Bir ölkədə həyatın keyfiyyəti iqtisadi stabillik, təhsil, tibb və işsizliyin səviyyəsi ilə müəyyənləşdirilir. Bundan başqa siyasi stabillik və sosial təminat da bu faktora təsir edir.
Bu gün xarici dəstək hesabına yaşayan ən kasıb dövlətlərin siyahısını təqdim edirik.

Svazilend - dünyada ən aşağı səviyyədə tibbi xidmət

Svazilenddə kasıblığın səviyyəsi 70 faiz olduğu üçün dünyanın ən kasıb ölkələrindən biridir. Dövlət kənd təsərrüfatı mallarının ixracı hesabına yaşayır. Ölkə əhalisinin böyük əksəriyyəti bu sektorda fəaliyyət göstərir.

Ölkədə natural təsərrüfat kifayət qədər yüksək inkişaf edib. Amma torpaq bölgüsü düzgün aparılmadığı üçün müəyyən ciddi problemlər yaranıb.

Svazilenddə tibbi xidmət çox aşağı səviyyədədir. Yeni texnologiya və dərman preparatlarının olmaması əhalinin ömrünə də təsir edir. Orta hesabla uzunömürlülük 48 yaşdır. Bundan başqa dəhşətli epidemiyalar da tüğyan edir.

Zimbabve - Dünyada ən yüksək infilyasiya

Zimbabvedə adam başına ümumi daxili məhsul 2100 dollardır. 1980-ci illərdə hakimiyyətdə olan Robert Muqabenin apardığı siyasət iqtisadiyyata ciddi zərbə vurdu. Ölkəyə böyük gəlir gətirən kənd təsərrüfatı tənəzzülə uğradı. İxrac azaldı, iş yerləri ixtisara düşdü. Nəticədə milli pul iki dəfə dəyər itirdi. Zimbabvedə milli pul il ərzində 231 faiz dəyər itirir.

Zimbabvedə 13 milyon insan yaşayır. Əhalinin cəmi 45 faizi işlə təmin edilib. Onların isə zəhməti 3 dollardan baha qiymətləndirilmir. Ölkədə təhsil sistemi zəif olduğu üçün ali təhsil almaq istəyənlər xaricə üz tutmalıdır.

Syerra-Leone - Ölümün ən yüksək səviyyədə olduğu ölkə

Syerra-Leonenin ərazisi 70 min kv.kilometrdir və burada 6 milyon əhali yaşayır. Əhalinin 65 faizi kasıbdır. Ümumi daxili məhsul 380 dollardır.

1000 doğulan körpənin 114-ü öldüyü üçün ölkədə ölüm həddi çox yüksək səviyyədədir. Ərazisində faydalı qazıntılar, müxtəlif növ balıqlar olsa da, dünyanın ən kasıb ölkələrindən sayılır. Ölkədə baş verən vətəndaş müharibəsi iqtisadiyyatın dirçəlməsinə mane olur (1991-2002-ci illər). Bu illər ərzində Syerra-Leonedə korrupsiya və zorakılıq hökm sürüb.

Madaqaskar - Ən yüksək işsizlik səviyyəsi

Madaqaskarda ümumi daxili məhsul 1500 dollardır. Əhalinin 69 faizi yoxsulluq içində yaşayır. Madaqaskar kənd təsərrüfatı məhsullarından asılıdır. Amma okeanda baş verən subasmalar, qasırğalar məhsulu zay edir. Bu isə iqtisadiyyata mənfi təsir edir. Bu səbəbdən ölkə digər dövlətlərdən asılı vəziyyətdədir.

Əhalinin cəmi 35 faizi işlə təmin edilib. Əsasən isə məşğuliyyət kənd təsərrüfatı sektorundadır.

Haiti - Dünyanın ən kasıb dövləti

Haitidə işsizlik vətəndaşların həyat səviyyəsinin çox aşağı olmasına səbəb olur. 10 milyon əhalinin cəmi 40 faizi işlə təmin edilib.
İşləyənlərin 75 faizi isə gün ərzində 1 dollar qazanır. Cəmi 25 faizi isə 2 dollardan çox gəlir əldə edir. Ümumi daxili məhsul isə adam başına 900 dollar təşkil edir.
Bundan başqa ölkənin adada yerləşməsi də iqtisadiyyata mənfi təsir edir. 2010-cu ildə baş verən zəlzələdə 200 min insan həlak olmuşdu. 300 min sakin isə yaralanmışdı. Dağıntılar ölkəyə 8 milyard dollar ziyan vurmuşdu.