Anti - AXC- nin anatomiysına dair qeydlər

NƏTİCƏ və SON SÖZ

Yekun vurmaq olar. Bu yazıda AXC əleyhinə irəli sürülən faktları xatırladıb aşkar olanı yada salaq.

1.“Vəzirov 90- cı ildə ermənistan qaçqınlarının Stepanakert və Şuşada yerləşdirilməsi üçün qərar qəbul edibmiş. Xalq cəbhəsi bu Kommunist partiyasını möhkəmıləndirə deyə buna qarşı çıxıb və ... məzmunda bəyanat verib”. - Bunun başdan ayağa uydurma olduğu, heç bir digər obyektiv və hətta subyektiv fakt, informasiya, məlumat, mülahizə ilə təstiqlənmədiyi və bu uydurmanın ilkin və yeganə mənbəyinin və müəllifinin Elmira Axundovanın özünün olduğu aşkar edilib sübut olundu.

2.“AXC liderləri bir nəfər kimi Şuşa və digər yaşayış məntəqələrinin social iqtisadi inkişafına dair hökümət proqramına qarşı çıxdılar. AXC liderləri bəyan etdilər ki, “Biz bu Proqramı müdafiə edə bilmərik, çünki o azərbaycanlı əhalinin vəziyyətinin yaxşılaşdıracaq. Buna isə yol vermək olmaz, çünki Qarabağda vəziyyətin yaxşılaşması Kompartiyaya əl verir, o bundan ancaq güclənir” – Burdakı hər iki məlumatın (Şuşa və digər yaşaış məntəqələrinin inkişafına dair dövlət proqramı və AXC liderlərinin bu proqram əleyhinə bəyanat vermələri) başdan - ayağa uydurma olduğu, heç bir digər obyektiv və hətta subyektiv fakt, informasiya, məlumat, mülahizə ilə təstiqlənmədiyi və bu uydurmanın birinci və yeganə mənbəyinin və müəllifinin Rasim Ağayevin özünün olduğu, Elmira Axundova tərəfindən təkrarlanıb tirajlandığı aşkar edilib sübut olundu.

3.” Əbülfəz Qədirqulu oğlu Əliyevin tərəfdarları bildirir ki, AXC liderləri həmin vaxt ona təkidlə tövsiyə edirdilər ki, hakimiyyət qaçqınları mümkün olduğu qədər Dağlıq Qarabağ və onunla həmsərhəd rayonlarda yerləşdirilməyə məcbur edilsin. Lakin AXC- nin lideri qaçqınların hərakatın zərbə qüvvəsi olduğunu bəyan edərək bu təklifin əleyhinə çıxdı.”- Bir jurnalistin 1996- cı ilə aid anonim hərəkat funksionerlərinə istinadən dövriyyəyə buraxdığı, böyük ehtimalla onun özünün yaradıcılıq fantaziyasının məhsulu olan, heç bir obyektiv, və ya digər subyektiv faktla təsdiqlənməyən, əksinə Ə. Elçibəyin və AXC- nin bu məsələdə gerçək mövqeyini ifadə edən dəlillərlə birmənalı təkzib edilən şaiyə olub, Rasim Ağayev tərəfindən təhrif olunaraq tirajlandığı, uydurma olduğu aşkar edilib sübut olundu.

4.“1991- ci ilin aprel günlərinin birində AXC İdarə Heyətinin üzvü Hikmət Hacızadə zəng etdi və məndən kəndlərin bandit birləşmələrindən təmizlənməsi əməliyyatına son qoymağı xahiş etdi”. - Bunun başdan ayağa , heç bir digər obyektiv və hətta subyektiv fakt, informasiya, məlumat, mülahizə ilə təstiqlənməyən, H. Hacizadənin özü tərəfindən, habelə həmin dövrdə H. Hacızadənin məqalə və müsahibələrində ifadə etdiyi obyektiv dəlillərlə birmənalı və qəti şəkildə təkzib edilən uydurma olduğu, bu uydurmanın birinci və yeganə mənbəyinin və müəllifinin Ayaz Mütəllibovun özünün olduğu aşkar edilib sübut olundu.

5.“1991- ci ilin aprel günlərində , Dağlıq Qarabağın erməni bandit birləşmələrindən təmizlənməsi üçün əməliyyat getdiyi çətin dövrdə AXC funksionerləri pribaltikada erməni azadlıq hərəkatının nümayəndələri ilə görüşüb “Qarabağda aparılan əməliyyatlar zamanı yerli erməni sakinlərinin A. Mütəllibov tərəfindən hüquqlarının pozulmasına dair” birgə bəyanat imzaladılar. Bəyanat Qorbaçova çatdırılanda o, Qarabağdakı əməliyyatları yarımçıq dayandırmaq əmrini verdi”- Burdakı bütün məlumatların başdan ayağa uydurma olduğu, heç bir digər obyektiv və hətta subyektiv fakt, informasiya, məlumat, mülahizə ilə təstiqlənmədiyi və bu uydurmaların birinci və yeganə mənbəyinin və müəllifinin Ayaz mütəllibovun özünün olduğu, Elmira Axundova tərəfindən təkrarlanıb tirajlandığı aşkar edilib sübut olundu.

6 “AXC və hamıdan əvvəl Əbülfəz Elçibəy bu aksiyaya (Dağlıq Qarabağın erməni bandit birləşmələrindən təmizlənməsi üçün əməliyyata – P. H.) qarşı çıxış etdilər. AXC – nin nəzarəti altında olan özünü müdafiə qüvvələrinin komandirləri bildirdilər ki, onlar “ermənilərin sıxışdırılıb çıxarılmasına yol verməyəcəklər ki, Azərbaycan Qərbin demokratik qüvvələrinin təblğati hücumları için hədəfə çevrilməsin... AXC resublika rəhbərliyini açıq şəkildə Qarabağın erməni əhalisini zorakılıqla deportasiya etməkdə günahlandıraraq erməni millətçilərinin antiazərbaycan kampaniyasına qoşuldu. AXC rəhbərliyi nəinki erməni separatizmi ilə əhatə olunmuş ərazilərdə nəzarət ələ almaq aksiyalarını sabotaj etdi, əksinə ermənilərlə əl - ələ verib bu tədbirləri pislədi.” –Burdakı bütün informasiya və məlumatların başdan ayağa uydurma, bu uydurmaların ilkin və yeganə mənbələrinin və müəlliflərinin Rasim Ağayevin və Vaqif Hüsenovun olduğu və Elmira Axundovanın bu uydurmaları təkrarlayıb tirajladığı, başqa hər hansı faktla təsdiq edilməmə, özlərinə məxsus digər məlumatlarla ziddiyyətə təşkil etmə, hadisələrin baş verdiyi dövrdə AXC –nin KİV də dərc edilib yayılmış rəsmi sənədləri, AXC funksionerlərinin yenə həmin dövrdə çap edilmiş açıqlamaları, Qarabağ probleminin həllinə dair AXC- nin mövqeyini əks etdirən digər obyektiv və məntiqi dəlillərlə aşkar edilib sübut olundu.

İnanılası deyil! Bütün faktlar yalan, saxta çıxdı!

AXC əleyhinə olan bütün “faktlar” yalan və saxta çıxacaq. Çünki daha böyük yalandan çıxırlar. Yalandan həqiqət çıxmaz ki, yalan çıxar.

Anti - AXC- nin BÖYÜK YALANI AXC- nin tarixmizin ən məsuliyyətli anlarında milli xəyanət və satqınlıq mövqeyi tutması haqqındakı yalandır. Bu “Böyük Yalan”, ilkin yalandır. Zatına görə heç bir yalandan yaranmayıb. AXC haqqında bütün yalanlar ondan yaranır, varlığına görə ona borcludur, ona xidmət edir. Mayası tarix və kütlə tərəfindən vurulmuşların, təhqir olunmuşların, alçaldılmışların, atılmışların, incidilmişlərin, uduzmuşların təkəbbürü, həsədi, paxıllığı, öfkəsi, kini, xəyanəti və satqınlığıdır. Anti-AXC- nin anatomiyası da budur. Həsəd, öfkə, kin, Iküzlülük, riyakarlıq, qeybət, şaiyə, saxtaçılıq, təhrifçilik, yalan, qaralama, iftira, şər, böhtan dolu tam bir qaranlıq kabuslar mağarası. Kabusların yığnağı.

Bəs bunları deyənlər, yazanlar, yayanlar?! Yalançılar! Yalanı yalanla sulayırlar. Yalanı yalanlarla yoğururlar. Yalanı yalanla beçərirlər. Yalanı yalana calayırlar! Yalanı yalanlla sübut edirər. Yalan şahidləri! Yalanın xidmətçiləri! Yalan kahinləri! Yalanı yalanlarla bəzəyirlər. Yalana yalanlardan həqiqət donu biçirlər. Yalançılıq dərziləri! Nəsibi yalançılıq olanlar! Axır aqibəti pislik olanlar! Onlara bundan ağır cəza olmaz. Özləri duyub, görüb, bilsələr də, bilməsələr də!

Son söz

Heç şübhəsiz tarixi tarixçilərin öhdəsinə buraxmaq lazımdır. Bu gün siyasi cəhətdən aktual olmayan mövzulara aludə olmamaq , bu çərçivəyə qapanmamaq, rəqiblərin informasiya tələlərinə düşməmək çox vacibdir. Bu günə və gələcəyə köklənmək gərəkdir. Lakin özünü görməzliyə və eşitməzliyə vurmaqla da keçmişin təqibindən qurtarmaq heç də həmişə mümkün deyil. Rəqiblərimiz də buna yol verməzlər və yol vermirlər də. İstəsək də, istəməsək də bu günümüz və gələcəyimizin dərki keçmişimizin hərtərəfli, obyektiv təhlilindən keçir. Bu təhlil nə qədər ağrılı, çətin, xoşagəlməz görünsədə sonda, strateji olaraq bizim xeyrimizədir . Bilmək lazımdır ki, 80- cı illərin sonu, 90- cı illərin əvvəlləri sadəcə tarix deyil, davam edən tarixdir və keçmişimiz uğrunda mübarizə gələcəyimiz uğrunda mübarizədir. Ona da heç bir şübhə yoxdur ki, yalan doğruya, nahaqq haqqa məğlub olacaq. Həqiqət qalib gələcək. Mən bu qeydlərlə bu müqəddəs, şərəfli, böyük davaya kiçik bir töhvə verməyə çalışdım.

Pənah Hüseyn, Xalq Partiyasının lideri, Azərbaycanın keçmiş baş naziri

fevral – may 2013- cü il.