Şirkət onlarla vətəndaşı evsiz qoyub

gundemxeber.az Son vaxtlar Azərbaycanda bəzi tikinti şirkətlərinin vətəndaşları aldatması, onların mənzil sahibi olmaq arzularından istifadə edərək qanunsuz yolla varlanmaq istəklərini reallaşdırması adi hal alıb. Dünən özəl mənbədən redaksiyamıza daxil olan məlumatda “Xudafərin”MMC-nin də vətəndaşların etimadından sui-istifadə etməsi ilə bağlı ciddi xəbərlər yer alıb. Mənbənin bildirdiyinə görə, uzun müddətdir ki, vətəndaşları aldadan, onları mənzillə təmin edəcəyini iddia edən şirkət pulunu öncədən aldığı insanları qış günü işsiz qoyub.

Bir evə beş müştəri?

Mənbənin məlumatına görə, son bir neçə il ərzində xeyli sayda insanla müqavilə imzalayan və vətəndaşların külli miqdarda vəsaitini mənimsəyən şirkət, bu gün onlarla insanı çıxılmaz vəziyyətdə qoyub: “Xudafərin”MMC şirkəti uzun müddətdir ki, vətəndaşlarla müqavilə imzalayaraq onların puluna əl qoysa da, digər tərəf kimi üzərinə düşən öhdəliyi yerinə yetirməyib. Nəticədə, vətəndaşların milyonlarla pulunu mənimsəyən şirkət onların mənzil sahibi olmaq arzusunu gözündə qoyub. İşin ən maraqlı tərəfi isə şirkətin həmin mənzillərə görə onlardan alqı-satqı üçün tələb olunan pulu son qəpiyinə kimi almasıdır. Məhz bu səbədən də bu gün vətəndaşlar haqlı olaraq iddia edirlər ki, onlar bir dünya pul verib əvəzində adi bir kağız parçası alıblar. Onlar şirkətlə aralarında imzalanan müqaviləyə sənəd deyə bilmirlər. Buna onların dili gəlmir. Vətəndaşlar hesab edir ki, əgər bu müqavilə sənəd sanbalında olsaydı, o zaman bunca müddət ərzində onlara bu sənədi verən şirkət pulunu yediyi vətəndaşların qayğısına qalar, onların çarəsizliyinə son qoyardı”.
Bir müddət bundan öncə isə bəlli olub ki, əslində şirkətin vətəndaşları öz mənzillərinə buraxmamasının çox ciddi səbəbi var ki, bu da eyni mənzilin bir deyil, bir neçə nəfərə satılması ilə bağlıdır. Məhz buna görə də şirkət yetkililəri tikintisi başa çatan mənzillərə vətəndaşları buraxmır, müxtəlif bəhanələrlə onların haqlı tələbinin qarşısını almağa çalışırlar”.

“Tanış simalar” iş başında

Bilgili qaynağın sözlərinə görə, “Xudafərin” MMC haqqında ölkə ictimaiyyəti haqqında yetərincə bilgi olmasa da, əslində bu şirkətin başında dayanan şəxs iş adamı kimi kifayət qədər populyardır. Bu, cəmiyyət də “AMAY Abdulla” kimi tanınan Abdulla Abdullayevdir: “Xudafərin” MMC şirkətinin rəhbərliyində təmsil olunan ən aparıcı şəxs Abdulla Abdullayevdir. Çoxdan bəridir ki, xalq arasında “AMAY Abdulla” kimi tanınan, adı illər uzunu müxtəlif qalmaqal və çəkişmələrdə hallanan A.Abdullayev “Xudafərin” MMC-ni paytaxt sakinlərinin ümid və gözlənti qəbiristanlığına çevirib. Vətəndaşlar nəinki öz halal mənzillərinə sahib ola bilmir, hətta min bir əziyyətlə şirkətə verdiklərini pulları da məlum qurumdan geri ala bilmirlər. Artıq gözləməkdən cana doyan bir çox vətəndaşın yaxın zamanlarda adıçəkilən şirkətdən əlaqədar dövlət qurumlarına şikayət ünvanlayacağı gözlənilir. Paytaxt sakinləri hesab edir ki, bəlkə bu yolla əlləri ilə şirkətə təslim etdikləri pulun bəlli bir qismini də olsa geri ala bildilər”.

Abdulla Abdullayev çıxış yolu tapa bilmir

Mövcud durumun A.Abdullayev tərəfindən də ciddi narahatlıqla qarşılandığını bildirən mənbənin sözlərinə görə, tanınmış iş adamı bütün cəhdlərə rəğmn problemdən çıxış yolu tapa bilmir: “A.Abdullayevin biznes dünyasında çoxdan təmsil olunduğu, habelə adıçəkilən şəxsin iş adamı kimi mürəkkəb vəziyyətlərdən çıxmaq təcrübəsinin böyük olduğu bəllidir. Lakin bu gün vəziyyət o qədər kritik və çıxılmazdır ki, hətta A.Abdullayev kimi təcrübəli iş adamı belə mövcud problemin öhdəsindən gələ bilmir. İş adamının yalnız “Xudafərin” MMC-də deyil, rəhbəri olduğu digər şirkətlərdə də vəziyyət gərgin olduğundan, bu gün sözügedən biznesmenin vəziyyəti eyni anda bir neçə yerdən su alan gəmiyə bənzəyir və bu gəminin uzun müddət öz müvazinətini qoruyacağı inandırıcı görünmür”.
İş adamının düşdüyü vəziyyətdən qurtulmaq üçün bütün əlaqələrini işə saldığını bildirən mənbənin məlumatına görə, A.Abdullayev işlərini nizama salana qədər kütləvi narazılığın baş qaldırmsından ehtiyat edir: “İndiki məqamda A.Abdullayev üçün ən mühüm məsələ vətəndaşların narazılığının kütləvi şəkildə meydana çıxmasının qarşısını almaq, bu narazılığın sistemli şəkildə ortaya qoyulmasını önləməkdən ibarətdir. İş adamı yaxşı başa düşür ki, vətəndaş narazılığı ümumu narazılığa çevrilsə və kütlə şirkətlə bağlı şikayətini bir küll halında ortaya qoysa, o zaman vəziyyəti heç nə ilə xilas etmək mümkün olmayacaq. Belə olarsa, məsələ ictimaiyyiləşməklə yanaşı əlaqədar qurumların, o cümlədən hüquq-mühafizə orqanlarının diqqətini çəkəcək ki, bu da labüd son deməkdir. Bu sonluğun isə onun üçün yaxşı olmayacağı A.Abdullayevə yaxşı məlumdur”.

İlqar Rəsulov