“Hakimiyyət insanların fikirlərini ifadə etmək haqlarına hörmət qoymağı öyrənməlidir”

Tomas Melia: “. Azərbaycan xalqı daha çox açıqlığa və demokratiyaya hazırdır”

Dekabrın 11-də ABŞ dövlət katibinin demokratiya, insan hüquqları və əmək məsələləri üzrə köməkçisinin müavini Tomas Melia “Azadlıq” radiosuna müsahibə verib. O, Azərbaycanda insan haqlarının durumu, prezident seçkiləri, icazəsiz aksiyalar, korrupsiya və son video qalmaqallarla bağlı suallara cavab verib.Müsahibənin bir hissəsi radionun saytında yerləşdirilib.

- Bakıya ötən ilki səfərinizdə Azərbaycan hakimiyyətini insan haqlarına hörmət etməyə və siyasi açıqlığa çağırmışdınız. Həmin vaxtdan hakimiyyətin davranışında nə dəyişib?

- Kədərli olsa da qeyd etməliyəm ki, ötən ildən bəri ümumilikdə demokratik idarəçilik sahəsində, insan haqları ilə bağlı elə də nəzərəçarpacaq yaxşılaşma olmayıb. Ancaq məmnunuq ki, ötən il həbsdə olan bəzi jurnalist və bloqqerlər buraxılıb. Xüsusilə də bir neçə ay əvvəl buraxılmış Bəxtiyar Hacıyevin adını qeyd etmək istərdim. Bütün bunlar yaxşıdır. Ancaq onu demək lazımdır ki, onlar ifadə azadlığından istifadə etdiklərinə görə həbsə atılmamalıydılar. Biz Azərbaycan hökuməti ilə işimizi davam etdiririk. Ötən ildən nəzərəçarpacaq irəliləyiş görməmişik, ancaq ümid edirik ki, gələn ilki prezident seçkiləri Azərbaycana daha bir imkan yaradacaq ki, demokratik siyasi proses üçün potensialını, bütün vətəndaşların haqlarına hörmət qoyduğunu göstərsin.

- Bəzi jurnalist və bloqqerlərin buraxıldığını qeyd etdiniz. Ancaq cəmiyyətdə bir qorxu var ki, buraxılan fəalların yerinə yeniləri həbs oluna bilər. Bu tendensiyanı birdəfəlik dəyişmək üçün nə etmək lazımdır?

- Dəyişilməli olan odur ki, Azərbaycan günün məsələlərinin, ölkənin problemlərinin daha açıq müzakirə yolunu tapmalıdır. İqtisadi imkanlar açılmalıdır, bütün azərbaycanlılar iqtisadi inkişafa qatılmalıdır. Ölkənin siyasi, ictimai, iqtisadi irəliləməsinin düzgün yolu barədə adamların fikirləri olacaq. İdarəçi qurumlar müxtəlif fikirlərə dözümlü yanaşmağın yolunu tapmalıdırlar. Bu 21-ci əsrdə uğurun açarıdır. Azərbaycanın tam çiçəklənən, suveren, uğurlu ölkə olması üçün hakimiyyət insanların fikirlərini ifadə etmək haqlarına hörmət qoymağı öyrənməlidir. Azərbaycan xalqı daha çox açıqlığa və demokratiyaya hazırdır. Azərbaycana həmin istiqamətdə irəliləməsinə kömək edirik.