XDGİ-nin rəisi küllü miqdarda kapitala necə sahib olub
Xəzər Dəniz Gəmiçiliyi İdarəsinin rəisi Aydın Bəşirovun hədsiz kapital sahibi olması haqda şok iddialar var. Belə söz-söhbət gəzir ki, idarə rəisinin bir yox, bir neçə yerdə villası var. Bundan əlavə, sözügedən məmurun ailə üzvlərinə xidmət üçün nəzərdə tutulan xarici avtomobilləri də var. Bu avtombilləri də təbii ki, kimsə idarə edir. Onlar da sözsüz ki, pulsuz xidmət göstərmirlər və əməkhaqqı alırlar. Yaxud da, həmin bağ evlərinə xidmət göstərən qulluqçular, bağbanlar və s. sözsüz ki, konfet kağızı ilə işləmirlər.
Əslində biz Aydın Bəşirovun rüşvət aldığını və korrupsiyaya qurşandığını iddia edə bilmərik. Çünki belə halın olub-olmadığını biz yox, müvafiq orqanlar araşdırıb meydana çıxarmalıdırlar. Biz A.Bəşirovun Bilgəhdə möhşətəm villasından da yazmırıq. Çünki o villada biz olmamışıq. Lakin olanlar bu villanın möhtəşəmliyini dil-ağıza sığdıra bilmirlər. Amma sualımız yerində qalır: Aydın Bəşirov bu boyda varidatı hansı pulla əldə edib? Əgər xatırayırsınızsa, "Barmek" şirkəti Aydın Bəşirovun villasının külli miqdarda işıq borcu olduğunu qeyd etmişdi. O dövrün pulu ilə 4.5 milyon manat 1 ay üçün "Barmek"ə borcu olan Aydın Bəşirovun bir villasının möhtəşəmliyi artıq bəlli olur.
XDGİ-nin rəisi Aydın Bəşirovun bu gün işgüzar fəaliyyəti kiçik bir yoxlamaya məruz qalarsa, ortaya çox ciddi korrupsiya və yeyinti faktları çıxar. Son zamanlar onun tabeçiliyində olan işçilərinə qarşı pis rəftarı ilə diqqəti cəlb etməsi də gündəmdədir. Deyilənə görə o, işçiləri ağır şəkildə təhqir edir, təhqir zamanı yolverilməz jarqonlardan istifadə edir. Bunun nə qədər doğru olub-olmadığını deyə bilmərik. Lakin fakt budur ki, Aydın Bəşirov çox qocalıb.
Biz bu yazımızda Aydın Bəşirovun işçilərə ayrılmış torpaq sahələrini mənisəyərək qanunsuz olaraq fiziki şəxslərə satması məsələsindən də danışmaq istəmirik. 30 ildir evsiz qalan işçilərin taleyindən də, işçilərə mənzil verilməsi üçün ayrılan 1.2 milyard manatın (köhnə pulla) taleyinin qeyri-müəyyən qalmasından da. Bizi "dəniz vağzalı" ilə üzbəüz "Abşeron" mehmanxanası yaxınlığında tikilən binanın da ona məxsus olması maraqlandırmır. XDGİ-nin balansındakı bir çox uşaq bağçalarının yerində göydələnlərin necə ucaldılması da bizə maraqsızdır, elə onun göydələn biznesi də. Çünki onunla bağlı hərə bir söz deyir. Aydın Bəşirov və Səlim Müslümov qalmaqalı da bizə çox maraqsızdır. Bir çoxları Aydın Bəşirovun "varis plan"ından dəm vurur ki, biz bunu da təbii qəbul edirik. Çünki böyük qismi məmurlar artıq övladlarını lazımi şəkildə yerlərdə yerləşdiriblər. Aydın Bəşirovun Salyan İcra Başçısı olmuş Rasim Bəşirovu Dövlət Dəniz Akademiyasına rektor təyin etməsi də maraqlı hadisə deyil. Uzun illərdir ki, bu kürsüdə oturan Aydın Bəşirovla bağlı bizi bir sual düşündürür: "O, bu pulları necə qazanır? Məvacibi ilə varidatı necə tənzimlənir?
Samir