Siyavuş Novruzov ölkə rəhbərinə yol göstərdi: “Bu məsələ həll edilib. 2013-cü ilin prezident seçkilərində namizəd İlham Əliyev olacaq”
gundemxeber.az Qəzetimizin bu dəfə ki, müsahibi Yeni Azərbaycan Partiyasının icra katibinin müavini və seçki qərargahının rəhbəri, deputat Siyavuş Novruzovdur. YAP funksioneri ilə müsahibəni təqdim edirik.
- Dekabrın 10-u, Beynəlxalq İnsan Haqları Günündə müxalifətin keçirdiyi icazəsiz aksiyaya polis qeyri adekvat güc tətbiq edib. Nəticədə çoxlu sayda insan xəsarət alıb. Bu haqda nə deyə bilərsiniz? - Qəti şəkildə sizinlə razılaşmıram. Siz özünüz də bilirsiniz “Sərbəst toplaşmaq haqqında” qanun var. Həmin qanunda açıq göstərilib ki, qeyri qanuni yürüşlər, piketlər, aksiyalar keçirmək olmaz. Bunun üçün müvafiq icra hakimiyyəti yer ayırır. Bu yerdə kütləvi etiraz aksiyasının müxtəlif formasından istifadə etmək olar. Hüquq mühafizə orqanları da, bu zaman kimliyindən asılı olmayaraq bu tədbirdə iştirak edən insanların təhlükəsizliyini təmin etməlidir. Çünki bu insanlar da Azərbaycan vətəndaşlarıdır. Bu baxımdan dekabrın 10-da keçirilən aksiyaya əslində aksiya demək olmaz. Sadəcə olaraq bu bir uşaq oyunu idi. Əli Kərimli və müxalifətdə təmsil olunanların beş-on qohumu, eləcədə ətrafında olan bir neçə insan, həmçinin qəzetində işləyən bəzi jurnalistlər ora çıxıblar. Nəzərə almaq lazımdır ki, jurnalist əslində tərəfsiz olmalıdır. Belə tədbirlərdə də jurnalistlər prosesi işıqlandırmalıdır. Təəssüf ki, belə olmayıb. Əsas məqsəd İnsan Hüquqları Günü diqqəti bu aksiyaya çəkib Azərbaycan haqqında rəy yaratmaq idi. Bizdə məlumat var idi ki, Əli Kərimli onları öyrədib. Hətta heç bir şey olmasa da, başlarını divara vurmalı, bütün oyunlardan çıxılmalı idilər ki, ciddi insdent törədilsin. Ancaq hüquq mühafizə orqanları çox diqqətlə, təhlükəsizliyi təmin eləmək məqsədilə qeyri qanuni aksiyanın qarşısını almaq üçün müvafiq addımlar atıb və tədbirlər həyata keçirib. Bunlar polis yaxınlaşanda özləri yerə uzanır. Bu halda hansı zor tətbiq eləməkdən gedə bilər. Eləcədə gənclərin əksəriyyəti. Polis də onları dəvət edib ki, buradakı vətəndaşların hüquqlarını pozmayın. Onları avtobusa əyləşdirib şəhərin başqa istiqamətinə aparıb orada sərbəst buraxıblar. Vəziyyət bundan ibarətdir.
- Siz iddia edirsiniz ki, aksiyada 10-15 nəfər iştirak edib. Amma partiyaların yaydığı rəsmi xəbərlərində həbs edilən 40-dan çox insanın adı və soyadı açıqlanıb. Bu fakt sizin dediklərinizin doğru olmadığını ortaya qoymurmu? - Bilirsinizmi, onların hamısı fərqli yerlərdə saxlanılıb. Onlar bir dəfə dedilər Milli Məclisin qarşısında aksiya edəcəklər. Sonra isə Fəvvarələr Meydanını seçdilər. Hələ “Malakan” bağında da olub. Yəni müxtəlif yerlərdə 4-7 nəfərlik aksiya ediblər. Uşaq kimi buradan ora qaçıblar, qışqırıblar və s. Bilirsinizmi, onlar bununla da öz-özlüyündə aksiyanın yeni bir növünü kəsf ediblər. Bu uşaq oyuncağıdır. Yaxşı ki, gedib uşaq baxcalarına müraciət etmirlər ki, oradan uşaq gətirsinlər. Yəni ki, bu cür aksiya dünyada yoxdur və gülünc doğurur.
- Hakimiyyətdə olan qüvvə olaraq onlardan çəkindiyiniz üçün belə davranış tərzi ortaya qoyulur, qeyri adekvat güc tətbiq olunur? - Siz ozünüz orada olanları gördünüz. Onun nəyindən hakimiyyət qorxur? Əksinə, hakimiyyət müvafiq yer ayırır və deyir ki, get sosial bazanı yığ və aksiyavı keçir. Əgər belə sosial bazan varsa və bu tədbiri keçirməyə maliksənsə buyur keçir. Sonrada bəyan elə ki, bura mənə darısqaldır və biz böyük meydan tələb edirik. Əgər bu sosial bazan mövcuddursa. Məndə deyirəm ki, bu qüvvələr bir müddət əvvəl “20-ci sahə” deyilən ərazidə onlara ayrılan meydanın üçdə birini doldura bilmirdilər. İndi hər yoldan keçən deyə bilməz ki, mənə yer verin gedib aksiya keçirim, uşaq kimi ora-bura qaçım və başqasının da hüquqlarını pozum. Xeyr! Belə şey yoxdur. Onlarda başqalarının hüquqlarını pozmamalı və öz hüquqlarını da müvafiq yerlərdə reallaşdırmalıdır. Nə istəyirlər etsinlər, amma qanun çərçivəsində etsinlər.
- YAP-ın Milli Məclisdə 70-dən çox deputatı var və onların əksəriyyəti müxalifəti kəskin tənqid edirlər. Amma bu müxalif düşərgədə xüsusi aqressiya ilə qarşılanmır. Amma sizin hər hansı bir fikriniz müxalifət və demokratik düşərgədə aqressiya və qeyri ciddi qarşılanır. Sizcə, buna səbəb nədir? - Baxın, təxminən biz on dəqiqədir ki, burada söhbət edirik və mənim fikirlərim də bir kəlmə də olsun təhqir elementi yoxdur. Mən müxalifəti tənqid edirəm və onların addımlarının səhv olduğunu qeyd edirəm. Bu müsahibə zamanı bir təhqiramiz fikir söylədimmi? Əlbəttə söyləmədim. Mən olan reallığı əks etdirirəm. Mənim qeydlərim onların əməlini ifşa edən fikirlər olduğundan onlar da qıcıq yaradır.
- Niyə məhz siz bir fiqur kimi bu düşərgədə aqressiya yaradırsınız? - Bunun bir səbəbi var: onların ifşa olması. Məsələn, bunlar “Eurovision” mahını müsabiqəsi zamanı bura gələn əcnəbi jurnalistləri aparıblar Yeni Yasamala, Əhmədiyə və Günəşliyə. Gedək Londona və mən sizə 50 cür bu formada küçə göstərim. Təbii ki, şəhərin hər yeri eyni cür ola bilməz. Şəhərin mərkəzi, strateji küçələri, ənənə ilə yaşayan məhəllələri var. İndi burda maraq nədir ki, sən onu tutub aparırsan ki, filan yerdə küçə pisdir, zibillik var və s. Nəzərə alın ki, burada söhbət hakimiyyətdən deyil, Azərbaycanın təmsilçiliyindən gedir. Bunların Azərbaycana qarşı daxili aləmləri o qədər qarışıqdır ki, hətta belə əməllərdən onlar çəkinmirlər. Təsəvvür edin ki, belə kadrlara ermənilər və Azərbaycanı istəməyənlərdə baxacaq. Sən Azərbaycanın gözəl yerlərini bir kənara qoyursan və gedib harada zibilxana varsa oranı göstərirsən.
- Hakimiyyətin xalqa xidmətini qoyaq bir kənara. Bəs dövlətin vətəndaş qarşısında pozitiv öhdəliyi yoxdurmu, bu öhdəliyə zibixanaların tez-tez təmizlənmsi, ərazinin təmiz saxlanılması daxil deyilmi? - Ola bilər. Bəli, kimsə vəzifəsinə səhlankar yanaşa bilər. Ancaq bu o demək deyil ki, Azərbaycan xalqı və onun düşüncəsi bu cürdür.
- Siz daima ölkədə analoqu olmayan inkişafdan, hamının elliklə yüksək səviyyədə yaşadığını iddia edirsiniz. Siz ölkədə narazılığın olduğunu etiraf edirsinizmi? - Cənnətin özündə də nararazıçılıq var. Biri deyir ki, almanın dadı elədir, biri deyir almanın dadı belədir. Ona görə də, narazılığın olmadığını demək doğru olmaz. Biri “jek” müdirindən narazıdır, biri yolda tıxacda qaldığından narazı olur, başqası ola bilsin ki, öz sosial problemini həll edə bilmədiyi üçün narazıdır, biri iş tapa bilmədiyi üçün narazıdır və s. Adi bir ailədə beş uşaq olanda hamısı razı qalmır. Biri narazı olur, başqası daha fəal olur, digəri zəif olur və s. Bu bütün dünyada belədir. ABŞ-ı və ya ən inkişaf edən ölkə olaraq Yaponiyanı götürün. Hər yerdə bu var. Amma bu narazıçılıq dövlətdən, dövlətçilikdən və prezidentdən olan narazıçılıq deyil. Biri tutaq ki, hansısa məmura şikayət edib və məmur da şikayətə baxmayıb. İndi bu şəxs narazı ola bilər. Amma bu şəxs dövlətini və vətənini sevir. Sadəcə olaraq məmurdan narazıdır. Bu başqa məsələdir, var və tədricən aradan qaldırılır.
- Siz iddia edirsiniz ki, siyasi narazılıq yoxdur? - Bəli, mənim fikrimcə, siyasi narazılıq yoxdur. Bu narazılıq daha çox sosial, məşiət, məşğullluqla bağlıdır. Məsələn, birinin vəziyyəti bu gün yaxşıdır, amma düşünür ki, bir az da yaxşı olsun. Yəni birdə görürsən ki, yaxşı yaşayanın özü də narazı olur. Deyir ki, mənim avtomobilim “mersedersdir”, amma daha yuxarı klass olmalıdır və s. Yəni həyat, yaşayış və təlabat varsa bu da olmalıdır.
- YAP-da ideoloji deyil, maraqlar birliyinin hakim olduğunu nəzərə alsaq siz hakimiyyətdən gedəsi olsanız hakim partiya dərhal dağılacaqmı? - Bunu əsasən bir qrup qeyri ciddi insan deyir. Əvvəla YAP heç yerə getmir. Əksinə, YAP təzə-təzə başlayıb. YAP-ın yaranma tarixinə fikir versəniz görərsiniz ki, bu partiya möhkəm ideoloji əsaslar üzərində yaranıb. O vaxt belə fikir var idi ki, YAP ideya deyil, şəxsiyyət ətrafında yaranıb. Bəs onda ideyanı kim yarada bilərdi? Təbii ki, ideyanı yoldan keçən deyil, şəxsiyyət yarada bilər. Heydər Əliyev kimi şəxsiyyət. Dövlətçilik, azərbaycançılıq, sosial ədalət YAP-ın əsas prinsipləridir. Bunların hansı ideologiya deyil. Bəs bunu iddia edənlər neylədi? AMİP-də, AXCP-də, Müsavatda nizamnaməsini dəyişib. Amma YAP 20 il əvvəl qəbul etdiyi nizamnaməsi və prinsipləri bu gün də idarəçiliyin əsas prinsipləridir. Odur ki, ideologiyanı şəxsiyyət yaradır. Heydər Əliyevin yaratdığı ideologiya hara, yoldan keçən Əli Kərimlinin yaratdığı ideologiya hara. Bunlar başqa başqa şeylərdir. Bunu bilməyənlər, bəzən özünü politoloq adlandıranlar ağıllarına gələni deyirlər.
- Siz daima çıxışınızda yoldan keçən Əli Kərimli ifadəsini işlədirsiniz, bəyəm başqa siyasətçinin adını çəkə bilməzsiniz? - Məsəl üçün çəkirəm də... İndi biz bir və ya ikisinin adını çəkirik.
- Bu jestləriniz göstərmirmi ki, hakimiyyət Əli Kərimlidən sözün əsl mənasında ehtiyat edirsiniz? - Qəti şəkildə elə deyil. Onun heç bir potensialı yoxdur. Fikrimcə, o deqradasiya olub və tarixin arxivinə gedib. Adam var ki, yaşlıdır, amma aktualdır.
- Müsavat Partiyasının başqanı İsa Qəmbər kimi... - Xeyr. İsa Qəmbər də Əli Kərimli kimi deqradasiyaya uğrayıb.
- Siz hakimiyyətdəsiniz, siyasi prosesləri izləyirsiniz, sorğular aparırsınız. Bu gün sizin rəqibiniz kimdir? - Biz onların heç birini rəqib hesab etmirik.
- Siyasi palitrada sizin rəqibiniz kimdir? - Bu gün YAP-a rəqib ola biləcək siyasi qüvvə, qüvvələr birliyi, dəstə, dərnək və ya firqə yoxdur. Bu gün YAP regionda ən aparıcı partiyalardan biridir.
- Qarşıdan prezident seçkiləri gəlir. Amma İlham Əliyev özü şəxsən namizədliyi haqqında bir söz deməyib. Əvəzində sizlər onun namizəd olacağını deyirsiniz... - Bu elə bu cür də olmalıdır. İlham Əliyev hakimiyyətdə olan partiyanın sədridir. YAP-ın da 600 minə yaxın üzvü var. Bütövlükdə xalqımız İlham Əliyevin həyata keçirdiyi işləri, apardığı siyasəti dəstəkləyir və onu prezident görmək istəyir.
- Bəs onun özü necə, prezident olmaq istəyirmi? - Bu prosedura ilə bağlıdır. Seçkilər zamanı MSK namizədlərin sənədlərini qəbul edərək onları qeydə alır və ya almır. Həmin müddətdə də İlham Əliyevin prezidentliyə namizədliyi irəli sürüləcək. İlham Əliyev hər siyasətçidən deyil ki, seçki başlamamış desin ki, namizəd olacağam. İndi Əhməd Oruc da deyir ki, namizədliyimi irəli sürəcəyəm. Hər şeyin qayda-qanunu var. Təbii ki, siyasi partiya sədrinin qərarına və iradəsinə uyğun şəkildə öz mövqeyini ifadə edir.
- Hakimiyyətin namizədi İlham Əliyev deyil, başqası ola bilərmi? -Qəti şəkildə yox! Bu məsələ həll edilib. 2013-cü ilin prezident seçkilərində hakimiyyətin də, YAP-ın da, azərbaycan xalqının da namizədi İlham Əliyev olacaq. HÜSEYN ABBASOĞLU
Sorğu
Hansı bölmədə daha çox xəbər görmək istərdiniz?