Gözəl Bayramlı:
“Hakimiyyət Azərbaycan xalqını deyil, onun milli sərvətlərini sevir”

Suallara AXCP sədrinin müavini Gözəl Bayramı cavab verib. Müsahibimiz AXCP-nin Sabirabadda keçirilən müşavirəsinə polisin müdaxilı etməsindən, onların qeyri qanuni olaraq rayondan çıxarılmasından danışıb, seçkilərdə vahid namizədlı çıxış etməyin, müxalifətin birləşməsinin əhəmiyyətli olduğunu vurğulayıb, artıq xarici aləmin İlham Əliyev hökumətinə etimad göstərmədiyini qeyd edib.
- Gözəl xanım, Sabirabadda nə baş verib, sizə qarşı polis kobud davranış nümayiş etdiribmi?
- Bilirsiniz ki, AXCP rəhbərliyi tez-tez regionlara səfər edir, partiyanın regional təşkilatlarında müşavirələr təşkil edir, onu gücləndirmək üçün addımlar atır. Biz növbədi dəfə Sabirabad rayonunda müşavirə keçirmək qərarına gəldik. Bu müşavirədə 150 nəfərdən çox cəbhəçinin iştirakı nəzərdə tutulurdu. Aprelin 20-də saat 12.00-a qədər müşavirəyə 124 nəfərdən çox insan qatılmışdı. Belə bir məlumat gəldi ki, polis müşavirəyə gələn 50 nəfərdən çox insanın qarşısını kəsərək geriyə qaytarıb, bir neçə nəfəri isə saxlayaraq polis idarəsinə aparıb. Biz də buna əhəmiyyət vermədik və müşavirəmizə başlayaraq bu məsələyə sonra aydınlıq gətirilməsini məqbul saydıq. AXCP Ali Məclisinin sədri Həsən Kərimov müşavirəni açaraq çıxış etməyə başladı. Bu zaman həyətə əvvəlcə bir neçə polis daxil olaraq küçədə olan avtomobillərin götürülməsini tələb etdi.
- Müşavirə harada keçirilirdi?
- Tədbir AXCP fəalı Sahib Rüstəmlinin evində keçirilirdi. Bu toplantımızla bağlı AXCP Sabirabad icra hakimiyyətinə müraciət edərək yer istəmidi. Çünki AXCP-nin Sabirabad təşkilatının qərargahı çox kiçikdir. Həmdə öncədən polis xəbərdarlıq etmişdi ki, qərargahda belə bir tədbir keçirilməsin. Əks halda tədbirin qarşısı alınacaq. Bir sözlə, hakimiyyət bütün hallarda bu tədbirə qarşı çıxmışdı və qanunsuz olaraq yer verməyəcəyini bəyan etmişdi. Həyətə daxil olan polis avtomobili götürməyimizi tələb edən an yüzdən çox polis əməkdaşı da həyətə daxil oldu. Onların çoxu polis geyimində olsa da, mülki geyimdə olanlar da az deyildi. Əslində bu təzyiq yox, vəhşilik idi. Azərbaycanda seçki ilini olduğu bir vaxtda hakimiyyətin bu addımlarına heç cür haqq qazandırmaq olmur. Təsəvvür edin ki, onlar danışığa belə getmədilər. Biz heç zaman qarşıdurmanın olmasını istəməmişik, amma hakimiyyət xalqı qarşıdurmaya sürükləyir. Bizim sadəcə öz üzvlərimizlə söhbət edərək onların dağılışmasına razı salmaq istəyimiz belə zorakılıqla qarşılandı. Təsəvvür edin ki, polis çavuşunun siyasətə qarışmağa haqqı yoxdur və əsas vəzifəsi rayonda asayişi qorumaqdır. Ancaq adam üzünü bizə tutaraq deyir ki, siz rayona nəyə görə gəlmisiniz. Sanki Azərbaycanın rayonları ölkəni idarə edən ailənindir və rayonları da xanlıqlar elan ediblər və bu xanlıqlar da özlərinin qoçu dəstəsi ilə bura ölkə vətəndaşının gəlməsinə imkan vermirlər. Kənarda isə bir avtobusda qadın saxlamışdılar. Sonradan buz məlumat aldıq ki, bu xanımlar rayon ərazisində min cür zülmlə yaşayan məcburi köçkünlərdir. Görün, bu hakimiyyət min bir əzab-əziyyətlə yaşayan, vətənindən ayrı düşən bu insanlardan necə istifadə edir. Onlar bu qadınları bizim üstümüzə qaldırmaq istəyirdilər. Əlbəttə, biz buna imkan vermədik və dedik ki, özümüz rayonu tərk edirik. Orada insanı ağrıdan çox hadisə oldu. Dediyim kimi müşavirə Sahib Rüstəmli adında üzvümüzün evində keçirirdik. Onun da 90 yaşlı bir anası var və əsl türk qadınıdır. Polislərin bu ağ saçlı və yaşlı bir qadına vəhşiliyini görəndə mən dəhşətə gəldim. Bu zülmün qudurduğu an idi... Sahib Rüstəmlinin kiçik uşağını itələmək, övladlarının üzərinə getmən dəhşətli halllar idi. Azərbaycan hakimiyyəti bu xalqın üzərinə elə gedir ki, mən inanmıram ki, bundan sonra xalq belə insanların ölkəni idarə etməsinə razı olsun. Mən Azərbaycan hakimiyyətinə sual verirəm: 90 yaşlı anaya hansı köməklik etmişdiniz, dövlət kimi hansı qayğısına qalmışdınız, təqaüdünü 6 aydan bir 50 qəpik artırdığınız üçünmü onun üzərinə gedirdiniz? Yoxsa balaca körpəyə hansı sosial qayğı göstərmişdiniz, bəlkə hamının 11 yaşlı övladının adına xaricdə dəyəri milyonlarla olan mülklər almısınız, adlarına ofşor zonalarda şirkətlər qurmusunuz? Qadının, körpənin üzərinə belə şəkildə getmək nədir və siz Azərbaycana hansı əxlaqı gətirmək istəyirsiniz. Bu dəhşətdir. Amma bütün bunlara baxmayaraq AXCP olaraq biz bundan sonra da rayonlarda toplantılarımızı keçirmək niyyətindədyik və lazımı addımlar da atacağıq. Bildiyiniz kimi, bundan əvvəl də Ağstafa da buna bənzər hadisə baş vermişdi. Gecə qonaq qaldığımız mənzilə hücum olmuş, 50-60 polis bizdən rayonu tərk eləməyi tələb etmişdi. Bu Azərbaycan hakimiyyətinin mahiyyətidir və göstrirlər k, onların kitabında demokratiya anlayışı yoxdur, onlar ölkə idarəçiliyinə qiyam yolu ilə gəliblər və başqa cür də hakimiyyətdən getmək istəmirlər. Sözün əsl mənasında onlar xalqı qarşıdurmaya çəkirlər. Azərbaycan hakimiyyəti öz məsuliyyətini dərk etsə yaxşıdır.
- Gözəl xanım, bitərəf, siyasətlə məşğul olmayan insanlar iqtidar və müxalifət haqqında hansı rəydədir, sizə elə gəlmirmi ki, xalq iqtidarı istəmədiyi qədər də, müxalifəti istəmir?
- Mən sizin fikrinizlə razılaşa bilmərəm.
- Bu mənim mövqeyim deyil, cəmiyyətdə səslənən fikirlərdir...
- Siz də az-çox partiyaların fəaliyyətini, siyasi prosesləri izləyirsiniz. Regionlarda ən çox səfərdə olan şəxslərdən biri də mənəm. Xalqla təmasda oluram, ailələrlə görüşürəm. Əlbəttə ki, toy və yas mərasimlərinə də qatılıram. Bir sözlə insanlarla daima təmasdayam. Bu hakimiyyətdən narazılıq pik nöqtədədir. Təbii ki, Azərbaycan xalqının müxalifətdən umduqları var, xalq bu rejimin getməsi üçün müxalifətin bir araya gəlməsini vacib sayır. Amma biz də xalqın yaxşı yaşaması, demokratik cəmiyyətin qurulması, sərvətlərdən hamıya pay düşməsi üçün əlimizdən gələni edirik. Bu gün Azərbaycanı idarə edənlər bu xalqı deyil, onun sərvətlərini sevirlər. Biz xaqının yanında olan bir hakimiyyətin qurulmasından yanayıq. Xalqın haqlı iradı müxalifətin birliyi ilə bağlıdır. Xalq istəyir ki, müxalifət birləşsin və bu başdan qələbənin təminatını ortaya qoysun. Bu olmadığı üçün xalq müxalifətə acıqlıdır. Biz bunu nəzərə almalıyıq.Amma müxalifətə hakimiyyətə olan nifrət həddində nifrət yoxdur. Sadəcə qınaq var və bu da haqlı qınaqdır. Xalq hakimiyyətdən əlini üzüb və onun umacağı müxalifətdədir. Biz xalqın bu haqlı iradlarını eşidir, qəbul edir və həmdə başa düşürük.
- Bəs onda niyə birlik yoxdur. Seçkilərə 6 ay qalıb. İctimai Palatanın buraxılması haqda mövqelər güclənir, çünki orada fikir ayrılığı var, vahid proqram, taktika və baxış yoxdur. Bu haqda nə düşünürsünüz?
- Siz tamamilə haqlısınız. Hələ birliyin əldə olunmasının vaxtı da keçir. Uzun aylardır ki, buna nail olunmayıb. Seçkiyə bir il müddər qalandan AXCP sədri bəyan edib ki, müxalifətin vahid mövqeyi ortada olmalıdır, vahid proqram ətrafında fəaliyyət olmalıdır, inteqrasiya güclənməlidir və s. Bu istiqamətdə bizim fəaliyyətimiz davam edir. Zaman tələb edir ki, belə real birlik olsun. Biz birliyin əldə olunmasını ən çox istəyən partiyayıq. Çünki məsuliyyətimizi anlayırıq. Artıq seçkilərə altı ay zaman qalıb və yaxın dövr üçün əsas prioritet məsələ birliyin əldə olunmasıdır. Fikrimcə, yaxın zamanlarda birlik məsələsinin həlli istiqamətində ardıcıl və cəsarətli addımlar atılacaq. Biz AXCP olaraq müxalifətin birləşərək qəbul etdiyi qərarın həyata keçməsi üçün hər cür fədakarlığa hazırıq.Bizim cəmiyyətə mesajımız budur. Fikrimcə, xalqın da təpkisinə ehtiyac var. Müxalifətin birliyinə ehtiyac olduğu təqdirdə fikir ayrılıqlarına ehtiyac görmürük. Əgər kiminsə başqa düşüncəsi varsa, bir daha düşünsün. Bu seçki ilində avtoritar rejimin dayaqlarının möhkəmlənməsi üçün cəhdlər göstərir. Amma müxalifət də, ölkənin gələcəyini düşünürsə, bir yerdə vahid namizəd, vahid platforma ilə çıxış etməlidir. Zaman tədricən keçir. Amma mən yenə də ümidlərimi itirmirəm. Güman edirəm ki, müxalifət özündə təpər taparaq bir araya gələcək.
- Hazırda birlik istiqamətində razılaşmalar varmı, danışıqlar aparılırmı?
- Danışıqlar gedir. Əsasən İctimai Palata, EL Hərəkatı, Ziyalılar Forumu arasında müzakirələr gedir. Biz istənilən təşkilatla danışıqlara hazırıq, təki məqsəd demokratik dyərlərin müdafiə olunması, onların Azərbaycanda tətbiqi ilə bağlı olsun. Şəxsən mən düşünürəm ki, danışıqların nəticəsi olaraq konkret qərarların qəbul olunmasının vaxtı çatıb.
- Hakimiyyətin apardığı siyasəti necə qiymətləndirirsiniz, rejim yaxın dövrdə nəyə nail olmaq istəyir?
- Hakimiyyətin apardığı siyasət normal ölkələrdə aparılan seçki öncəsi vəziyyətə uyğun deyil. Bu qabarıq görünür. Məhz bu istiqamətdən də xarici aləmdən demokratiya çağırışları, insan haqlarına dair bəyanatlar səsləndirilir, tənqidi fikirlər deyilir. Amma Azərbaycan hakimiyyəti bunların hamısını qulaqardına vurur. Baxın, hakim ailənin, Azərbaycanı idarə edənlər haqqında nüfuzlu təşkilatların araşdırmalarını, ortaya qoyduqları korrupsiya faktlarını bunlar necə qulaqardına vururlar. Eləcədə seçki ilində qanunlara hörmət edilməsi, sərbəst toplaşma azadlığının təminatı, xalqla təmasların qurulmasına dair çağırışları eşitmir. Görünən budur ki, hakimiyyəti siyasi qüvvələrin fəaliyyətini çərçivəyə alıb, özünə sərf edən “vəziyyət” yaradıb və bundan kənara çıxmaq istəmir. Hakimiyyət seçki ilində üzərinə düşən vəzifəni və öhdəlikləri yerinə yetirmək istəmir. Əksinə, əvvəlki illərdə olduğu kimi cəmiyyətə basqı edib, siyasi proseslərin qarşısını almaq istəyir. Azərbaycanda əvvəlki illərdə olduğu kimi qanunsuz və saxta seçki keçirmək istəyirlər. Görünən budur. Və müxalifətin birliyi bu ssenarinin qarşısını kəsən ən ciddi faktorlardan biri ola bilər.
- Xaricdən hakimiyyətə basqılar varmı, bu təzyiqlər Azərbaycanda demokratik rejimin qurulması ilə bağlıdır, yoxsa İlham Əliyevdən hansısa güzəştlər qoparmaqla əlaqədardır?
- Hesab edirəm ki, təzyiq və tələblər demokratiya istiqamətindədir. Biz bilirik ki, bir çox ölkələrin Azərbaycanda maraqları var və bu da normal haldır. Amma son zamanlar xaricdən gələn bəyanatlarda demokratiya prioritet kimi qoyulur və ədalətli seçki çağırışları səslənir. Həmdə bu və ya digər şəkildə İlham Əliyevin üçüncü dəfə namizədliyini irəli sürülməsi qırmızı xətt kimi qeyd edilir. Elə normalda da belə olmalıdır. Uzun illərdə xalqın dəstəyi olmadan, zor və saxtakarlıq əsasında hakimiyyətə gələnlərin uzun illər hakimiyyətdə olması Azərbaycanı xaosa aparır. Odur ki, bu çağırışlar demokratiya istiqamətindədir.

Nemət Orucov