“Seçmələr” rubrikasında növbəti müsahibəmizə başlamazdan öncə bir məsələni xüsusi vurğulamaq istəyirəm ki, “demokratiya”, “liberalizm” və “azadlıq” şüarları altında Azərbaycan dövlətçiliyini parçalamaq istəyən, xalqımızı Əfqanıstan, İraq, Liviya, Suriya və digər münaqişə yaşayan ölkələrin əhalisi kimi səfalətə, köləliyə düçar etmək istəyən qüvvlərə (istər daxili, istər xarici) qarşı son dərəcə dözümsüz və amansız münasibətdəyəm. Əgər hər hansı siyasi qüvvə Konstitusiyanın 49-cu (“Sərbəst toplaşmaq azadlığı”) maddəsinin tələblərini əsas tutaraq, hökuməti mitinq keçirilməsi ilə bağlı xəbərdar edib aksiya keçirirsə, polis hansı ixtiyarla iştirakçıları təqib, həbs edə bilər?!...

Aksiya zamanı belə hal baş verirsə ya bəzi dövlət qurumları öz çirkin əməllərini ört-basdır etməyə çalışır, ya da ki, bəzi qüvvələr ölkədə qarşıdurma yaratmaq istəyir.
Bu gün “Seçmələr” rubrikasının qonaqları 19 yanvarda keçirilən mitinq iştirakçılarından olan və zorla polis idarəsinə aparılan Araz Quliyev, onun 16 yaşlı qızı Seyranə Quliyeva və digər yeniyetnə iştirakçı 15 yaşlı Leyla Hüseynovadır.

25 ildən çoxdur nə veteran, nə də əlilliyə görə haqq etdiyim təqaüdü ala bilirəm.

-Araz bəy, zəhmət olmasa özünüz haqqında qısa məlumat verəsiniz

-Mən Quliyev Araz Böyükağa oğlu 1968-ci il təvəllüdlü, Qarabağ müharibəsi iştirakçısı, həmçinin döyüş əməliyyatları zamanı yaralanmış şəxs olsam da, mövcud iqtidar uzun illərdir məni repressiyaya məruz qoyur.

-Repressiya deyərkən nəyi nəzərdə tutursunuz?

-Mən Qarabağ müharibəsi iştirakçısıyam, “Daşaltı” əməliyyatında da yaralanmışam. Buna baxmayaraq 25 ildən çoxdur nə veteran, nə də əlilliyə görə haqq etdiyim təqaüdü ala bilirəm. Aidiyyatı qurumlara dəfələrlə müraciət etməyimə baxmayaraq mənə “tas” qoyurlar ki, “veteram təqaüdü üçün 500, II qrup əlilliyə görə isə 4000 manat gətir istəyinə nail ol. Məndə onların bu istəyini etmədiyim üçün təqaüd üzünə həsrət qalmışam. Həm özümə, həm də ölkədə baş verən özbaşınalığa, talana, korrupsiya, monopoliya, tayfabazlığa və digər bu kimi qanunsuzluqları pisləyərək qızım ilə birgə 19 yanvarda “Məhsul” stadionunda keçirilən mitinqə qoşuldum. Bir gün sonra əvvəlcə məni sonra isə, qızım Seyranəni zorla polis bölməsinə apardılar.

-Sizi və qızınızı nə səbəə görə polis bölməsinə apardılar?

-Ad o oldu ki, niyə mitinqdə iştirak etmisiniz. Ayrıca olaraq qızıma “sən hələ uşaqsan, mitinqdə nə işin var”? – deyə, 3 dəfə zorla polis bölməsinə apardılar. Birinci dəfə yanvarın 20-si, sonra ayın 26-sı Şirvan şəhəri №3 məktəbdən dərs zamanı özü də iki müəllim və məktəb direktoru ilə birgə, nəhayət ayın 28-də hazırlıq kursundan repetitor müəllimi ilə birgə.

-Müəllimləri niyə aparıblar?

-Biz də bilmirik müəllimlərə qarşı niyə bu cür zorakılıq ediblər? Həmin müəllimlər nə mitinqdə iştirak edib, nə də bizimlə qohumluq əlaqələri var. Düşünürəm ki, bununla insanlarda qorxu yaratmaq istəyirlər.

-Sizə və qızınıza qarşı kobud qanun pozuntularına yol verildiyinə görə məhkəməyə müraciət edəcəksinizmi?

-Əlbəttə. Artıq bu işlə bağlı ilkin fəaliyyətlərə də başlamışıq. Lazım gəlsə işi Avropa məhkəməsinə qədər aparmaqda iddialıyıq.

-Bəs ölkə başçısına necə?

-Bəli, amma köməklik üçün yox, baş verən özbaşınalıqları görməsi dolayı ilə müraciət edəcəm.

Onlardan hər cür şərəfsizliyi gözləmək olar

-Seyranə, başınıza gələnlərlə bağlı siz nə deyə bilərsiniz?

-Mən Quliyeva Seyranə Şirvan şəhəri №3 məktəbin 10-cu sinif şagirdiyəm, polis gücünə öz hakimiyyətlərini yürüdən rejimə qarşıyam. Yanvarın 19-da icazəli mitinqdə iştirakıma görə 3 dəfə zorla Şirvan şəhər polis bölməsinə aparılmışam. Başqa gənclərin gözünü qorxutmaq üçün məni həbs etmələrinə haqq qazandırmasam da, başa düşürəm. Amma mitinqə dəxli olmayan məktəb və hazırlıq müəllimlərimi zorla polis bölməsinə aparılması məni çilədən çox çıxarır. Bununla polis əməkdaşlarının rejimin yaltaq qulları olduğunu bir daha sübut etdi. Onlardan hər cür şərəfsizliyi gözləmək olar.

-16 yaşlı Seyranəni mitinqə çıxmağa nə vadar etdi?

-Bu mənim ilk mitinqim deyil, əvvəllər də etiraz aksiyalarında iştirak etmişəm. İstər əvvəl, istərsə də ötən ayın 19-da təşkil olunan mitinqdəki iştirakımın əsas səbəbi atamla bağlıdır. Bu rejim tərəfindən atama verilməyən zülm qalmayıb, nə veteranlıq, nə də əlillik statusunu verirlər. Amma atama qarşı haqsızlıq olmasa belə yenə də iştirak edərdim. Əgər müstəqil ölkədə yaşayırıqsa hər bir gənc qorxmadan, çəkinmədən bütün mitinqlərdə iştirak edərək haqqını deməyi bacarmalıdır.

-Polis idarəsində sizə qarşı fiziki-mənəvi təzyiqlər oldumu?

-Xeyr, təzyiqlər olmadı, amma hədə-qorxular gəlirdilər ki, sənə elə bir ləkə qoyarıq məktəbdən atılarsan, gələcəkdə heç bir universitetə daxil ola bilməzsən, həyatın qaralar və s. bu kimi ifadələr.

-Gələcək də mitinqlərdə iştirak edəcəksinizmi?

-Əlbəttə edəcəm! Gələcək həyatımı bu rejimdə görmək istəmirəm. Bütün gəncləri gələcəkdə qorxmadan etiraz aksiyasına qoşulmağa çağırıram. Yaltaq, polis gücünə qorunan rejimin dəyişməsini, qayda-qanunun hökm sürdüyü bir hakimiyyətin olmasını istəyirəm.

-Rejimin tamamilə dəyişməsinimi, yoxsa rejimin islahatlar həyat keçirilməsini istəyirsiniz?

-Əsas islahatı bu rejimin getməsi olmalıdır. Bu baş versə qalan problemlərin düzəlməsi asantdı.

Addım başı insandan rüşvət istəyirlər

-Leyla bəs siz nə deyərdiz?

-Seyranənin dediklərinin hər biri ilə razıyam. Bura bizim ölkəmiz, vətənimizdir, amma təbii sərvətlərimizi yuxarıda oturanlar yeyir. Analarımızın pensiya yaşı 62-yə qaldırılıb. O yaşda hansı bir qadının iş qabiliyyəti olacaq?! Heç o yaşa qədər çoxları yaşaya bilmir. Addım başı insandan rüşvət istəyirlər. Cibində pulu olmayan doğru-dürüst təhsil ala bilmir, tibbi xidmət üzünə həsrətdir. Yaltaqlar qabağa çəkilir, haqqı deyənlər isə təqib olunur, həbs edilir. Eləcə də saymaqla bitməyən n qədər özbaşınalıqlar. İnsanlara, əsas da gənclərə onu demək istəyirəm ki, ölkəni tərk etmək çıxış yolu deyil, ona görə də gələcəkdə həyata keçiriləcək bütün etiraz mitinq-aksiyalarında qorxmadan aktiv şəkildə iştirak etməyə səsləyirəm.

Abdulla İsmayıloğlu
GundemXeber.Az