Səhiyyə Nazirliyi “müayinə, müalicə, əməliyyat pulsuzdur” deyir, xəstəxana isə...

“Uşaq 3 yaşında olanda bildik ki, gözləri zəif görür. 5 ildir Zərifə Əliyeva adına Elmi-Tədqiqat Göz Xəstəlikləri İnstitutunun xəstəxanasında müalicə alır. Həkimlər deyirlər ki, gözün zəifliyi irsidir, buna görə də müalicə effekt vermir”.

Bunu virtualaz.org saytının müxbiri ilə söhbətində göz xəstəxanasında müalicə alan 8 yaşlı Məhəmmədin anası Arzu Quliyeva deyir.

A.Quliyeva söyləyir ki, balaca Məhəmmədin bir kurs müalicəsi 200 manata başa gəlir: “Hər kurs müalicədə soğan kimi soyuluruq. Daha çox aparatlara, bir də dərmanlara pul xərcləyirəm. Həkim müayinəsinə 20 manat verirəm. Sonra aparatlar vasitəsilə gözdibi, bəbək, gözün ölçüsü yoxlanılır. Hər aparata da 15-20 manat ödəmək lazım gəlir. Bundan sonra aparatlarla müalicə yazılır. Bu aparatla müalicənin qiyməti isə 50 manatdır”.

Söhbətə qapının yanında dayanan digər xəstə yaxınları da qatılır.

“Mənim nəvəmin gözlərində zəiflik var. Bir gözündə isə anadangəlmə çəplik hiss olunur. Hər dəfə müalicə üçün yazılan dərmanlara ən azı 100-150 manat ödəyirik. Baxırsan ki, ancaq vitaminlər yazıblar. Guya ki, gözdibi hüceyrələrin inkişafı üçün vacibdir” - deyə 6 yaşlı nəvəsinin müayinə otağından çıxmasını gözləyən Sürəyya nənə bildirir.

Onun sözləri çoxlarının ürəyindən olur. Nənəyə sual ünvanlanır.

- Bəs bilmirsiniz niyə bahalı dərmanlar yazırlar? - deyə balaca oğlunun əlindən tutub növbə gözləyən ata Sürəyya nənənin dediklərinə bir qədər əsəbi reaksiya verir.

Onun suallarına cavab verilməsə də çoxları təsdiq əlaməti kimi başını yelləyir. Ata davam edir:

- Hamısı firmalarla işləyirlər. O gün deyirəm ki, ay həkim, Rusiyanın dərmanlarını yazın. Axı Səhiyyə Nazirliyi də deyib ki, firmalarla işləməyin. Deyirlər ki, yox, bahalı dərmanlar keyfiyyətli olur. Səhər tezdən xəstədən çox firma nümayəndələri olur burada. Hər dəfə reseptə 50-60 manat xərcləyirəm. Eynəyin də təkcə şüşələrinə 50 manat vermişəm. Hələ yaxşı ki, həkimini dəyişdim. İndi uşağa Tamella həkim baxacaq. O, başqaları kimi acgöz deyil.

Bu arada Sürəyya nənə də həkimini tərifləməyə başlayır:

- Nigar xanım da yaxşı həkimdir. Hər gün 100-dən çox adam qəbuluna yazılır. Pul versən də, verməsən də bir söz demir. Amma müsəlmançılıqdır, aparatla baxanda hörmət etmək lazımdır. İnsafən, nəvəmin gözləri çox yaxşılaşıb. Bir də 50 manat həkimə yox, aparata verilir.

Öyrənirik ki, əksəriyyətin “aparat” dediyi şüa terapiyasına 50 manat xərcləndiyi iddia olunsa da ödənilən vəsaitin müqabilində çek verilmir. Xəstələrə yalnız 10 günlük müalicə üçün göndəriş yazırlar.

...Xəstəxanada baş verənləri müzakirə edən xəstə yaxınlarını hirslə süzən tibb bacısının gəlişi hamını susdurur.

Xəstəxananın bu şöbəsindən uzaqlaşırıq. Amma öyrənirik ki, bu şöbədə müasir avadanlıqlar vasitəsilə ultrason, biokimyəvi, elektrofizioloji, kompüter tomoqrafiyası, nüvə-maqnit rezonansı ilə müayinə və müalicələr aparılır. Lakin xəstələrin sözləri ilə ifadə etsək, gərək əlin cibində olsun.

Xəstəxananın digər korpusuna gedirik. Bayaqdan bəri bizi izləyən mühafizə xidmətinin əməkdaşlarından yayınıb (yeri gəlmişkən, həmin xəstəxanada jurnalistə “birtəhər” baxırlar, onlara foto və videoçəkiliş aparmağa icazə verilmir, hər halda bizə bu icazə verilmədi-müəl.) bu dəfə də əməliyyatlarla maraqlanırıq.

Atasının əməliyyat olunduğunu deyən Zərdab rayon sakini Nəcibə Məmmədova indiyədək 800 manat xərclədiklərini söyləyir: “Hər iki gözünə “mirvari suyu” (katarkat) gəlmişdi, üstəlik şəkər xəstəsidir. Sağ olsunlar, qiymətlərdə endirim etdilər. 800 manat verdik, deyirlər, əməliyyat yaxşı qurtarıb”.



Elçin Qəmbərov da atasının əməliyyat olunduğunu bildirir, lakin müsahibim əməliyyatdan narazı qalıb: “Atamın 76 yaşı var. Əvvəl deyirdilər ki, əməliyyatdan sonra görəcək. Amma indi deyirlər yaş öz sözünü deyib, görməsi bərpa olunmaya da bilər. Əgər görməyəcəkdisə, bəs məni də, yazığı da niyə əziyyətə salırdılar? Mən hələ indiyədək xərclədiyim pulları demirəm. Atam 145 manat təqaüd alır. Amma əməliyyata 1000 manata yaxın pul xərcləmişəm”.

Xəstə yaxınlarının şikayətini bizimlə birgə dinləyən həkimlərə yaxınlaşırıq. Əvvəlcə əməliyyatla bağlı suallarımıza cavab almaq istəyirik. Cavabları belə olur: “Sizin xəstənizin şikayəti nədir? Əməliyyatın qiymətini həkim müəyyənləşdirir. Gətirin xəstəyə baxsınlar, bəlkə heç əməliyyata ehtiyac qalmadı...”

Amma jurnalist olduğumuzu biləndən sonra xəstəxanaya dair bütün suallarımızı yalnız Səhiyyə Nazirliyinin icazəsindən sonra cavablandıra biləcəklərini deyirlər və qapını göstərirlər...

Əslində onlar da bilməmiş deyillər ki, “görünən kəndə bələdçi lazım deyil”. Başqa sözlə, suallara veriləcək cavablar aydındır. Amma biz bu xəstəxana ilə bir daha əlaqə saxlayıb nazirliyin ona icazə verib-verməyəcəyini dəqiqləşdirməyə çalışacağıq. Çünki bu pullu xidmət məsələsinə nəhayət ki, aydınlıq gətirilməlidir. Bu səhiyyə ocağı dövlət xəstəxanası olaraq Səhiyyə Nazirliyinin tabeliyindədir. Nazirliyin tabeliyində olan səhiyyə ocaqlarında isə əhaliyə xidmət pulsuzdur...

Bunu virtualaz.org saytına açıqlamasında Səhiyyə Nazirliyi mətbuat xidmətinin rəhbəri Anar Qədirli də söyləyir: “Dövlət xəstəxanalarının hamısında, o cümlədən göz xəstəxanasında bütün və hər cür müayinə, müalicə və əməliyyatlar pulsuzdur. Səhiyyə nazirinin bununla bağlı xüsusi əmri də var”.

Şərhsiz...