Sadval+TANAP+RLS= dövlət müstəqilliyinə təhlükə

gundemxeber.az Bir müddət əvvəl Rusiyadan səfərdən qayıdan tanışlarımdan biri söylədi ki, “Azərbaycanın şimal sərhədində gördüklərim məni dəhşətə gətirdi.” Doğrusu onun danışdıqlarına diqqətlə qulaq asıb, vəziyyətin nə qədər ciddi olduğunu anlamağa çalışdım. Dostum deyirdi ki, gedərkən sərhəddə həmişəki kimi canlanma gördüm: “Azərbaycan tərəfindən rahat şəkildə keçdik. Bizimlə bərabər də demək olar ki, hamısı eyni görkəmdə, geyimdə olan cavan oğlanların keçdiyinin şahidi oldum. Amma Rusiya tərəfində biz bir qədər gözləməli olduq. Bizi saxladılar, həmin cavan oğlanları isə növbəsiz-filansız keçirdilər. Onlar cins şalvarda və qara gödəkcələrdə idilər. Məni qarşılayan şəxsdən bu cavanların kim olması ilə maraqlandım, çiynini çəkdi və “bilmirəm”, - dedi”.
Qeyd edim ki, bu söhbəti eşidərkən Azərbaycan mediasında “Sadval”la bağlı silsilə materiallar dərc edilirdi və bu dəstənin yenidən fəallaşması ilə bağlı məlumatlar səsələndirilirdi. Dostumla söhbət zamanı, “Sadval” məsələsinə vurğu etdim. Və bu gənclərin “Sadval” nümayəndəsi olub-olmaması ilə bağlı polemika apardıq. Fikirlərimlə razılaşdı. Qənaətimi bir qədər də gücləndirmək üçün bildirdi ki, qayıdarkən yenə sərhəddə belə bir dəstə ilə qarşılaşıb və bu gənclər başqa dəstə imiş.
Ancaq bu da hamısı deyil. Belə ki, son zamanlar Rusiyanın Azərbaycanın şimal sərhədlərinə ordu qüvvələri yerləşdirməsi ilə bağlı da xəbərlər yayılıb. Dostum bunu da təsdiqlədi. Bildirdi ki, soyuq müharibə illərində Sovet sərhədlərinə qarşı tərəfdə “burada ağır texnika var” fikri formalaşdırmaq üçün yeşikləri yığıb üstünə çadır çəkirdilər: “Amma Azərbaycanla sərhəddə vəziyyət tamam başqadır. Heç bir şeyin üstü örtülməyib. Bizə doğru “Qrad” qurğuları istiqamətlənib və gördüyüm dərəcədə 50-yə yaxın tank var idi. Məni qarşılayan şəxs bildirdi ki, son zamanlar sərhəd bölgəsində əsgərlərin sayında da artımlar var. Və gördüyümüz texnikalar sadəcə üzdə olanlardır. Yaxınlıqdakı obyektlərə də ağır texnikalar yerləşdirilib.”
Dünən isə Rusiya Federasiyası Azərbaycan tərəfi ilə Qəbələ RLS barədə razılığa gələ bilmədiyini rəsmən açıqladı. Və Azərbaycana stansiyanın fəaliyyətinin dünəndən etibarən dayandırıldığı barədə Nota təqdim etdi.
Görünən odur ki, Rusiya ilə münasibətlərimiz heç də ürəkaçan səviyyədə deyil. Bəzi ekspertlər RLS-in fəaliyyətinin dayandırılmasının vacibliyi ilə bağlı açıqlamalar versələr də, bu fikirlər sadəcə Rusiyaya antipatiyadan irəli gələn mövqeyə görədir desək, yanılmarıq. Düzdür, gec-tez bu stansiya Rusiyadan alınmalı və Azərbaycanın tabeliyinə verilməli idi. Amma hazırda dünyada baş verən mövcud proseslərin fonunda belə bir addımın atılması heç də ürəkaçan görünmür.
Yaddan çıxarmayaq ki, Rusiya və ABŞ arasında münasibətlərin gərginləşdiyi bir zamanda Gürcüstanın azacıq sərt çıxışı, az qala işğalla nəticələnmişdi. Azərbaycanın son zamanlar yürütdüyü qərbyönlü siyasət, TANAP layihəsi və RLS problemi Rusiyaya şillə demək idi. Ayının isə heç zaman bu şilləni yaddan çıxaracağına inanmaq olmaz.

Əziz Sahiboğlu