Əvəz Temirxan: “Xalq artıq bu iqtidardan üz döndərib”

Suallara Azərbaycan Liberal Partiyasının sədri, Milli Şuranın üzvü Əvəz Temirxan cavab verib. O, əsasən ALP-nin Milli Şura ilə əlaqələrindən, vahid namizədə münasibətlərindən bəhs edib, seçki kampaniyasından, Cəmil Həsənliyə olan hücumlardan danışıb.
- Siz Milli Şurada təmsil olunub vahid namizəd Cəmil Həsənlini müdafiə edirsinizmi?
- Liberal Partiya bütün üzvlərini və tərəfdarlarını Cəmil Həsənliyə səs verməyə, habelə onunla seçicilərin arasında sentiyabrın 22-də keçiriləcək görüşə dəvət edir. Liberal Partiya Cəmil Həsənlini müdafiə edir və vahid namizədin seçki qərargahının məsləhət bildiyi şəkildə bu prosesdə iştirak edir. Biz vahid namizədi birmənalı dəstəkləyirik.
- Siz və ya Lalə Şövkət Cəmil Həsənlinin seçki qərargahında təmsil olunurmu?
- Siz təmsilçilik deyəndə nəyi nəzərdə tutursunuz?
- Siz siyasətçisiniz və təmsilçilik sözünün mənasını da bilməmiş deyilsiniz...
- Təmsilçilik nə deməkdir, nətəri olur? Biz Milli Şuranın üzvüyük və vahid namizədi də dəstəkləyirik. Hər kəsi də, ona səs verməyə çağırırıq.
- Liberal Partiyanın mütəxəssisləri Cəmil Həsənlinin seçki qərargahında təmsil olunurmu?
- Daha yaxşı olardı ki, bu haqda seçki qərargahının rəhbərlərindən soruşun və sualınıza cavab alın.
- Mən seçki qərargahının rəhbərinə deyil, ALP-nin sədrinə sual edirəm...
- Mən sizə cavab verirəm: biz seçkilərə iştirak edir və vahid namizəd Cəmil Həsənlini müdafiə edirik. Cəmil Həsənli və onun seçki qərargahı bizim bu prosesdə necə iştirak etməyimizi məsləhət görsə, biz də o formada iştirakımızı davam etdirəcəyik.
- Milli Şuranın fəaliyyəti sizi qane edirmi?
- Nədənsə tam razı olmaq həmin qurumun ideal olması demək olardı. Bu zman isə inkişaf dayanardı. Milli Şura mümkün olan qədər fəaliyyət göstərir və bizdə bunu qeyd edirik.
- Milli Şuranın sentiyabrın sessiyası haqqında sizə öncədən informasiya verilibmi?
- Bu haqda eşitmişəm.
- Sessiyaya dəvət olunmusunuzmu?
- Siz elə sual verirsiniz ki, mən buna mətəəl qalıram. Şübhəsiz ki, sessiyaya Milli Şura üzvlərinin hamısı dəvət edilir.
- İştirak edəsdinizmi?
- Siz qəribə insansınız...
- Sual konkretdir.
- Sessiya olacaq, sizdə baxarsınız və görərsiniz.
- Siz nəyə görə, Milli Şuradan uzaqlaşmısınız ?
- Sessiya olanda görəcəksiniz.
- Nədən Milli Şura haqda qısa və maraqsız cavablar verirsiniz, bu Milli Şura ilə yollarınızı ayırmağınızın göstəricisidirmi?
- Suala geniş cavab verəndə jurnalist dostlarımız onu konteksdən çıxarırlar. Odur ki, çalışıb suallara qısa cavab veririk.
- Bizim suallarımız konkretdir. Lalə Şövkət tərəfdarlarını Milli Şuranın 22 sentyabr mitinqinə dəvət edib. Lalə Şövkətin özü bu aksiyada iştirak edəcəkmi?
- Əfəndim, mitinqdə görəcəksiniz.
- Nəyi görəcəyik?
- Siz müstəntiq kimi davranırsınız. Sual vermək sizin, cavab vermək isə mənim hüququmdur.
- Siz əsasən görərsiniz, bilərsiniz, eşidərsiniz şəklində cavab verirsiniz. Nədən?
- Ona görə ki, sizə nəsə deyəndə onu konteksdən çıxarır və başlığa qoyursunuz. Beləcə adamın əsəbləri ilə oynayırsınız. Mən sizə nə deyim? Bütün jurnalistlər belədir. Sizə sual edir, nələrisə soruşur, sonda isə özünə lazım olanı konteksdən çıxarırsınız. Siz də sualı verib cavabınızı aldınız. Əlbəttə, mən konkret sizi demirəm, amma bizim fikirlərimizi dəfələrlə təhrif ediblər.
- Lalə Şövkət mitinqə gəlib çıxış edəcəkmi?
- Hesab edirəm ki, sualınıza cavab verdim. Siz özünüz mitinqə gəlib iştirak edin və orada da görün.
- Biz son mitinqlərdə iştirak edirik, nədənsə Lalə Şövkətin iştirakını görmürük...
- Siz zorla sualınıza cavab istəyir, NKVD-nin müstəntiqi kimi davranırsınız. Suallarınzla heç də jurnalistə bənzəmirsiniz. Mən cavab verdim, indi neyləyəm ki, bu sizə sərf etmir.
- Liberal Partiya Milli Şuranın mitinq komitəsində təmsil olunurmu?
- Biz tərəfdarlarımızı mitinqə dəvət edirik.
- Azərbaycan iqtidarının seçki siyasətini necə qiymətləndirirsiniz?
- İctimai Televiziyadakı son debat hər şeyi ortaya qoydu. Azərbayan hökumətinin seçki siyasəti çox zəif siyasətdir və rəqiblərindən qorxur. Hakimiyyət qeydə aldığı süni namizədlərlə əsas müxalifətin namizədi Cəmil Həsənlinin üzərinə gəlməklə kimdən çəkindiyini büruzə verir. Mən demirəm ki, namizədlərin hamısı sünidir. Amma kimki Cəmil Həsənlinin üzərinə gəlir, göstərir ki, iqtidar zəif olduğuna görə özünə köməkçilər tapır. Hakimiyyətin namizədi Milli Şuranın vahid namizədi ilə üz-üzə çıxa bilmir.
- Cəmil Həsənli doğurdanmı saxta yollarla təqaüdə çıxıb?
- Bu gülməlidir və müzakirə belə edilə bilməz. İkincisi, gəlin bu hakimiyyətin saxtakarlıqlarını tərəzinin bir gözünə, Cəmil Həsənlinin əməllərini isə o biri gözə qoyaq. Tərəzi inanın ki, bu zaman taraz durmayacaq. Ümumiyyətlə siyasi və mənəvi etikaya sığmır ki, sən şəxsin xəstəliyi ilə əlaqədar ortaya sənəd qoyasan. Cəmil Həsənli xəstə olmasaydı, ona bu sənəd verilməzdi. Həmdə Cəmil Həsənli bu sənədi xaricdən almayıb, ona bu sənədi elə iqtidar nümayəndələri verib.
- İlham Əliyev neçə gündür ki, rayonlara intensiv səfərlər edir, insanlarla görüşür. Sizcə, o istədiyi səsi ala biləcəkmi?
- Üstəlik əlavə edin ki, müxalifəti də rayonlara çıxmağa qoymurlar. Bu sanki boks yarışında rəqibin birinin əlini bağlayıb ona zərbələr endirməkdir. Azərbaycan iqtidarının hərəkətləri buna bənzəyir. Azərbaycan iqtidarı azərbaycan xalqından səs almaq iqtidarında deyil. Odur ki, bu səfərlərin elədə əhəmiyyəti yoxdur. Xalq artıq bu iqtidardan üz döndərib. Bu artıq reallıqdır.
- Seçki saxtakarlığının qarşısının alınması üçün hansı addımlar atılmalıdır, Milli Şuranın bu imkanı varmı?
- Nəzəriyyəyə görə, hər bir seçici öz səsini qorumalıdır. Yəni vətəndaş seçki məntəqəsinin qarşısına gələrək səsi haqda düşünməlidir. Məntiqə görə belə olmalıdır. Amma belə olub-olmayacağını yaxın gələcək göstərəcək.
- Seçki fəallığı aşağıdır. Azərbaycan xalqı azad və ədalətli seçkilərin keçiriləcəyinə inanmır.
- Bəli, azərbaycan xalqı azad və ədalətli seçkilərin keçirilməsinə tam hazırdır. Əgər Azərbaycan iqtidarı beynəlxalq irtica ilə birləşərək xalqımızın səsini oğurlayırsa, səsini tapdalayrsa, xalqda irtica qarşısında gücsüz olduğunu görürsə, buna görə xalqımızı qınamaq lazım deyil. Bu gün çoxları iddia edir ki, siyasi liderlər yerlərində deyillər. Mən bu fikirlərlə razılaşmıram. Bu adamların həm ali təhsili var, həm də siyasi. Buyurub meydana çıxsınlar, liderlik etsinlər. Buyurub həmin insanlar ortaya çıxsınlar. Bu baş vermir, əvəzində ittihamlar səslənir.
- Jurnalist Pərviz Haşımlının həbsini necə qiymətləndirmək olar?
- Biabırçılıqdır. Liberal Partiya bəyanat verib. Biz hesab edirik ki, bütün bunlar repressiyadır. Biz buna nə şərh verməliyik ki? Hesab edirik ki, bu siyasi repressiyadır. Sabah sizin də, mənim də cibimdən tank çıxa bilər.
- Beynəlxalq aləmin, güc mərkəzlərin Azərbaycanda seçkilərə münasibəti hansı prizma əsasənda formalaşır?
- Elə mürtəcə qüvvələr var ki,Azərbaycanda təyinatlı seçki keçirməkdə maraqlıdır. Mütərəqqi qüvvələr isə normal və ədalətli seçkilərin keçirilməsindən yanadır. Yəni demək olmaz ki, bütün beynəlxaq qüvvələr hakimiyyətin düşündüyü kimi düşünür. Beynəlxalq irticanın mərkəzi Strasburqdadır. Mən Avropa Şurasını və onun Parlament Assambleyasını nəzərdə tuturam. Mən AŞ PA-nın seçkiləri müşahidə missiyasının üzünə dedim ki, Azərbaycan xalqı korrupsiya deyəndə iqtidarı, iqtidar deyəndə isə Avropa Şurası Parlament Assambleyasını nəzərdə tutur. AŞ PA təpədən-dırnağa qədər satılan qurumdur. Bu həqiqətdir. Amma əlbəttə ki, orada da az miqdarda təmiz insanlar var. AXCP sədri Əli Kərimli və ACP sədri Sülhəddin Əkbərdə onları ciddi şəkildə tənqid etdi. Onlar anladılar ki, müxalifət onlarla əvvəlki kimi danışmır. ATƏT-in də münasibəti o qədər də ürək açan deyil. Amma onlar nisbətən reallığı əks etdirən mövqe nümayiş etdirirlər.
- Niyə hökumət ATƏT-in son hesabatını ciddi şəkildə tənqid etdi, hesabatda xüsusi tənqidlər yox idi ?
- Hökumət o qədər zəifdir ki, kiçik bir obyektiv tənqiqi belə özünə yaxın buraxmır. Bu açıq-aydın görünür.
- ABŞ-ın seçkilərə münasibəti haqqında fikirlər söyləmək olarmı?
- ABŞ dövlət katibinin Avrasiya məsələləri üzrə köməkçisi Tomas Meliyanın ölkəyə buraxılmaması göstərir ki, Amerikanın bizdəki seçkilərə münasibəti tənqididir. Meliya ABŞ-da Avrasiya siyasətini müəyyən edən bir neçə şəxsdən biridir. ABŞ diplomatiyası reallıqları nəzərə alaraq, öz mövqelrini itirməmək, vəziyyəti kəskinləşdirməmək naminə bunu qabartmır. Amma görünən budur ki, Azərbaycan iqtidarı ABŞ-ın bu mövqeyindən çox qıcıqlanıb.
- Novruz Məmmədovun ABŞ səfərini necə şərh etmək olar?
- Məncə, bunu münasibətlərdə yaranan indiki soyuqluğu aradan qaldırmağa edilən bir cəhd kimi də qiymətləndirmək olar. Amma bunun baş tutub-tutmayacağı bəlli deyil.
- Böyük Britaniya Azərbaycan siyasəti üçün nə dərəcədə əhəmiyyətlidir?
- Əhəmiyyəti böyükdür.Azərbaycan-Britaniya münasibətlərinin ölkəmizdəki demokratik proseslərə təsiri böyükdür. Ancaq hələlik azad və ədalətli seçkilər yoxdursa, deməli demokratik mərkəzlərin Azərbaycana yetərincə dəstək verməsi haqda danışmaq doğru olmazdı.
- Demək olarmı ki, seçkinin taleyi həll edilib və Əliyev çox asanlıqla prezident postunu əlində saxlayacaq?
- Mən belə düşünmürəm. Hər an, hər şey dəyişə bilər. Azərbaycan xalqının xarakteri od üstündə südə bənzəyir və hər an qəfildən daşa bilər. Bunu heç kim unutmasın. Ola bilər ki, xalqımız dözsün-dözsün və qəfildən daşsın. Üstəlik hesab edirəm ki, hakimiyyət daxilində göründüyünün əksinə olaraq birlik yoxdur. Əgər belə olmasaydı bu yaxınlara qədər iki namizəd haqda düşünülməzdi. Bu iqtidar özünə yaxın olan siyasi partiyalardan belə çəkinir və onların bir-birilə əməkdaşlıq etməsinə imkan vermir.

HÜSEYN ABBASOĞLU