Azərbaycanın bəzi özəl tibb klinikalarında vətəndaşların aldadılması, pasiyentlərə səhv diaqnozların tətbiq edilməsi, insanların aldadılaraq soyulması ilə bağlı kifayət qədər faktlar var və təsdiqlənib. Həkim səhlənkarlığı, səhv diaqnozlar və bunun pasiyentə psixi və mənəvi təsirinin acı nəticələri də kifayət qədər olub. Amma, nədənsə aidiyyəti qurumların bu məsələlərlə bağlı gördüyü tədbirlər həmin klinikaların fəaliyyətində müsbət dönüş yaratmır. Son illər ərzində ölkəmizdə səhiyyə sistemində lazımi səviyyədə inkişaf olmasına baxmayaraq Azərbaycanda baş verən bu cür neqativliklər də ölkə səhiyyəsinin inkişafına maneçiliklər törədir. Bu cür klinikaların bəziləri pasiyent azlığından televiziyalarda ucuz reklam kampaniyası apararaq insanlara reklam vasitəsilə yalan vədlər verir və bu reklam vasitəsilə bazara daxil olur. Televiziya reklamına inanıb belə klinikalara gələn xəstələr isə işbazların tilovuna düşürlər. Həmin klinikalar düzgün müalicə, insan taleyini fikirkləşmək əvəzinə, reklam vasitəsilə gəlir əldə etmək, passiyentləri soymaqla məşğuldur. İnsan taleyi isə onları zərrə qədər də düşündürmür.

Reklam xatirinə bir çox hallarda özəl klinikalar ucuz işçi qüvvəsi tapmaq üçün qeyri-peşəkar həkimlərdən ibarət kollektiv formalaşdıraraq insanlardan külli miqdarda gəlir əldə edir. Özəl telekanallardakı reklamlar hesabına xəstələri klinikalara cəlb edənlər nəticədə xəstələri ölümlə üz-üzə qoyurlar.

“Klinikadakı işbazlar məndən 2000 manat pul qopartdılar”

Redaksiyamıza müraciət edən pasiyentlərdən biri də bu cür aldadıcı reklam sayəsində klinikada əməlli-başlı tora düşüb. Müraciət Elçin Şahmarov adlı pasiyent tərəfindən edilib və bu şəxs iddia edir ki, klinikada onu əməlli-başlı soysalar da, müraciət etdiyi problem həll edilməyib. Elçin Şahmarov yazır ki o, telekanalların birində “Laçın” klinikasının reklamını gördükdən sonra, səhhətindəki problemi həll etmək üçün bu klinikaya müraciət edib. Amma az müddətdən-10 gündən sonra tora düşdüyünü dərk edib: “ Çünki 10 gün ərzində buradakı işbazlar məndən 2000 manat pul qopartdılar. “Laçın” klinikasının özünü Azərbaycanda yeganə androloji mərkəz kimi televiziya ekranlarında reklam etdiyinin cəfəngiyyat olduğunu ilk 10 gündə hiss etdim. Məndən pul alan klinika nümayəndəsi köçürülmüş pulun çekini mənə təqdim etsə də aparılan müalicələrin heç bir nəticəsi olmadı. Əslində 10 gün ərzində məndən alınan 2000 manatdan çox vəsait şərtə görə mənə qaytarılmalıydı. Çünki ilk müraciət etdiyim anda həkim “Müalicə effekt verməsə, sənin ödədiyin pul geri qaytarılacaq” demişdi. Amma, sonradan həmin pul geri qaytarılmadı və mən aldadıldım.

3500 manat xərclə, heç bir nəticə olmadan geri dön

Elçin Şahmarov deyir ki, o klinikaya uşaq problemi ilə bağlı müraciət edib. Telekanaldakı reklamda “Laçın” klinikasında bu problemin qısa müddətdə və asanlıqla aradan qaldırıldığını eşidib sevinə-sevinə həmin ünvana yollanıb. Amma, pasiyentin şikayəti uzun sürməyib. Çox keçməyib ki, o klinikanın onlarla insan kimi onu da aldadıb tora saldığını anlayıb. Bu isə gec olub. Artıq pasiyent klinika tərəfindən istədikləri səviyyədə soyulub və müalicənin də heç bir nəticəsi olmayıb: “Mən bu klinikaya övladım olmadığı üçün müraciət etmişdim. 2013-cü ilin may ayından bu günə qədər ümumilikdə 3500 azn pul xərcləmişəm. Bu məbləğin 2000 manatını androluqun, həkimin göstərişi ilə xüsusi analizlərə vermişəm. Yerdə qalan 1500 manatı isə dərmanlara və başqa həkimlərə ödəmişəm. Məni müalicə edən həkim(etika xatirinə adını yazmıram) sonda bildirdi ki, sizdə heç nə alınmır. Ona görə başqa klinikaya müraciət edin. Mən “Laçın” klinikasının rəhbərliyinə müraciət edəndə aydın oldu ki,burada ödənilən pullar heç zaman geri qaytarılmır. Mən övlad sahibi olmaq istəyirdim. Amma işbazların toruna düşdüm”.

Aldadılan şikayətçi hüquq-mühafizə orqanlarına müraciət edəcək

Elçin Şahmarov “Laçın” klinikası tərəfindən tora salındığını iddia edir və Azərbaycan xalqını bundan sonra bu klinika tərəfindən aldanmamağa çağırır: “Mən övlad sahibi olmaq istəyən insanlara müraciət edirəm. “Laçın” klinikasının toruna düşmək istəmirsinizsə, bura müraciət etməzdən öncə yaxşı fikirləşin. Mən başıma gətirilənlərlə bağlı artıq hüquq-mühafizə orqanlarına müraciət etmək niyyətindəyəm. Xahiş edirəm bu işdə media da mənə dəstək olsun.

Şikayətçi deyir ki, hüquqarının müdafiuəsi üçün istənilən addımlar atacaq və dəymiş mənəvi və maddi ziyana görə bütün əlaqədar qurumlara müraciət edərək hüquqlarının bərpası üçün sonadək mübarizə aparacaq. Həmçinin o, bundan sonra “Laçın” klinikası tərəfindən tora salınmaq istəyən müştərilər arasında da təbliğat apararaq onların bu klinikaya və klinikanın həkimlərinə inanmamağa çağıracaq: “Mən artıq aldanmışam və tora salınmışam. İstəmirəm heç kim mənim yaşadıqlarımı təkrarlasın. Övlad arzusu ilə sevinə-sevinə bu klinikaya müraciət edən biçarə ailələr sonradan ordan məyus qayıdırlar, eynən mənim kimi. Ona görə də diqqətli olun. “Laçın” klinikası insanları aldatmaqla, pul qazanmaqla məşğuldur”.