Vətəndaşlar necə aldandı?

gundemxeber.az Müstəqil ekspertlərin hesablamalarına görə, Bakı və Bakıərtafı qəsəbələrdə təqribən 400 min sənədsiz ev tikilib. Prezident İlham Əliyev Bakı şəhər İcra Hakimiyyətində keçirdiyi müşavirədə Bakı və Bakıətrafı ərazilərdə sənədsiz evlərin sənədləşdirilməsinə dair mexanizmin hazırlanması barədə şəhər İcra Hakimiyyətinin başçısı Hacıbala Abutalıbova tapşırıq vermişdi.
Sənədsiz evlərin sənədləşdirilməsi üçün ilkin layihənin hazırlanaraq parlamentə təqdim olunduğu barədə məlumatlar var. Sənədsiz evdə yaşayanların səbirsizliklə gözlədikləri layihə ilə tanış olub. İlkin layihə belə adlanır: «Mülkiyyət hüquqları qanunvericiliklə müəyyən edilmiş qaydada rəsmiləşdirilməyən yaşayış evləri və torpaq sahələri üzərində hüquqların leqallaşdırılması haqqında». Layihədə göstərilib ki, magistral boru kəmərlərinin, gərginliyi 1000 voltdan çox olan elektrik xətlərinin, metropolitenin, dəmir yolu qurğularının üzərində tikilmiş evlərə sənəd verilməyəcək. Eyni qadağa müdafiə obyektləri, su təchizatı və kanalizasiya sistemlərinin texniki qurğuları, neft buruqları, avtomobil yollarının və suların mühafizə zolaqlarında yerləşən torpaq sahələrinə də aiddir.
Həmçinin sürüşmə zonası və onların üzərindəki evlər də sənəd ala bilməyəcək. Bura meşə və su fondu torpaqlarında, müdafiə təyinatlı torpaqlarda tikilən evlər də daxildir.
Neft və qaz yataqlarının işlənməsi, neftin, qazın hasilatı, nəqli üçün müvafiq təsərrüfat subyektinin qanuni istifadəsində olan torpaqlarda tikilən evlərin də sənədləşdirilməsi mümkün olmayacaq. Əgər həmin ərazilər neft hasilatına yararlıdırsa.
Layihəyə dəyişikliklər və əlavələr olunmasa sənədsiz evlərin böyük hissəsi yenə də sənədləşdirilməmiş qalacaq. Xeyli sayda evlər var ki, bələdiyyədən çıxarışı var, amma icra hakimiyyətindən tikintisinə sərəncam alınmayıb. Layihə yalnız qanuniləşdirilməsi mümkün olan evləri əhatə edir.
Hələ layihə ortada yoxdur, qanun qəbul edilməyib, amma evlər məhkəmə qətnamələri ilə hissə-hissə boşaldılır. Bayılda belə evlərin sayı 10 mindən artıqdır. Bu evlərdə 40-cı illərdən yaşayanlar var. Əksər belə evlərin tikintisi üçün Dövlət Neft Şirkətinin razılıq sənədi və yerli icra hakimiyyətinin verdiyi icazə sənədi də var.
Sənədsiz evlərlə bağlı layihə hazırlanarkən diqqət əsasən Dövlət Neft Şirkətinin iddia etdiyi ərazilərdə və qəza zolaqlarında tikilmiş evlərə yönəlməli idi. Layihədə konkret şəkildə məsələ qoyulur ki, neft hasilatı ilə bağlı ərazinin yararlığı sübut olunarsa... Bu isə çox subyektiv məsələdir, bir rəy verəcəklər ki, bu ərazinin neft hasilatı üçün yararlılığı var, vətəndaşlar kütləvi şəkildə çıxarılsın.

Şamil