“Gündəm-Xəbər” qəzetinin cəriməsi də elə məmurların tənqidə dözümsüzlüyü ilə bağlıdır.

- Murad bəy, Avropada deyirlər Azərbaycanda siyasi təqiblər çoxalır və siyasi məhbusların sayı artır. Əslində baxanda siyasi təqiblər hiss edilmir? – Məlumdur ki, Azərbycanda tənqidi münasibətdə olanlara qarşı dözümsüzlük var və həmin şəxslər müxtəlif adlarla həbs olunurlar. Siyasi məhbus kriteriyasına baxışlar müxtəlif olsa da, mövcud hakimiyyətə tənqidi münasibətdə olan şəxslər və onların ailə üzvləri, yaxın qohumları hər hansı təzyiqə və təqibə məruz qalan şəxslər siyası məhbus hesab edilir. Adətən tənqidi fikirlərə qarşı dözümsüzlük olan ölkələrdə siyasi məhbuslara daha çox rast gəlmək olur. Bu mənada Azərbaycanın son illərdəki durumuna baxsaq bir neçə aspektdən qiymət vermək düzgün olardı. Əvvvəla neft və qaz ehtiyatlarının istismarıyla ölkəyə külli miqdarda pul gəldiyindən korrupsiya qaçılmaz oldu. Digər tərəfdən korrupsiyaya bulaşmış məmurlar hər vəchlə tənqidə qarşı dözümsüzlük göstərdiklərindən siyasi məhbus olayı da bizim üçün qaçılmaz bir hal olmuşdur. Belə bir situasiyada Azərbaycanda siyasi məhbusların olması təbii bir haldır.
- Amma zaman-zaman siyasi məhbusların azad edilməsilə bağlı müəyyən güzəştlər edilir. Sizcə, bunu müsbət dəyişikliklərə doğru addım kimi dəyərləndirmək olmaz? – Mən bu məsələyə fərqli müstəvidən baxıram. Təbii ki, məhbusların azad olunması müsbət haldır. Amma söz azadlığının tam təmin olunmadığı halda ciddi irəliləyişdən danışmaq çətindir. Elə sizin “Gündəm-Xəbər” qəzetinin cəriməsi də ifadə azadlığıyla bağlı məsələdir. Amma Azərbaycanda müxtəlif qurumlar müxtəlif kontekstdən olan adamları siyasi məhbus adlandırırılar. Burada uyğunsuzluq ola bilər. Ayrı-ayrı yerli və beynəlxalq təşkilatlar Azərbaycandakı siyasi məhbuslarla bağlı müxtəlif rəqəmlər səsləndirirlər. Eyni zamanda ayrı-ayrı təşkilatlar siyasi məhbus kriteriyasını və sayını müxtəlif cür göstərirlər. Norveç Helsinki Komitəsi Azərbaycandan 75 nəfəri siyasi məhbus olaraq tanıyır (onların 76 faizi dini fəallardır). “Freedom House” təşkilatı yaz aylarında Azərbaycandakı siyasi məhbusların sayını 80 nəfər göstərmişdi. Əslində məhkəmə hüququ təmin olunmayan vətəndaş da siyasi məhbus sayılır.
- Vəziyyətdən çıxış yolunu nədə görürsünüz? – Məncə məmurlar Azərbaycanda siyasi dözümsüzlüyü aradan qaldırmalıdır. Sadəcə tənqidi fikir söyləyənlərə qarşı münasibət dəyişməlidir. Bu həm də cəmiyyətin müəyyən tərəflərinin inkişafına kömək etmiş olar. Çünki, tənqid olunan sahənin inkişafına zəmin yaratmış olur. Eyni zamanda mətbuatın bu prosesdə dəstəyi də əvəzsizdir. Çünki, mətbuat vətəndaş cəmiyyətinin inkişafına əvəzsiz töhfə verir.