədə «Azpolitika.info»-ya bu nazirlikdəki etibarlı mənbə bildirib.
Mənbənin sözlərinə görə, nazir Füzuli Ələkbərov sevincini açıq şəkildə ifadə edir, yaxın ətrafına «düşmənimin yerinə dostum gəlir» deməkdən də çəkinmir. F.Ələkbərovun «düşməni» Ramiz Mehdiyev, «dostu» isə vaxtilə «Komsomol»da bir yerdə işlədikləri və aralarında yaxın münasibətlər olan Zeynal Nağdəliyevdir. Bəzi məlumatlara görə, F.Ələkbərovun himayəçilərindən biri də elə Z.Nağdəliyevdir.
F.Ələkbərovun proqnozunun reallaşıb-reallaşmayacağını bilməsək də, fikrimizcə, onun Ramiz Mehdiyevin «yıxılmasına» sevinməsi üçün həqiqətən də ciddi əsasları var. Məsələ ondadır ki, F.Ələkbərov vəzifəyə təyin olunduğu ilk günlərdən Administrasiya rəhbərini saymamaq kursunu götürüb və bu «yalnışlığın» bədəlini də çox ağır ödəyir. PA rəhbəri mütəmadi olaraq Respublika Prokurorluğunun Korrupsiyaya Qarşı Mübarizə İdarəsinin vasitəsilə F.Ələkbərovu cəzalandırır. Belə ki, son iki ildə ƏƏSMN-in onlarla yüksək vəzifəli şəxsi rüşvət alarkən cinayət başında yaxalanıb. Sonuncu belə həbs bir neçə gün əvvəl həyata keçirilib. Baş Prokurorluğun mətbuat xidmətindən verilən məlumata görə, Ucar rayon sakininin arvadına əlillik dərəcəsinin təyin edilməsi üçün ondan rüşvət tələb edilməsi barədə müraciəti Baş prokuror yanında Korrupsiyaya qarşı mübarizə idarəsi tərəfindən araşdırılıb.
Baş prokuror yanında Korrupsiyaya qarşı mübarizə idarəsinin əməkdaşları tərəfindən aparılmış əməliyyat nəticəsində Əmək və Əhalinin Sosial Müdafiəsi Nazirliyinin 36 №-li Tibbi Sosial Ekspert Komissiyasının sədri vəzifəsində işləyən İslam Bayramov komissiyanın Ucar şəhərində yerləşən inzibati binasındakı iş otağında rayon sakininə əlillik təyin olunması ilə əlaqədar 2 000 manat məbləğində rüşvət alarkən cinayət başında yaxalanıb.
Şübhə yoxdur ki, əvvəllər də qeydə alınan onlarla bu cür həbslərin istintaqı zamanı təqsirləndirilənlər ƏƏSMN-dəki rüşvət mexanizmini ifşa edən ifadələr veriblər və bu materiallar hansısa gün üçün saxlanılır...
Amma istər bu həbslərin davamlı proses şəklini alması, istərsə də özəl kanallar vasitəsilə əldə olunan məlumatlar onu göstərir ki, Füzuli Ələkbərov da geri çəkilmək, rüşvət mexanizmini durdurmaq niyyətində deyil. Hətta Korrupsiya İdarəsinin təqiblərindən yaxa qurtarmaq üçün hansısa qaraja sığınmaq (!) bahasına olsa da, bu mexanizmi işlətməkdə qərarlıdır. Bu qaraj söhbəti çox maraqlı söhbətdir və bir qədər sonra bu məsələyə qayıdacağıq.
Hələlik mexanizmin özündən və onun başında duranlardan danışaq. Mənbəmizin bildirdiyinə görə, xeyli vaxtdır ki, nazirliyin «qara mühasibatını» F.Ələkbərovun etimadını qazanaraq qısa vaxtda mətbuat xidmətinin rəhbərliyindən nazirliyinin Aparatının rəhbəri vəzifəsinə yüksələn Elnur Kələntərli aparır. Necə deyərlər, bütün almaq-vermək işlərinə Elnur müəllim baxır.
Son vaxtlar isə onun bir ayağı Bakıda, bir ayağı Çexiyadadır. Buna səbəb F.Ələkbərovun Çexiyada otel tikdirməsidir. Bu tikintiyə rəhbərliyi Elnur Kələntərli edir.
Yəni başa düşəcəyiniz bu aralar F.Ələkbərovun «rasxodu» daha da artıb. Əlbəttə ki, bütün bu «rasxodlar» da Azərbaycan xalqının, ən acınacaqlısı isə odur ki, onun ən imkansız təbəqəsinin, ünvanlı yardıma ehtiyacı olan yoxsulun, əlilin, pensiyaçının cibindən oğurlanmalıdır! Oğurlanır da!
Məsələn, mənbənin məlumatına görə, son vaxtlar VTEK-lərin əlillik dərəcələrinin təyini üçün vətəndaşlardan tələb etdikləri rüşvətin miqdarı daha da artırılıb - əlavə 600 manat Çexiyada otel tikintisinə «dəstək pulu».
Bir tərəfdən rüşvət mexanizmi işləsə də, bir tərəfdən də Korrupsiya İdarəsi öz işində - tuthatutda olduğundan təbii ki, ƏƏSMN-in rəhbərliyində oturmuş stajlı korrupsionerlər müəyyən azdırıcı taktiki gedişlər etmək, prokurorluğun əməliyyatçılarını yayındırmaq üçün ideyalar düşünmək və həyata keçirmək məcburiyyətindədirlər. Mənbəmiz belə ideyalardan biri barədə azpolitika.info-ya danışıb. Söhbət yuxarıda üstündən keçdiyimiz «qaraj əməliyyatından» gedir. Fikrimizcə, yazının bundan sonrakı hissəsi MTN və Korrupsiya İdarəsinin əməliyyatçılarını xüsusilə maraqlandırmalıdır!
Məlumata görə, hal-hazırda ƏƏSMN-in binasında bir manatın belə söhbəti gedə bilməz. Belə ki, nazirliyin bütün «qara mühasibatlığı» Elnur Kələntərlinin nazirliyin binası ilə üzbəüz yerləşən yeni «göydələnin» alt qatından icarəyə götürdüyü iki qarajdan idarə olunur! Hamı təlimatı burda alır, hamı verəcəyini burda verir! Bütün təlimatlar yazılı şəkildə (Görünür Elşad Abdullayev F.Ələkbərovun və işçilərinin də gözünü qorxudub. Səs yazılması ehtimalını nəzərə alırlar) və Ezop dilində verilir! Məsələn, təxminən bu cür: «Danışmışdıq ki, dekabrın 21-nə 40 şam alasınız. Amma 35-i gəlib çıxıb. Bu nə məsələdir?»
Bu işlərdə Füzuli Ələkbərovun sağ əli Elnur Kələntərlidirsə, Elnur Kələntərlinin də sağ əli nazirliyin Heybət adlı işçisidir. «Qaraj əməliyyatının» texniki tərəflərini (qəbul etmək, saymaq, yeni təlimatı çatdırmaq və sairə) məhz bu Heybət həll edir.
Beləliklə, gün kimi aydındır ki, Baş Prokurorluq yanında Korrupsiyaya Qarşı Mübarizə İdarəsinin mütəmadi olaraq ƏƏSMN strukturlarında həyata keçirdiyi həbslər heç də ayrı-ayrı tamahkar məmurların adi rüşvətxorluğunun nəticəsi deyil, bu nazirlikdəki mütəşəkkil cinayətkar dəstənin sistemli fəaliyyətidir! Elədirsə, niyə həbslər «yuxarıya» doğru genişlənmir, başa düşmək asan olduğu qədər də çətindir!

Rasim ƏLİYEV. azpolitika.info