Qarşıdan gələn Novruz bayramında imzalanacaq əfv sərəncamında bir sıra siyasi məhbuslarla yanaşı Qobustan həbsxanasında ömürlük həbs cəzasına məhkum edilmiş OMON-çu məhbuslar-Elçin Əmiraslanov, Səfa Poladov və Arif Kazımovun da azad ediləcəyi deyilir. 25 ilə yaxındır cəza çəkən üç OMON-çunun ailəsinin ümid dolu baxışları əfvə dikilib.

OMON-un komandirlərindən sayılan E.Əmiraslanovun qızı, hazırda Rusiyada anasının yanında olan Aytac Əmiraslanova ilə əfv öncəsi söhbət etdik.

- Atanızı sonuncu dəfə nə vaxt görmüsüz? Ümumi durumu necədir?

- Atamla hər həftə telefonla əlaqə saxlayıram. 6 fevralda onun ad günündə və 21 fevralda öz ad günümdə yenə əlaqə saxladıq. Məktublaşmaq imkanımız yoxdur. Çünki Rusiyadayam və buradan mümkünsüzdür.

- Rusiyada ananızın yanındasınız. Orada qalacaqsınız, yoxsa ölkəyə qayıdacaqsınız?

- İstirahətə gəlmişəm, ailəmin yanına. Azərbaycana qayıdacam. Yəqin ki, bu, mart ayının sonunda olacaq. Bura mənə öz vətənim kimidir. Hər zaman gəl-get olub.

- Qarşıdan Novruz əfvi gəlir. OMON-çuların bu əfvlə azadlığa buraxılacaqları barədə xəbərlər dolaşır. Ümidlisinizmi?

- Bəli, ümidlə gözləyirəm ki, bəlkə bu il atam azad olunar. Onu da fikirləşirəm ki, atamın həbsdə olmasının 25 ili tamam olandan sonra bu məsələyə baxıla bilər. Amma bəlkə də tez oldu, bilmək olmaz, Allah Kərimdir. Ümumiyyətlə, hər zaman hər şeyə ümidlə yanaşmışam. Bir vaxt sizə müsahibə verəndə də demişdim ki, ümidsiz insan həyatda yaşaya bilməz. İndiyə qədər atamla bağlı aidiyyəti qurumlara çox müraciət etmişik. Demək olar ki, hər ay belə müraciətlər edirik. Məktublarımızın çatdığı barədə bizə bildiriş gəlir, amma nəticəsini görmürük.

Hörmətli cənab prezident İlham Əliyevdən xahiş edirəm ki, atamı əfv etsin. Elçin Əmiraslanov II qrup əlildir, bədəni qəlpələrdən ibarətdir, bir ayağı axsayır, epilepsiyası var. Bunları nəzərə alaraq humanistlik edib atamı əfv edin. Bunu 24 ildir atasına həsrət qalan bir övlad kimi xahiş edirəm.

- Elçin Əmiraslanovun azadlığa çıxmasına övladı hazırdırmı? Təsəvvür edəndə ki, həbsxana qapıları açılır və atanız qapıdan azadlığa doğru addımlayır, hansı hissləri keçirərsiniz? Onun təsəvvürü belə sizdə hansı hissləri oyadır?

- Bu sualınızdan həqiqətən gözlərim yaşardı. Təsəvvür edəndə ki, atam bir ömür boyu yanıma gəlir və bundan sonra daim yanımda qalacaq... Bu mənim üçün bilirsiniz nə deməkdir? Hisslərimi ifadə etməkdə çox çətinlik çəkirəm. Nə qədər özümə güvənsəm də, cəsarətli, qorxusuz bir qız olsam da, atam yanımda olandan sonra konkret hər şey və hər kəs dəyişəcək. Bəlkə də sevincdən ürəyim gedər. Onu da qeyd edim ki, atam azad olunsa, onunla cəza çəkən digər iki OMON-çu Səfa Poladov və Arif Kazımov da azadlığa çıxacaq. Çünki hər üçünə qarşı irəli sürülən ittihamlar bir-biri ilə bağlıdır.

- Azadlığa çıxdıqdan sonra planlarınız nədir? Sonuncu dəfə bizə müsahibənizdə atanız həbsdən çıxmayınca ailə həyatı qurmayacağınızı demişdiniz. İndi necə?

- Hələ ki ailə haqqında düşünmürəm. Atam azadlığa çıxar, ondan sonra baxarıq. Hərdən düşünürəm ki, o, azad olunandan sonra ailə qurmaq haqqında düşünə bilməyəcəm. Çünki ondan ayrı qalmaq istəmərəm. Atam azad olunandan sonra planlarımız müəyyən olacaq. Çox istərdim ki, bütün ailəmiz birlikdə olsun, bir araya gəlsinlər. Mən istədikdən sonra belə olacağını düşünürəm. Amma yenə də hər kəsin qərarı var. Yaxşı olardı ki, hamı bərabər olsun. Axı bu ailədir. Bundan sonra övladlar üçün yaşamaq və vuruşmaq lazımdır. Bu cümlələrlə nə demək istədiyimi hər kəs anladı. Bu müsahibəni oxuyan hər kəsə, xüsusilə qohum və tanışlara mesaj göndərirəm k, Elçin Əmiraslanov qızı ilə nəfəs alır. Aytac istədisə, hər şey həyata keçəcək. Təki atam azad olunsun. Bütün işlərimizin alına bilməyəcəyi kimi bir yol görünmür.

- OMON-çu övladı olduğunuz üçün heç yerdə işə götürülmədiyinizi demişdiniz. Həmin problem yenəmi qalır?

- İşlə əlaqəli demişdim ki, rütbəli işdə işləyə bilmərəm. Bu da indiyə qədər belə olub. Amma özəl və dövlət işlərində imkanım, icazəm var ki, özümə uyğun, layiq bildiyim işlərdə çalışım. Hazırda, şükür Allaha, işləyirəm.

- Maddi durumunuz necədir?

- Açığı deyim ki, maddi durumumuz hər zaman normal olub. İstədiyimizi almışıq, yemişik, geyinmişik. Bunlardan biz heç zaman məhrum olmamışıq və ya əziyyət çəkməmişik. İnşallah, bundan sonra da belə davam edər.//“Yeni Müsavat”