“Sosxeber.info” xəbər portalının sədri, “Azərbaycan İnsan Hüqüq və Azadlıqların Müdafiəsi Komitəsi”nin sədr müavini Murad Həmidov ölkədə mətbuatın durmu haqqında fikirlərini “Gündəm Xəbər”in əməkdaşı ilə bölüşdu.

- Murad bəy, media nümayəndəsi olaraq ölkədə medianın vəziyyətini necə qiymətləndirirsiniz?

- Azərbaycanda artıq bir neçə ildir ki, mətbuatın durumu ürəkaçan deyil. Demək olar ki, 2013-cü ildən effektiv şəkildə ölkədə azad mətbuatın sıxışdırılması prosesi həyata keçirilir. Belə görünür ki, ölkədə azad mətbuatın sıradan çıxarılmasına maraq göstərən xüsusi qrup var. Buna görə də hesab edirəm ki, ölkədə tənqidi fikir söyləyən mətbuatın çapının dayandırılması, o cümlədən informasiya saytlarına girişin bloklanması və ya bəzi redaksiyaların cərimələnməsi heç də təsadüfi deyil. Elə sizin “Gündəm-xəbər” qəzetinin 70 000 manat cərimə olunması o deməkdir ki, bu qəzet də öz çapını dayandıraraq tarixə çevrilsin. İndi də qəzetin saytına giriş məhdudlaşdırılıb. Bütün bunlar azad mətbuatı məhv etməklə bərabər insanların alternativ informasiya əldə etməsinin qarşısını almağa hesablanmış addımdır. Buna görə də, mən birmənalı şəkildə hesab edirəm ki, ölkədə mətbuatın məhv edilməsi istiqamətində dəqiq konturları müəyyənləşmiş bir layihə həyata keçirilir.

-Murad bəy, həm sosial mediada, həm də elektron KİV-də həm jurnalislər, həm də mütəxəssislər öz fikirlərini çatdırırlar.

– Mənim fikrimcə, bu belə görünür. Əslində isə jurnalistlər və mütəxəssislər özlərini korrektə edirlər ki, hansı sözü necə demək lazımdır. Bu özü artıq ifadə azadlığının məhdudlaşdırılmasına işarədir. Məgər “Gündəm-xəbər” qəzetinin 70000 cərimələnməsi doğrudan vergidən yayınmayla bağlıdır, yoxsa hansısa məmurun sifarişi və ya həmin şəxsə yönəlik tənqidi yazılarla bağlıdır. Doğrudanmı bu yaxınlarda 6 il həbs cəzası almış jurnalist Əziz Orucov vəzifəsindən sui-istifadə edib, ya da Əfqan Muxtarlı Gürcüstan-Azərbaycan sərhəddini qeyri-qanuni keçib. Bu adam əgər tənqidi fikrə görə ölkəni tək edibsə, niyə Azərbaycana keçməlidir ki? Deməli Azərbaycanda saysız-hesabsız elektron KİV var, çoxlu sayda çap orqanları var, lakin həmin mətbuatda çalışan insanların fikir azadlığı yoxdur. Bu da ölkəmizdə hakimiyyətdə təmsil olunanların mətbuata təzyiqi və basqısı ilə bağlıdır. Məsələnin digər tərəfi isə ondan ibarətdir ki, mətbuat azadlığının sıxışdırılması ölkəmizin beynəlxalq imicinə ziyan vurur. Hal-hazırda isə bu bizə lazım deyil. Çünki, Qarabağ münaqişəsinin ədalətli həlli üçün bizə beynəlxalq dəstək lazımdır. Çağdaş dünyada isə söz və ifadə azadlığı olan ölkələrə xüsusi diqqət yetirilir.

Rahib
gundemxeber.az