İslam Partiyasının sədri Elçin Manafov:
“Bütün sağlam qüvvələrə vahid namizəd ideyasını müzakirə etməyə hazırıq”

Suallara İslam Partiyasının sədri Elçin Manafov cavab verib. O, qarşıdan gələn prezident seçkilərində iştirakdan, müxalifətin vahid namizədindən, İslam Partiyasının imkanlarından, son zamanlar həbs olunan dindar və qeyri dindar şəxslərdən danışıb. Habelə İran-Azərbaycan münasibətləri, Azərbaycanda İran meylli qüvvələrlə bağlı uzun illərdir ki, səsləndirilən iddialardan, 30 milyonluq bir ulusun İran adlanan bir ölkədə ana dilində təhsil almamasından və Tehranın Ermənistana yardım göstərməsi haqda suallara reaksiya verib.

- İslam Partiyasının siyasi fəaliyyəti varmı, əsasən hansı istiqamətdə iş aparırsınız?
- Bizim fəaliyyətimiz hər zaman olub və bu gün də var. Hazırda fəaliyyətimiz daha çox qarşıdan gələn prezident seçkilərinə hazırlıqla bağlıdır. Biz çalışırıq ki, seçkilərdə aktiv və ciddi iştirak edək. Ona görə də, seçkilər prosesinə ciddi şəkildə hazırlaşırıq.
- İslam Partiyasının seçkilərdə təkbaşına iştirak etmək üçün potensialı varmı?
- Əlbəttə var. Niyə də olmasın. Bu bizim haqqımızdır.
- Seçkiyə gedən partiyanın rayonlarda, bölgələrdə ciddi dayaqları, yerli şöbələri olmalı deyilmi?
- Biz seçkiyə çoxdan hazırlaşırıq və bu haqda mətbuatda da elan vermişik. Bizim seçkidə iştirak etmək üçün potensialımız var. Bir çox rayonlarda partiyanın yerli komitələri fəaliyyət göstərir. Onu da bildirim ki, biz artıq regionlarda görüşlər keçirmişik. Həm də bizim bölgələr üzrə əlaqələndiricilərimiz var. Yəni şimal zonası, cənub zonası üzrə xüsusi koordinatlarımız var. Biz artıq dörd zona üzrə görüşlərimizi keçirmişik. Bir sözlə seçki hazırlığına start vermişik və partiyanın rayon komitələri hazırlıqlar aparır. Onu da qeyd edim ki, İslam Partiyasının ümumilikdə otuza yaxın rayonda yerli komitələri var. Üstəlik zona üzrə əlaqələndiricilər müəyyən etmişik ki, işlərimiz effektiv və operativ olsun.
- İslam Partiyasının aktiv nə qədər üzvü var?
- Bizim üzvlərimiz çoxdur. Əlbəttə, mən indi konkret olaraq üzvlərimizin sayını deyə bilmərəm. Bildiyiniz kimi partiyanın Nərimanov rayonunda olan qərargahının qapısını möhürlədilər və uzun müddət ora bağlı qaldı. Bundan sonra isə bizim partiyanın sənədləri demək olar ki, yoxa çıxdı. Ona görə də, indi konkret cavab verə bilmirəm. Amma onu deyə bilərəm ki, partiyanın üzvlərinin ümumi sayı 30 min nəfərdən az deyil.
- İslam Partiyasının hazırda qərargahı varmı, yoxsa səyyar fəaliyyət göstərirsiniz?
- Qərargahımız var. Biz icarəyə qərargah götürmüşük və şükürlər olsun ki, bir yerə toplaşa bilirik. Nərimanovda olan qərargahımızı isə bizim əlimizdən faktiki olaraq aldılar. Belə ki, qərargahı uzun illər həbsdə saxladılar. Sonra isə qərargahın sahibinə təzyiq etdilər ki, oranı İslam Partiyasına verməsin. Bundan sonra bizdə məcbur olduq ki, bir müddət səyyar fəaliyyət göstərək. Hər nə olsa da, biz işimizi aparmışıq. Düzdür, indi yer tapmışıq və fəaliyyətimizi davam etdiririk. Amma bundan qabaq heç yerimiz də yox idi və məcbur olub məsciddə və ya çayxanada toplaşırdıq. Ancaq bütün hallarda fəaliyyətimizə ara vermədik. Hətta o zaman həbslər apardılar, fəaliyyətimizə məhdudiyyətlər tətbiq etdilər, amma biz dayanmadıq.
- Hazırda İslam Partiyasının neçə üzvü həbsdədir?
- Həbsdə olanlarımız çoxdur. Elələri var ki, partiyada rəhbərlikdə təmsil olunur, elələri də var ki, sadəcə partiyamızın sıravi üzvüdür. Bizim həbsdə olan məşhur üzvlərimiz bəllidir. Mən Ruhulla Axundzadənin adını çəkə bilərəm. Eləcədə Hacı Vaqif həbsdə dünyasını dəyişdi. Sonradan Arif Qəniyevi də həbs etdilər. Çoxlu sayda üzvlərimiz saxlanılıb. Bu işlərlə daha çox müdafiə komitəsi məşğul olur.
- Sizin prezidentliyə namizədiniz kim olacaq?
- Əslində çoxluğun istəyi budur ki, biz Hacı Möhsüm Səmədovun namizədliyini irəli sürək. Əlbəttə, onun özü buna razılıq versə, İslam Partiyası onun namizədliyini dəstəkləyəcək. Yox əgər, onun özünün buna imkanı olması , bu zaman onun timsalında bir nəfər olmalıdır ki, kriteriyalara cavab versin və bizdə onu dəstəkləyək.
- Sizin namizədiniz hökmən islamçı, dindar olmalıdır?
- Yox. Düzdür, biz kampaniyamızı “Əxlaqlı seçki və ədalətli hakimiyyət uğrunda islami hərəkat” adlandırmışıq. Amma biz islami hərəkat deməklə həmdə məhdudiyyətlər qoymamışıq ki, namizədimiz hökmən islamçı olmalıdır. Əksinə, kriteriyalara cavab verən, keyfiyyətli namizəd olmalıdır. Bu düzgün, ədalətli, əxlaqlı, vətənini və xalqını sevən insan olmalıdır. Namizəd həqiqətən də xalqına xidmət edən şəxsiyyət olmalıdır. Hakimiyyətə gələn hər bir şəxs xalqına zülm etməli deyil, onun xidmətində durmalıdır. Eləcədə dinə və digər milli-mənəvi dəyərlərə ziyan vurmamalıdır.
- Hacı Möhsün Səmədov həbsxanadan prezidentliyə namizəd olacağını bəyan edib. Bundan xəbəriniz varmı?
- Bəli, biz bundan məlumatlıyıq. Əgər Hacı Möhsün namizədliyini irəli sürərsə onu nəinki islamçılar, hətta qeyri islamçılar belə müdafiə edəcək. Çünki onun şəxsiyyətini çoxları tanıyır. Əslində onu zindana salmaqla nəinki onu həbs etdilər, əksinə, onu bu cəmiyyətə tanıtdırdılar, şəxsiyyətini bir növ açdılar və təbliğatını apardılar. Bütün insanlar gördü ki, Hacı Möhsün necə keyfiyyətli insandır. Bir sözlə onun həbsi hakimiyyətin əleyhinə, onun özünün isə lehinə oldu.
- Sizinlə qərbyönlü siyasi partiyalar arasında münasibətlər necədir, belə çağırışlar var ki, siyasi repressiyaların qarşısında durmaq üçün birləşmək lazımdır...
- Biz bütün sağlam qüvvələrə, xalqın sadiq oğullarının hamısının üzünə qucaq açmışıq. Təki ortada olan ideyalar xalqa və vətənə xidmət olsun. Nəinki əvvəldə qurana əl basıb sonradan xalqa zərbə vursun.
- Bəs niyə bir yerdə deyilsiniz?
- Bizim heç kəslə düşmənçiliyimiz yoxdur. Bir yerdə olmağımızı istəyən bütün qüvvələrlə birgəyik. Biz özümüzü təcrid etməmişik. Hamıya münasibətimiz yaxşıdır, əsas odur ki, niyyət təmiz olsun.
- Son zamanlar baş verən həbslərə münasibətiniz necədir?
- Bizim həbslərə münasibətimiz kəskin və pisdir. Təmiz insanları saxta ittihamlarla həbsini pisləyirik. Biz belə hadisələrdən hər zaman narahat olmuşuq. O yerdə ki, bacarırıq, onların müdafiəsinə qalxırıq. Bütün hallarda biz həbsləri pisləyirik və bunun yolverilməz olduğunu bəyan edirik.
- Son zamanlar həmdə dindarlar həbs edilir və həbs edilənlərin əksəriyyəti şiə təriqətinə məxsus olan şəxslər olur. Bu təsadüfidirmi?
- Görünür özlərinə təhlükə hiss edirlər. Ola bilsin ki, artıq islamçıların qüdrətindən və vəhdətindən qorxurlar. Ona görə də, məxsusi problemlər, maneələr yaratmağa başlayıblar. Yəqin istəyirlər ki, sabah seçki günü bunlara mane olan bir qüvvə olmasın. - Ancaq belə iddialar var ki, son zamanlar məhz şiə təriqətinə məxsus olan dindarların həbsi İran-Azərbaycan münasibətləri ilə bağlıdır və bu yolla Azərbaycan tərəfi İranın təzyiqlərini azaltmaq, İran meylli qüvvələrin stimullaşdırılmasına imkan vermir... - Əlbəttə, bu boş iddialar və ittihamlardır. Bizim İranla bağlılığımız ancaq dini liderimizin orada olması ilə əlaqədardır. Biz Xomneyi ağanı özümüzə dini lider olaraq qəbul edirik. Amma dövlət olaraq bizim dövlətimiz Azərbaycandır. Bunlar ayrı-ayrı şeylərdir. İrana bağlılığımız siyasi deyil, mənəvidir. Odur ki, bunlar bəhanədir.
- İranda lideri olduğunu elan edən bir siyasətçinin və ya təşkilatın Azərbaycanda prezident seçkilərində iştirak etməsi təhlükəli tendensiya deyilmi?
- Yox. Mən ona görə deyirəm ki, bütün şiələrin və islamçıların rəhbəri Xomeyini ağadır və bunun siyasətə aidiyyəti yoxdur. Söhbət mənəvi liderdən gedir.
- Ancaq hənəfilər Xomeyini ağanı lideri hesab etmirlər...
- Bütün islamçıların lideridir. Əgər kor günəşi görmürsə, onun varlığını inkar edə bilməz ki.
- İranın Ermənistana hər cür dəstək verməsini, 30 milyonluq Azərbaycan türkünün milli mədəni hüquqlarını tanımamasını necə qiymətləndirirsiniz?
- Bu geniş mövzudur. Dilə gələndə biz iddia edə bilmərik ki, məhdudiyyət var. Bizdə də talışlar var və iddia edə bilərlər ki, öz dilimizdə məktəb olsun...
- Azərbaycanda talışların öz dilində ibtidai məktəbləri var, amma İranda yoxdur...
- Yəni dövlətdə bir ümumi dil olmalıdır da.
- İranda 100 min deyil, 30 milyon azəri türkü var. Bu sayda insanın ana dilində danışmasının və təhsil almaması normalda dövlətin cinayət hadisəsi deyilmi...
- Mən istəmirəm bu mövzuya girəm. Bu dövlətlərin işidir. Əslində bu məsələlər haqda İranın səfiri danışmalıdır.
- Siz İranın Ermənistana ciddi şəkildə dəstək verməsini pisləyirsiniz, yoxsa bunu normal hal kimi qiymətləndirirsiniz?
- Əgər bu sübut olunursa, biz şübhəsiz ki, bu halı qəbul edə bilmərik. Amma dini rəhbərimizin özü də çıxış edərək bəyan edib ki, Ermənistana hər hansı bir dəstək islamçılıq deyil.
- Bəyəm siz İran İslam Respublikasının düşmən Ermənistanı neft və qazla təmin etməsini bilmirsiniz?
- Bizdə də, məlumatlar var ki, bu Azərbaycandan gedir. Düzdür, birbaşa getməsə də, dolayısı yolla Ermənistana daxil olur.
- İran rəsmi olaraq Ermənistana neft və qaz verdiyini inkar etmir, bəs siz niyə inkar edirsiniz?
- Bu başqa mövzudur. Siz nəzərə alın ki, bu mövzular mənim cavab verəcəyim məsələlər deyil. Fikrimcə, bu səfirlik və ya İran rəsmiləri cavab verə bilər. Biz İranın müdafiəçisi deyilik.
- İslam Partiyasının vahid namizəd ideyasına münasibəti necədir, belə fikirlər səslənir ki, hakimiyyətə real müxalifətdə olan qüvvələr seçkiyə vahid namizədlə getsinlər...
- Biz belə müzakirələrə hazırıq. Əgər namizəd istənilən keyfiyyətlərə cavab verərsə, biz buna etiraz etmirik. Biz əxlaqlı seçki və ədalətli hakimiyyət istəyirik. Elə bu istiqamətdə də hərəkata qalxmışıq. Bu prosesdə hər kəs iştirak edə bilər. Yəni islamçı və ya qeyri islamçı kimi bir fərqləndirmə yoxdur.

HÜSEYN ABBASOĞLU