Bir müxalif partiya sədrinə soru sordum. İlk "cavab"-ı hökümət saytları verdi. Ardınca trollar və müxalifətdə olduğunu iddia edənlər. Hökümət saytlarını və trolları boş verdim. Müxalifətçi olduqlarını iddia edənlərə nəzər saldım. Çox acı və maraqlı mənzərə ilə rastlaşdım...

Adamlar müxalifət partiyasının İdarə Heyətində, Ali Məclisində, rayon şöbə sədrliyində və s. təmsil olunurlar. Hakimiyyət əleyhinə bir kəlmə danışmırlar. Aksiyalarda, mitinqlərdə iştirak etmirlər. Siyasi məhbusların adını çəkmirlər...
Facebook səhifələrinə baxdım. Ölkədə baş verən bunca qanunsuzluqların, talanların, seçki saxtakarlığının, korrupsiyanın, büdcə oğurluğunun, repressiyaların, həbslərin fonunda bu insanlar susurlar. Özlərinin, övladlarının, nəvələrinin şəkillərini paylaşırlar. Dostlarının ad günlərini təbriki edir və başsağlığı verirlər. Toylarda yeyib- içmək şəkillərini çəkib göstərirlər. Özləri də ya Rusiyada pul qazanır, ya hökümətdən maaş alır, ya məsciddən nəzir- niyaz qoparır, ya da obyekt işlədir. Hələ utanmırlar bizə ağıl öyrədir, yol göstərirlər. Hətta aralarında bizə hakimiyyətlə iş birliyində olduğumuzu deyənlər də oldu (!?). Belə yerdə deyirlər; "utanmasan oynamağa nə var ki"...

Özlərinə dedim, burdan da deyirəm. Sizin kimi insanların partiya rəhbərliyində təmsil olunmasıdır ki, müxalifət və ölkə bu vəziyyətdədir. Günah sizinlə yanaşı sizləri partiya rəhbərliyinə dartıb gətirərək mübariz insanları dışlayan "lider"- lərdədir. Ölkədəki vəziyyət sizlərə sərf etdiyindən olduğunuz partiyada dəyişiklik və inkişaf istəmirsiniz. Belə insanlarla yavaş- yavaş əlaqəni kəsmək və facebook dostluğumu dayandırmaq qərarına gəlmişəm. Artıq ilk addımları atıram. Saxta insanları ətrafınızda və dostluğunuzda saxlamayın. Qoy onlar gedib ya göründükləri kimi olsunlar, ya da olduqları kimi görünsünlər. Bacarırlarsa, müxalifətçi olduqlarını iddia edirlərsə gedib bu talançı, saxta hakimiyyətə qarşı mübarizə aparsınlar. Söz demək haqqı qazansınlar. Sonra gəlib namuslu və mübariz insanlarla polemika aparıb danışsınlar...