Və ya 19 saylı TSEK-in sədri A. Yusifovun Şamaxı və İsmayıllıda açdığı bazarın gizli təfərrüatları

Son zamanlar ölkədə korrupsiyaya qarşı mübarizə yenə də gündəmin əsas mövzularından biri olaraq qalmaqdadır. Ən yaxşı halda korrupsiyanın kütləvi hal almasının etiraf olunması təqdirə layiq haldır. Hətta hamı gördü ki, dövlətin marağı olsa rüşvəti rüşətxorun ağzından da dartıb çıxara bilər. Buna sadəcə istək və maraq olmalıdır. Çünki hələ də elə məmurlar vardır ki, onlar əyləşdikləri kürsünü dədələrinin malı bilərək kefləri istəyəni edir, el dili ilə desək atlarını sağa-sola çarpırlar. Cəzasızlıq şəraitində istədiklərini etməyə çalışan belə “balaca padşahlar” rəhbərlik etdikləri sahəni əsl bazara döndərərək ancaq pul yığmaq,çapıb talamaqla məşğul olurlar. Tarixlə maraqlananlar bilirlər ki, orta əsrlərdə “iltizam hüququ” deyilən bir anlayış olub. Yəni bir varlı feodal hər hansı bir ərazidən toplanacaq vergilərin məbləğində pulu dövlət xəzinəsinə keçirir, sonra öz keyfi istədiyi miqdarda vergi toplayırdı. İndi də bir çox məmurlar vəzifəsini elə “iltizam hüququ” kimi alırlar. Haqqını çatdır, özün nə istəyirsən et!
Araşdırmalarımızın nəticəsində sizi belə məmurlardan biri ilə tanış etmək istəyirik. İcra etdiyi vəzifəsini pul toplamaq, vətəndaşları soyub-talamaqla icra edən, bu sahədə xüsusi məharəti olan məmur 19 saylı TSEK-in sədri Akif Yusifovdur. A. Yusifovun sayəsində 19 saylı TSEK-də özbaşınalıq, əhali ilə rəsmi dövlət qulluqçusu arasında rüşvət alıb vermə son pik nöqtəsinə çataraq iyrənc vəziytyət almışdır. Artıq vəziyyət o həddə çatmışdır ki, əhali o cümlədən, xəstələr kütləvi olaraq narazılıqlar içərisində dövlətə qarşı üsyan edirlər.
A. Yusifoun vəzifəyə gəlmə tarixçəsi də çox maraqlıdır. Belə ki, tez-tez göründüyü kef məclislərində Yusifov kefinin çağ vaxtlarında bildirib ki, yaxın dostu İsamyıllı rayon İcra Hakimiyyətinin sabiq başçısı Nizami Ələkbərova 40 min manat verərək İsamyıllı RMX-nın baş həkimi olmalı imiş. Lakin Səhiyyə naziri O. Şirəliyev onun namizədliyini qəbul etməmiş, nəticədə A. Yusifovun baş həkimlik sevdası baş tutmamışdır. Arada olan alış verişin şərtinə əsasən N. Ələkbərov qardaşı Əmək və Əhalinin Sosial Müdafiə naziri F. Ələkbərovun vasitəsilə onu 19 saylı TSEK-in sədri vəzifəsinə gətirir.
Beləcə “maya qoyub” vəzifəyə gələn A. Yusifov Şamaxı və İsmayıllıda “sağlam əlil düzəltmə” əməliyyatına start vermişdir. Yəni pulunu ver əlillik qrupu alaraq təqaüdə çıx. Akifin “komissiyasına” 2000 manat verən istənilən sağlam adam əlillik dərəcəsi alaraq bir anda şikəstə çevrilir və təqaüdə çıxarılır. Onun bu məharətinə istənilən sehrbaz həsəd apara bilər. Əslən İsmayıllıdan olan A. Yusifovun “şəxsi qayğısı” nəticəsində son 2 ildə İsmayıllıda “sağlam əlillərin” sayı sürətlə artmışdır. Əslən İsmayıllıdan olması A. Yusifova burada əsl bazar açmağa imkan vermişdir. Öz həmyerlilərini böyük məhəbbətlə “əlilə çevirən” TSEK sədri bahalı maşınlarda gəzərək, dəbdəbəli villarda yaşayaraq, tez-tez kef məclislərində iştirak edir, boğazını bir az yaşlayandan sonra isə sehrbazlığından ağız dolusu danışır. O, dəfələrlə qürrələnərək deyib ki, “mən ən azından verdiyim pulu çıxartmalıyam. Burda hər şeyə limit var, hər şey ümumi qaydada həll olunur. ” A. Yusifov öz “əlil” müştərilərinin boynuna minnət qoyaraq həmişə and-aman eləyir ki, “komissiyadan keçməyin qiyməti ona görə bahadır ki, nazir müavini İlqar müəllimdən aldığım spravkaların hər birinə 300 manat pul ödəməli oluram. ” Əgər bu arayışların hər birinin qiyməti A. Yusifovun dediyi kimi nazir müavini səviyyəsində 300 manatdırsa onda TSEK sədri böyük bir korrupsiya zəncirinin sadəcə bir halqasıdır. Beləcə maya qoyaraq sədr olan A. Yusifov maya qoyub qazanc götürməyin necə böyük ustası olduğunu burada da bir daha əyani sübut edir. Fəaliyyətində heç bir qanuna məhəl qoymayan Yusifov rəhbərlik etdiyi TSEK-i sözün əsl mənasında korrupsiya yuvasına çevirmişdir. Rəhbərlik etdiyi komissiya heyətinin tərkibi də onun öz qanunlarına özünə sərf edən əsaslarla formalaşdırılmışdır. Belə ki, komissiyanın heyət üzvlərindən olan Rüstəm adlı həkim eyni zamanda 0. 25 akladla xəstəxanada işləməsi mümkün olmadığı halda A. Yusifov bunu da mümkünləşdirmişdir. Yəni pul hər şeyi həll edir prinsipi bu dəfə də öz işini görmüşdür. Belə ki iş otağının qarşısında tablonun üzərində iş günləri 2-4 gün yazıldığı halda nədənsə komissiya həftənin 3 gününə salmışdır. Bu da xəstələrin nahaqdan gediş-gəlişinə kütləvi şəkildə narazılığına səbəb olur. Lakin lazım olan şəxslərə Rüstəm həkimin Şamaxı rayon poliklinikasının 61-ci otağında və ya A. Yusifoun kabinetinin yanındakı otaqda qəbul olunaraq bir anda uğurla “əlilə” çevrilirlər. Reablitasiya olunan xəstələrin heç birinin xəbəri olmadan qeyri-qanuni olaraq komissiyadan keçirilir və “əlilliyi” təsdiq olunur. Burada A. Yusifovun daha bir iş prinsipi də özünü göstərir. Belə ki komissiyaya gələn xəstələrlə “konvertdə gələn xəstələrin” qiymətlərində fərq qoyulur. Yəni hallı halına, pullu puluna görə qəbul olunur. Əlimizdə olan konkret, real faktlara əsasən bildiririk ki, İsmayıllı rayonu ərazisində son iki-üç gün ərzində xəstələr üçün açılan müayinə aktlarının 80%-i heç bir ixtisaslı həkim tərəfindən imzalanmamışdır. Bütün bunlar bu sənədlərin tam saxta və qanunsuz olduğunu bir daha sübut edir.
Vəzifə kürsüsü hər bir məmura qanunla müəyyən olunmuş səlahiyyətlər verir. Amma A. Yusifov isə gördüyünüz kimi nəinki səlahiyyət sahibi olmuş, hətta, vəzifəsi sahəsində möcüzələr yaradan sağlam insanı əlilə çevirən bir güc sahibi olmuşdur. Halbuki neçə-neçə xəstə, əlacsız vətəndaşlar aylarla onun qəbuluna sürünsə də komissiyadan keçməyə müvəffəq olmurlar. Çünki, Akif Yusifov məhz sağlam insanları “əlilə çevirməklə” pul qazanmağın asan yolunu tapmışdır.
Əlimizdə A. Yusifovun cinayətkar əməllərini sübut edən faktlar vardır və bu barədə hüquq mühafizə orqanlarına və aidiyyatı qurumlara müraciət ediləcəkdir. İsmayıllının sabiq başçısı N. Ələkbərovun “xeyir-duası” ilə vəzifə sahibi olan Şamaxı və İsmayıllının qara yarasına çevrilmiş A. Yusifovun “əlil bazarı” ümid edirik ki, F. Ələkbərovun gec də olsa qəzəbinə düçar olacaqdır. Biz sadəcə ümid edirik. . .

Nicat Mahmudov