Nazir müavinləri Vaqif Əliyevlə Ədalət Vəliyev səlahiyyət davasına başlayıb

gundemxeber.az Mədəniyyət və Turizm Nazirliyində səlahiyyət məsələsində ciddi narazılıq düşüb. Nazir müavinləri Vaqif Əliyevlə Ədalət Vəliyev arasında yaşanan gərginlik artıq pik həddə çatıb.
Bu barədə qəzetimizə daxil olan məlumatda deyilir ki, bir müddət əvvəl müavin təyin olunan Vaqif Əliyev təkbaşına hərəkət edərək, bir sıra mədəniyyət layihələrini həyata keçirmək istəyir. Nazir Əbülfəz Qarayevin yaxın adamı olaraq tanınan Əliyevin belə hərəkətləri isə digər müavin Ədalət Vəliyevin ürəyincə deyil. Elə bu səbəbdən də tərəflər arasında ciddi narazılıq yaranıb.
Məlumatda vurğulanır ki, Vəliyev əvvəllər bütün işləri özü həyata keçirməklə, həm nazirliyin daxilində böyük fiqura çevrilmişdi, həm də səlahiyyətləri əlində cəmləmişdi. Eyni zamanda, onun icazəsi olmadan kimsə bir addım kənara ata bilmirdi. Hətta ən kiçik işlər belə onunla məsləhətləşildikdən sonra reallaşdırılırdı. Lakin Vaqif Əliyev təyinat aldıqdan sonra vəziyyət tamamilə dəyişməyə başlayıb və bu da yekunda narazılığa səbəb olub.
Məlumata görə, Ədalət Vəliyev bir sıra dövlət tədbirlərini həyata keçirmək missiyasını üzərinə götürüb. Həmin tədbirlərin reallaşdırılması üçün iştirakçı kimi Vaqif Əliyevin də adı siyahıda olsa da, onun adını oradan çıxarıb. Bununla bağlı nazirlə söhbət aparan müavin Qarayevin diqqətinə çatdırıb ki, əvvəlki statusu dəyişməməlidir. Lakin özünün yaxın adamı olan Vaqif Əliyevi Ədalət Vəliyevin ayağına vermək istəməyən nazir mümkün qədər ehtiyatlı davranmağa çalışır. Belə ki, o, dövlət tədbirlərinin təşkilində Vaqif Əliyevin də adının olması üçün çalışır.
Mənbənin bildirdiyinə gorə, nazirin bu cür hərəkətləri də müavininin ürəyincə deyil. Hələlik Qarayevin hərəkətlərinə göz yuman Vəliyev səsini çıxarmır. Amma bu şəkildə davam edərsə, günlərin birində müavinlə nazir arasında da ciddi narazılığın baş qaldıracağı qaçılmaz hesab olunur. Bildirilir ki, Ədalət Vəliyev indiyə qədər əldə etdiyi bütün mövqeləri əlində saxlamaq üçün hətta yuxarı dairələrlə də danışıqlar aparır. Hətta belə məlumatlar da var ki, o, təkcə Vaqif Əliyev haqqında deyil, həmçinin nazir Əbülfəz Qarayev barəsində də yuxarı dairələrdə mənfi fikrin formalaşması üçün cəhdlər edir.
Qeyd edək ki, Ədalət Vəliyev uzun illərdir Mədəniyyət və Turizm Nazirliyində müavin postunda çalışır. Bu illər ərzində bütün sirlərə vaqif olan bu şəxsin rıçaqları da həddindən artıq çoxdur. Bütün tədbirləri birbaşa özü həyata keçirdiyi üçün hakimiyyət dairələri tərəfindən təqdir olunan nazir müavininin bundan sonrakı mərhələdə əvvəlki mövqelərini əlində saxlaması isə çətin iş kimi görünür. Ona görə ki, artıq onun səlahiyyətlərinə Vaqif Əliyev də şərik olmağa başlayıb. O, Vaqif Əliyev ki, hakimiyyətin ən yüksək təbəqələrində geniş əlaqələrə malikdir və nazir müavini olaraq özünü ciddi şəkildə doğrultmağa çalışır.
Hadisələrin bu şəkildə davam etməsi isə Mədəniyyət və Turizm Nazirliyində ciddi konfliktlərin baş qaldıracağından da xəbər verir. Çünki iki nazir müavininin bir biri ilə yola getməməsi, nəticə etibarı ilə toqquşmaları qaçılmaz edəcək. Bu prosesdən müavinlərdən hansı birinin qalib çıxacağı isə hələlik məlum deyil.

Şamil